ఆర్థిక బాధ్యత ఇద్దరిదీ

కుటుంబం ఆర్థికంగా బాగుండాలంటే దంపతులిద్దరూ ఒక్క మాటపై ఉండాలి. డబ్బు విషయంలో ఇద్దరి మనసులో పొదుపు చేయాలని ఉంటే, కచ్చితంగా ఆ కుటుంబానికి ఆర్థిక సమస్యలు రావు. అయితే ప్రణాళికలు ఎలా వేసుకోవాలో చాలామందికి తెలియదు.

కుటుంబం ఆర్థికంగా బాగుండాలంటే దంపతులిద్దరూ ఒక్క మాటపై ఉండాలి. డబ్బు విషయంలో ఇద్దరి మనసులో పొదుపు చేయాలని ఉంటే, కచ్చితంగా ఆ కుటుంబానికి ఆర్థిక సమస్యలు రావు. అయితే ప్రణాళికలు ఎలా వేసుకోవాలో చాలామందికి తెలియదు. ముఖ్యంగా కొత్తగా పెండ్లయిన దంపతులకు ఈ విషయంలో అవగాహన అంతంత మాత్రమే! అలాంటి వాళ్లు కొన్ని ఆర్థికపరమైన విషయాలు తెలుసుకుంటే మంచిది.

• కొత్త దంపతులు పెండ్లికి ముందు తమ ఆర్థిక పరిస్థితులు ఎలా ఉండేవో చర్చించుకోవాలి. అలాగే తమ అప్పులు, ఆస్తులు, పొదుపు చేసిన డబ్బు, అలవాట్లు, ఖర్చుల గురించి ఒకరికొకరు మాట్లాడుకోవాలి.
• ఇద్దరూ కలిసి డబ్బుపై ఒక అభిప్రాయానికి రావాలి. దాని విలువ గురించి చర్చించుకోవాలి. తర్వాత భవిష్యత్తు కోసం కొన్ని
  లక్ష్యాలను పెట్టుకోవాలి. అందులో షార్ట్‌ టర్మ్‌, లాంగ్‌ టర్మ్‌ గోల్స్‌ ఉండేలా చూసుకోవాలి. చిన్నచిన్న ఔటింగ్స్‌, కొత్త ఫోన్లు, కంప్యూటర్ల కొనుగోలు, ఎమర్జెన్సీ ఫండ్స్‌ వాటిని షార్ట్‌ టర్మ్‌ గోల్స్‌గా ఫిక్స్‌ చేసుకోవాలి. సొంతిల్లు, రిటైర్మెంట్‌ ప్లాన్స్‌ లాంటివి లాంగ్‌ టర్మ్‌ గోల్స్‌గా నిర్దేశించుకోవాలి. అనుకున్న లక్ష్యాలను అందుకునే దిశగా ప్రణాళికలు
  అమలుచేయాలి.
• భార్యాభర్తల మధ్య రహస్యాలు ఉండకపోవడం మంచిది. ముఖ్యంగా ఆర్థికపరమైన అంశాల్లో దాచివేతలు, దాటవేతలు భవిష్యత్తులో సమస్యాత్మకంగా పరిణమించే ప్రమాదం ఉంది. అందువల్ల ఆదాయం, పెట్టుబడి, అప్పుల విషయంలో ఇద్దరి మధ్య పారదర్శకత ఉండాలి. అప్పుడే వాళ్లలో నమ్మకం అనే బలమైన పునాది ఏర్పడుతుంది.
• ఆటుపోట్లు అందరికీ సహజం. ఆర్థికంగా పరిస్థితి ప్రతికూలంగా మారినప్పుడు.. ఒకరిపై ఒకరు ఆరోపణలు చేసుకోవద్దు. ఒకరి తప్పును మరొకరు దిద్దే ప్రయత్నం చేయాలి. ఆర్థిక సుడిగుండంలో నుంచి మీ పార్ట్‌నర్‌ను బయటపడేసేందుకు మీ వంతు సహకారం అందించే ప్రయత్నం చేయాలి.