నేటి తరానికి డబ్బు విలువ తెలియడం లేదనేది ప్రధాన ఆరోపణ. తల్లిదండ్రుల సౌకర్యమైన సంపాదనతో జూనియర్స్కు ఆర్థిక కష్టాలు అర్థంకావడం లేదు. దీనివల్ల భవిష్యత్తులో కష్టాలు తప్పవని హెచ్చరిస్తున్నారు నిపుణులు. పనిలోపనిగా పరిష్కారమూ చూపుతున్నారు..
పిల్లలకు జీవన నైపుణ్యాలు నేర్పడంలో పెద్దలదే ముఖ్యపాత్ర. వారి నుంచే చాలా తేలికగా ఎన్నో విషయాలు నేర్చుకుంటారు పిల్లలు. అందుకే పిగ్గీ బ్యాంక్ లాంటి చిన్నపాటి టెక్నిక్స్ ద్వారా పొదుపు అలవాటు చేయాలి.
ఎంత క్లిష్టమైన విషయాన్ని అయినా పిల్లలకు ఆట పాటల రూపంలో తేలికగా, ప్రభావవంతంగా నేర్పవచ్చు. డబ్బు విలువ, ఖర్చు, పొదుపు గురించి నేర్పే ఆటలు చాలానే ఉన్నాయి.
మన జీవితాలు డబ్బు చుట్టూనే తిరుగుతాయి. కానీ డబ్బు గురించి పిల్లల దగ్గర మాట్లాడు కోవడం మంచిదికాదని అనుకుంటాం. అందుకే వీలైనంత వరకు ఆ చర్చను దాటవేస్తాం. చాలా విషయాలు తెలియనివ్వం. ఇది సరైన పద్ధతి కాదు.
ఎదిగిన పిల్లలను రాబడి-ఖర్చుల విషయంలో భాగస్వాములను చేయడం వల్ల మంచి ప్రయోజనం ఉంటుంది. ఇల్లు ఎలా గడుస్తున్నది, అందుకు పెద్దలు ఎంత కష్టపడుతున్నారు అనేది తెలుస్తుంది. రోజువారీ ఖర్చులపై అవగాహన ఏర్పడుతుంది.