క్యాన్స‌ర్ రోగుల కోసం జుట్టు దానం ఇస్తున్న ద‌యా సిస్ట‌ర్స్‌

అన్నదానం, విద్యాదానం, నేత్రదానం, రక్తదానం, చివరికి అవయవదానం గురించి కూడా వింటున్నాం. కానీ, కేశదానం పట్ల మాత్రం ప్రజల్లో ఇప్పటికీ పెద్దగా అవగాహన లేదు. రేడియేషన్‌, కీమోథెరపీ కారణంగా క్యాన్సర్‌ రోగులు జుట్టును కోల్పోతున్నారు. ఆ వెలితి కొన్నిసార్లు రోగం కంటే ఎక్కువగా కుంగదీస్తుంది. అలాంటి మహిళలను చూసి చలించిపోయారు దయా సిస్టర్స్‌.

ఉమ్మడి కరీంనగర్‌ జిల్లా రామగుండం ప్రాంతానికి చెందిన దయా రమాదేవి, దయా లావణ్య అక్కాచెల్లెళ్ల్లు. హైదరాబాద్‌లోని మల్లాపూర్‌లో ఉంటారు. ఇద్దరిలో అక్క రమాదేవి పీజీ చదివింది. చెల్లి లావణ్య ఎంటెక్‌ పాసైంది. ‘తల దువ్వుకుంటున్నప్పుడు దువ్వెనకు నాలుగైదు వెంట్రుకలు చికి ఊడిపోతేనే విలవిలలాడిపోతాం. అలాంటిది, జుట్టంతా కోల్పోయినవారి బాధ ఇంకెలా ఉంటుందో? అనిపించేది మాకు. మా వంతుగా ఏమీ చేయలేమా? అన్న ప్రశ్న కూడా వెంటాడేది. ఏ విషయాన్ని అయినా ఎదుటి మనిషి కోణంలో ఆలోచించడం నేర్పారు మా నాన్న దయా వెంకటయ్య. ఆయన మాటలే ఆదర్శంగా ఈ నిర్ణయం తీసుకున్నాం’ అంటారు ఇద్దరూ. తాజాగా ఈ అక్కాచెల్లెళ్లు.. చికిత్స సమయంలో జుట్టు కోల్పోయిన క్యాన్సర్‌ పేషెంట్లకు ఉచితంగా విగ్గులు తయారీ చేసిచ్చే ఇండియన్‌ గర్ల్స్‌ హెయిర్‌ డొనేషన్‌ సంస్థకు తమ కురులను దానంగా ఇచ్చారు. భవిష్యత్తులోనూ ఇలానే దానం చేస్తామని ప్రకటించారు. ‘జడ దానం చేయండి.. క్యాన్సర్‌ బాధితులకు మనోైస్థెర్యాన్ని ఇవ్వండి’ అంటూ సామాజిక వేదికల ద్వారా ప్రచారం నిర్వహించనున్నట్లు వెల్లడించారు రమ, లావణ్య. ఇంటి పేరు నిలబెట్టడం అంటే ఇదే!

– బండారు రాజు

Read More :

“IAS Anwesha Reddy | కొత్త తెలంగాణచూస్తున్నా.. కలహండి కలెక్టరమ్మ”