Ration cards | రేషన్ కార్డుల పంపిణీపై అపసవ్య దృశ్యం.. లబ్ధిదారుల గైర్హాజరు, ఎమ్మెల్యే అసంతృప్తి

తొర్రూరు  మండలంలోని ఎంపీడీవో కార్యాలయంలో సోమవారం నిర్వహించిన రేషన్ కార్డుల పంపిణీ కార్యక్రమం నిరాశ పరిచింది. ముఖ్య అతిథిగా పాలకుర్తి ఎమ్మెల్యే మామిడాల యశశ్విని రెడ్డి పాల్గొన్న ఈ కార్యక్రమంలో ఓ ఆశించిన వాస్తవం ఎదురైంది.

Ration cards | తొర్రూరు :  తొర్రూరు మండలంలోని ఎంపీడీవో కార్యాలయంలో సోమవారం నిర్వహించిన రేషన్ కార్డుల పంపిణీ కార్యక్రమం నిరాశ పరిచింది. ముఖ్య అతిథిగా పాలకుర్తి ఎమ్మెల్యే మామిడాల యశశ్విని రెడ్డి పాల్గొన్న ఈ కార్యక్రమంలో ఓ ఆశించిన వాస్తవం ఎదురైంది. మధ్యాహ్నం కార్యాలయానికి చేరుకున్న ఎమ్మెల్యే, కార్యకర్తలు, కాంగ్రెస్ లీడర్లు ఫొటోలు దిగారు. అయితే అద్భుతంగా సన్నాహాలు చేసినా.. ఒక్క లబ్ధిదారుడైనా హాజరుకాకపోవడం గమనార్హం.

మధ్యాహ్నం 3 గంటలకు ఈ కార్యక్రమం చేపట్టినా, లబ్ధిదారుల గైర్హాజరు వల్ల అధికార యంత్రాంగంపై ఎమ్మెల్యే ఆగ్రహం వ్యక్తం చేసినట్లు సమాచారం. ప్రభుత్వ సంక్షేమ పథకాలను ప్రజల వరకు చేర్చే బాధ్యత అధికారులు తీసుకోవాల్సిందిగా ఆమె సూటిగా వ్యాఖ్యానించినట్లు తెలుస్తోంది. క్షేత్రస్థాయిలో సమన్వయ లోపం కారణంగానే ఈ అపసవ్య పరిస్థితి ఏర్పడిందని స్థానికులు అభిప్రాయపడుతున్నారు. ప్రజలకు పథకాల గురించి ముందుగానే సమాచారం ఇవ్వకపోవడమే ఇందుకు ప్రధాన కారణంగా చెబుతున్నారు. అధికారుల నిర్లక్ష్యం వల్లనే ప్రభుత్వ ప్రతిష్ఠకు భంగం కలుగుతోందని పలువురు విమర్శిస్తున్నారు.