రొట్టెలు మరింత బలంగా..

షుగర్‌ కారణంగా చాలామంది రాత్రిపూట భోజనం మానేశారు. చపాతీ, రోటీ, పుల్కా... ఇలా పేరు ఏదైనా రాత్రి భోజనం కోసం రొట్టెల మీదే ఆధారపడుతున్నారు. కాస్త పీచులు ఎక్కువగా ఉన్నా ఇది కూడా కార్బొహైడ్రేట్లు కలిగిన పదార్థమే.

షుగర్‌ కారణంగా చాలామంది రాత్రిపూట భోజనం మానేశారు. చపాతీ, రోటీ, పుల్కా… ఇలా పేరు ఏదైనా రాత్రి భోజనం కోసం రొట్టెల మీదే ఆధారపడుతున్నారు. కాస్త పీచులు ఎక్కువగా ఉన్నా ఇది కూడా కార్బొహైడ్రేట్లు కలిగిన పదార్థమే. దీనికి ప్రొటీన్‌ కలప గలిగితే బలవర్ధకమైన ఆహారంగా మార్చుకోవచ్చు. అందుకు కొన్ని దారులున్నాయి.

• గోధుమ పిండికి శనగపిండిని కలపడం వల్ల చపాతీకి మాంసకృత్తులు జతవుతాయి. 100 గ్రాముల శనగపిండిలో 22 గ్రాముల ప్రొటీన్‌ దొరుకుతుంది. ఇది ైగ్లెసెమిక్‌ ఇండెక్స్‌ తక్కువగా ఉండే ఆహారం కూడా. అంటే ఇది తినడం వల్ల రక్తంలో చక్కెర స్థాయులు అమాంతంగా కాకుండా నెమ్మదిగా పెరుగుతాయి. సత్తుపిండి కలుపుకొన్నా అచ్చం ఇవే ఫలితాలు ఉంటాయి.
• సోయా పిండిని కలపడం వల్ల కూడా గోధుమ రొట్టెలను బలవర్ధకంగా మార్చుకోవచ్చు. 100 గ్రాముల సోయా పిండిలో 52గ్రాముల ప్రొటీన్‌ ఉంటుంది. క్యాల్షియం, మెగ్నీషియం, ఫైబర్‌ కూడా ఇందులో పుష్కలంగా దొరుకుతాయి.
• రోజూ సాదా రోటీ కాకుండా అప్పుడప్పుడూ స్టఫ్డ్‌ రోటీ చేసుకుని తినొచ్చు. అందులో పనీర్‌, టోఫు, కొత్తిమీర, కరివేపాకు లాంటివి కూడా జోడించుకుంటే ప్రొటీన్‌తో పాటు విటమిన్స్‌ కూడా పొందొచ్చు.
• ఇంకో అడుగు ముందుకేసి ప్రయత్నిస్తే గోధుమ పిండికి చియా, అవిశె, పొద్దు తిరుగుడు లాంటి గింజల పొడిని కొద్దిగా కలుపుకొన్నా మంచి ఉపయోగం ఉంటుంది.