ఆకాశ‌న్నంటిన ట‌మాటా ధ‌ర‌లు.. ట‌మాట బ‌దులు కూర‌ల్లో వీటిని ట్రై చేయండి

November 24, 2021 / 07:51 AM IST

Tomato prices | బిర్యానీ, కుర్మా, మసాలా, గ్రేవీ, కూర, చారు.. ఏ వంటకైనా టమాట ఉండాల్సిందే. ఫ్రిజ్‌లో ఓ కిలో అయినా లేకపోతే, ఏదో వెలితి! అంతగా మన ఆహారంలో భాగమైపోయింది. ఇప్పుడేమో, దీని ధర సెంచరీకి చేరువలో ఉంది. ఇలాంటి సమయాల్లో ప్రత్యామ్నాయం వెతుక్కోవడమే ఉత్తమం.

కూర చిక్కదనం కోసం టమాట బాగా ఉపయోగపడుతుంది. ఇందుకోసం ఉల్లిపాయల్ని దోరగా వేయించి, మెత్తగా రుబ్బుకుని వాడుకుంటే సరిపోతుంది.

టమాటకు తిరుగులేని ప్రత్యామ్నాయం చింతపండు. కూర ఉడికేటప్పుడు కాస్త చింతపండు
గుజ్జు వేస్తే చాలు. కమ్మని రుచినిస్తుంది. టమాటతో పనే ఉండదు.

ఉసిరి, మామిడి తురుమును కూడా టమాట స్థానంలో వాడుకోవచ్చు. పప్పు, చారు, రసం వంటి వాటిలో సీజన్‌ను బట్టి ఉసిరి, మామిడి ముక్కలను వేసుకోవచ్చు.

టమాట ధర తక్కువగా ఉన్నప్పుడే టోకుగా కొని.. ముక్కలుగా కోసి, ఎండబెట్టి, తడి తగలకుండా భద్రపరచుకుంటే కావాల్సినప్పుడల్లా వేడి నీళ్లలో వేసి వాడుకోవచ్చు. పొడి రూపంలోనూ నిల్వ చేసుకోవచ్చు.

టమాట ఉడకబెట్టిన గుజ్జులో తగినంత ఉప్పువేసి, ఫ్రిజ్‌లో నిల్వచేసుకుంటే రెండుమూడు నెలలపాటు కూరల్లో వాడుకోవచ్చు.

ఆరునూరైనా, కిలో వందైనా.. మాకు టమాట ఉండాల్సిందే అంటారా? అయితే, ఓ పావుకిలో తెచ్చుకుని మితంగా తినండి. టమాట చట్నీ లాంటి వంటకాల జోలికి వెళ్లకుండా.. కూరలో, పప్పులో ఒకటో రెండో వాడుకుంటే సరిపోతుంది!

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి