Coffee | రిలాక్స్ కోసం కాఫీ తాగుతున్నారా? ఒక్క క్ష‌ణం ఆలోచించండి

January 6, 2022 / 02:42 AM IST

Coffee | గృహిణుల జీవితంలో కాఫీ ఓ భాగం. భర్తను ఆఫీసుకు పంపాక ఒకసారి, పిల్లల్ని బడిలో దిగబెట్టి వచ్చాక ఒకసారి, ఇష్టమైన సీరియల్‌ చూస్తూ ఒకసారి, పుట్టింటివాళ్లతో ఫోన్లో మాట్లాడుతూ ఒకసారి.. రోజుకు ఐదారుసార్లు లాగించేస్తుంటారు. రోజుకు రెండుమూడు కప్పుల కాఫీ ఏమంత ప్రమాదకరం కాదు కానీ, ఆరు కప్పులకు మించి అదే పనిగా తాగేవారిని మాత్రం సమస్యలు చుట్టుముట్టక తప్పదు. అందులోనూ ‘డిమెన్షియా’ (మతిమరుపు వ్యాధి) ముప్పు కాచుకుని ఉంటుంది. ఆస్ట్రేలియాలోని యూనివర్సిటీ ఆఫ్‌ సౌత్‌ ఆస్ట్రేలియా – సెంటర్‌ ఫర్‌ ప్రెసిషన్‌ హెల్త్‌కు చెందిన పరిశోధకులు జరిపిన అధ్యయనంలో ఈ విషయం తేలింది.

అలాగే మెదడు పరిమాణం తగ్గడం లేదా స్ట్రోక్‌ వంటి సమస్యలు కూడా రావచ్చని చెబుతున్నారు. ‘కాఫీలోని కెఫిన్‌ ఆరోగ్యానికి ఎంతో హాని చేస్తుంది. మెదడులో రక్త సరఫరాను తగ్గిస్తుంది. ముఖ్యంగా ‘మెమరీ సర్క్యూట్స్‌’ ఉండే చోటే ఇదంతా జరుగుతుంది. ఫలితంగా ‘న్యూరో డీజెనరేషన్‌’ సమస్య వస్తుంది. ఇలా దీర్ఘకాలంపాటు పీపాలకు పీపాలు కాఫీ తాగుతుంటే మతిమరుపు, ఆలోచనా లోపం మొదలైన సమస్యలు చుట్టు ముట్టడం ఖాయమని హెచ్చరిస్తున్నారు పరిశోధకులు. కాబట్టి, కాఫీ అలవాటు ఉన్నవాళ్లు రోజుకు రెండుమూడు కప్పులకు పరిమితం కావడమే మేలు.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి