రక్తపుటేరులు !..

వరంగల్‌ నగరంలో రక్తపుటేరులు పారుతున్నాయి. హత్యలు, హత్యా ప్రయత్నాలు ప్రజలను కలవరపెడుతున్నాయి. రోజురోజుకూ దారుణ ఘటనలు వణికిస్తున్నాయి. దుండగులు పగబట్టి సాటి మనుషులను నడి రోడ్డుపైనే నరికి చంపుతున్నారు.

• నగరంలో నడిరోడ్డు పైనే ఘాతుకాలు
• కలవరపెడుతున్న దారుణ హత్యలు
• వణుకుతున్న ప్రజలు
• నేరం జరిగినపుడే పోలీసుల అలర్ట్‌

సుబేదారి, ఫిబ్రవరి 21 : వరంగల్‌ నగరంలో రక్తపుటేరులు పారుతున్నాయి. హత్యలు, హత్యా ప్రయత్నాలు ప్రజలను కలవరపెడుతున్నాయి. రోజురోజుకూ దారుణ ఘటనలు వణికిస్తున్నాయి. దుండగులు పగబట్టి సాటి మనుషులను నడి రోడ్డుపైనే నరికి చంపుతున్నారు. చిన్న చిన్న కారణాలతో క్షణికావేశానికి లోనై కొందరు, భూ తగాదాలు, వివాహేతర సంబంధాలు, ఆర్థిక లావాదేవీలతో మరికొందరు ప్రత్యర్థులపై దాడికి తెగబడుతున్న ఘటనలు ఇటీవల వరంగల్‌ పోలీస్‌ కమిషనరేట్‌ పరిధిలో, ప్రధానంగా వరంగల్‌ నగరంలో చోటుచేసుకుంటున్నాయి. అయితే వీటిని నియంత్రించాల్సిన పోలీసులు పట్టించుకోవడం లేదనే విమర్శలు ప్రజల నుంచి వెల్లువెత్తుతున్నాయి.

వారు ముందు జాగ్రత్త చర్యలు తీసుకోకపోవడంతోనే దుండగులు రెచ్చిపోతున్నారనే అభిప్రాయాలు వ్యక్తమవుతున్నాయి. కొద్ది నెలల క్రితం నగరంలో ఒకే రోజు మట్టెవాడ పోలీసు స్టేషన్‌ పరిధి రంగంపేటలో కారులో వృద్ధుడి దారుణ హత్య, కాజీపేట పోలీసు స్టేషన్‌ పరిధి బాపూజీ నగర్‌లో వృద్ధుడిపై ఓయువకుడు కత్తితో దాడిచేసిన ఘటనలు కలకలం రేపాయి. గతనెల 22న పట్టపగలు సుబేదారి పోలీసు స్టేషన్‌ పరిధి అదాలత్‌ అమరవీరుల జంక్షన్‌ వద్ద ఓ ఆటో డ్రైవర్‌ మరో ఆటో డ్రైవర్‌ను కత్తితో పొడిచి హత్య చేశాడు. దీనిని మరిచిపోకముందే గురువారం రాత్రి నగరంలోని భట్టుపల్లి ప్రధాన రోడ్డుపై కారులో వస్తున్న వైద్యుడు సుమంత్‌రెడ్డిని ఇనుప రాడ్లతో చితకబాదారు. తీవ్రంగా గాయపడిన అతడి పరిస్థితి విషమంగా ఉంది.

నేరం జరిగినప్పుడే అలర్ట్‌..

వరంగల్‌ పోలీసు కమిషనరేట్‌ పరిధిలో లా అండ్‌ ఆర్డర్‌లో పనిచేస్తున్న పోలీసు అధికారులు వారి ఏరియాలో ఏదైనా ఘటన జరిగినప్పుడు మాత్రమే అలర్ట్‌ అవుతున్నారే తప్ప ముందస్తుగా నేరం జరగకుండా చర్యలు తీసుకోవడం లేదనే విమర్శలున్నాయి. పాత నేరస్తులపై నిఘా పెట్టడం, భూ తగాదాలు, కుటుంబ గొడవలు, ఆర్థిక లావాదేవీల్లో ప్రత్యర్థులతో ముప్పుందని తెలిసినప్పటికీ వారిని గట్టిగా హెచ్చరించకపోవడంతో హత్యలు, దాడులకు దారి తీస్తున్నట్లు జరిగిన సంఘటనలు స్పష్టం చేస్తున్నాయి.

ఇటీవల జరిగిన కొన్ని హత్యలు

• ఆరునెలల క్రితం మిల్స్‌కాలనీ పోలీసు స్టేషన్‌ పరిధి రంగశాయిపేటలో భార్యాభర్త ల గొడవలో అల్లుడిని హత్య చేసిన మామ
• కొద్ది నెలల క్రితం కాజీపేట పోలీసు స్టేషన్‌ పరిధి రహమత్‌నగర్‌లో విజయ అనే వృద్ధురాలిని కొట్టి చంపిన గుర్తు తెలియని వ్యక్తులు
• కొద్ది నెలల క్రితం మట్టెవాడ పోలీసు స్టేషన్‌ పరిధిలోని బార్‌షాప్‌లో మద్యం మత్తులో వ్యక్తిని బీర్‌సీసాతో కొట్టి చంపిన వ్యక్తులు
• ఇటీవలె మట్టెవాడ పోలీసు స్టేషన్‌ పరిధి రంగంపేటలో బ్యాంకు రిటైర్డ్‌ ఉద్యోగిని కారులో హత్య చేసిన ఘటన
• గత జనవరి 22న అదాలత్‌ జంక్షన్‌ వద్ద ఆటో డ్రైవర్‌ దారుణ హత్య

హత్యాయత్నాలు..

• కొద్ది నెలల క్రితం మిల్స్‌కాలనీ పోలీసు స్టేషన్‌ పరిధిలో వాహనంపై గడ్డిమోపు తీసుకెళ్తున్న రైతుపై ఉమ్మివేసి తీవ్రంగా కొట్టిన ఓ రౌడీషీటర్‌
• ఇదే పోలీసు స్టేషన్‌ పరిధిలోని సాకరాసికుంటలో బొడ్రాయి పండుగ సందర్భంగా ఇరు వర్గాలు తల్వార్లతో దాడి
• మూడు నెలల క్రితం కాజీపేట పోలీసు స్టేషన్‌ పరిధిలో పెట్రోల్‌ బంక్‌లో ఓ వాహనదారుడిపై రౌడీ గ్యాంగ్‌ దాడి
• మూడు నెలల క్రితం కేయూసీ పోలీసు స్టేషన్‌ పరిధిలో స్వీగ్గి డెలివరీ బాయ్‌పై మాజీ రౌడీ షీటర్‌ దాడి
• గత డిసెంబర్‌లో కాజీపేట పోలీసు స్టేషన్‌ పరిధి బాపూజీనగర్‌లో వృద్ధుడిని విచక్షణారహితంగా కత్తితో పొడిచిన యువకుడు
• ఈ నెల 20 రాత్రి భట్టుపల్లి రోడ్డుపై కారులో వెళ్తున్న వైద్యుడిని తీవ్రంగా కొట్టిన దుండగులు

వరంగల్‌ పోలీసు కమిషనరేట్‌ పరిధిలో గత ఏడాది జనవరి 1నుంచి డిసెంబర్‌ 31 వరకు వరంగల్‌ పోలీసు కమిషనరేట్‌ పరిధిలో 40 హత్యలు జరగగా, వీటిలో 20కి పైగా నగరంలోనే చోటుచేసుకున్నాయి. 107 హత్యా యత్నాలు జరగగా, గత సంవత్సరం జనవరి, ఫిబ్రవరి నెలలతో పోల్చితే ఈ ఏడాది తొలి రెండు నెలల్లోనే హత్యలు, హత్యాయత్నాలు రెట్టింపయ్యాయి.