Bhupalpally : ఫైళ్లను పెండింగ్‌లో ఉంచకండి.. డిజిటల్‌ సంతకంతో పంపించండి..

భూపాలపల్లి రూరల్‌ : ఫైళ్ల నిర్వహణ వేగవంతంగా, పారదర్శకంగా నిర్వహించి పెండింగ్‌లో లేకుండా చూడాలని కలెక్టర్‌ భవేశ్‌ మిశ్రా కలెక్టర్‌ కార్యాలయ అధికారులను ఆదేశించారు. బుధవారం జిల్లా కలెక్టర్‌ కార్యాలయంలోని వివిధ సెక్షన్లు, ఇతర శాఖల అధికారుల ఛాంబర్లను తనిఖీ చేసి ఫైళ్లను పరిశీలించారు. ముందుగా కలెక్టరేట్‌లోని వివిధ సెక్షన్లను పరిశీలించి ప్రభుత్వ ప్రాధాన్యత కార్యక్రమాల నిర్వహణకు అధిక ప్రాధాన్యత ఇచ్చి పెండింగ్‌లో ఉంచకుండా ఎప్పటికప్పుడు పూర్తి చేయలన్నారు. సింగరేణి, జెన్కో, ఇరిగేషన్‌, నేషనల్‌ హైవే తదితర ల్యాండ్‌ అక్విజిషన్‌ వివరాల ఫైళ్లను ప్రత్యేకంగా పొందుపరుచాలని, పెండింగ్‌లో లేకుండా చూడాలన్నారు. ఫైల్స్​‍ ఈ-ఆఫీస్ లో నిర్వహించేటప్పుడు డిజిటల్‌ సంతకంతో పంపించాలని అన్నారు.

అనంతరం ల్యాండ్‌ సర్వే, ప్రణాళిక, సమాచార పౌర సంబధాలు, బీసీ అభివృద్ధి, ఎస్సీ అభివృద్ధి, గ్రౌండ్‌ వాటర్‌, పంచాయతీ, పౌర సరఫరాలు, మహిళా శక్తి కేంద్రం, తదితర శాఖల కార్యాలయాలను సందర్శించి ఫైళ్లను తనిఖీ చేశారు. కార్యక్రమంలో కలెక్టరేట్‌ ఏవో మహేష్‌బాబు, ఏడీ సర్వేల్యాండ్‌ సుదర్శన్‌, సీపీవో సామ్యూల్‌, డీపీఆర్వో రవికుమార్‌ పాల్గొన్నారు.