ఓ మహాత్మా సీఎం మనసు మార్చు.. 420 హామీలు అమలు చేసే బుద్ధి ప్రసాదించు

‘ఓ మహాత్మా.. సీఎం రేవంత్‌రెడ్డి మనసు మార్చు.. 420 రోజులైనా ఇచ్చిన 420 హామీలను అమలు చేయలేదు.. వాటిని నెరవేర్చే బుద్ధిని ప్రసాదించు’ అంటూ గాంధీజీని బీఆర్‌ఎస్‌ నాయకులు వేడుకున్నారు. బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ పిలుపు మేరకు ఉమ్మడి జిల్లా వ్యాప్తంగా జాతిపిత విగ్రహాలకు వినతి పత్రాలు సమర్పించారు.

• గాంధీజీని వేడుకున్న బీఆర్‌ఎస్‌ శ్రేణులు
• ఉమ్మడి జిల్లా వ్యాప్తంగా జాతిపిత విగ్రహాలకు వినతి పత్రాలు
• పలుచోట్ల ర్యాలీలు నిర్వహించిన నాయకులు
• పాల్గొన్న మాజీ మంత్రి ఎర్రబెల్లి, మాజీ ఎమ్మెల్యేలు

‘ఓ మహాత్మా.. సీఎం రేవంత్‌రెడ్డి మనసు మార్చు.. 420 రోజులైనా ఇచ్చిన 420 హామీలను అమలు చేయలేదు.. వాటిని నెరవేర్చే బుద్ధిని ప్రసాదించు’ అంటూ గాంధీజీని బీఆర్‌ఎస్‌ నాయకులు వేడుకున్నారు. బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ పిలుపు మేరకు ఉమ్మడి జిల్లా వ్యాప్తంగా జాతిపిత విగ్రహాలకు వినతి పత్రాలు సమర్పించారు. పలుచోట్ల శ్రేణుల ఆధ్వర్యంలో పెద్ద ఎత్తున ర్యాలీలు నిర్వహించారు. ఆయా కార్యక్రమాల్లో మాజీ మంత్రి ఎర్రబెల్లి దయాకర్‌రావు, మాజీ ఎమ్మెల్యేలు దాస్యం వినయ్‌భాస్కర్‌, నన్నపునేని నరేందర్‌, డాక్టర్‌ తాటికొండ రాజయ్య, చల్లా ధర్మారెడ్డి, డీఎస్‌ రెడ్యానాయక్‌, బానోత్‌ శంకర్‌నాయక్‌, పార్టీ మహబూబాబాద్‌ జిల్లా అధ్యక్షురాలు, మాజీ ఎంపీ మాలోత్‌ కవిత పాల్గొన్నారు. ఈ సందర్భంగా వారు మాట్లాడుతూ అధికారంలోకి వచ్చేందుకు కాంగ్రెస్‌ నాయకులు అలవికాని హామీలిచ్చారని, తీరా ప్రభుత్వం ఏర్పాటయ్యాక వాటి ఊసే ఎత్తడం లేదని ఎద్దేవా చేశారు. 100 రోజుల్లో ఆరు గ్యారెంటీలు అమలు చేస్తామన్న కాంగ్రెస్‌ సర్కారు నిరుపేదలను మోసం చేసిందన్నారు. హామీలన్నీ అమలు చేసే వరకు ప్రజల పక్షాన ప్రభుత్వంపై పోరాడతామని హెచ్చరించారు.

– నమస్తే నెట్‌వర్క్‌, జనవరి 30

హనుమకొండ పబ్లిక్‌ గార్డెన్‌లోని గాంధీజీ విగ్రహానికి బీఆర్‌ఎస్‌ జిల్లా అధ్యక్షుడు దాస్యం వినయ్‌భాస్కర్‌ వినతిపత్రం సమర్పించారు. కాంగ్రెస్‌ పార్టీ అధికారంలోకి వచ్చి 420 రోజులైందని, ఇచ్చిన 420 హామీలు, ఆరు గ్యారంటీలను ఎప్పుడు అమలు చేస్తారని ప్రశ్నించారు. మోసపూరిత హామీలతో అధికారంలోకి వచ్చిన కాంగ్రెస్‌ పాలనలో కోతలు, ఎగవేతలు, ఎదురుచూపులే మిగిలాయని ఎద్దేవా చేశారు. వంద రోజుల్లో హామీలు అమలు చేస్తామని చెప్పి 420 రోజులైనా వాటిని నెరవేర్చడంతో ప్రభుత్వం పూర్తిగా విఫలమైందన్నారు. అధికారంలోకి వచ్చిన రోజు నుంచే కుంటి సాకులు, కొర్రీలతో లబ్ధిదారులను తగ్గించే ప్రక్రియను సర్కారు ప్రారంభించిందని ఆరోపించారు.

• మహబూబాబాద్‌ జిల్లా కేంద్రంలోని గాంధీజీ విగ్రహానికి మాజీ ఎంపీ, బీఆర్‌ఎస్‌ జిల్లా అధ్యక్షురాలు మాలోత్‌ కవిత, మాజీ ఎమ్మెల్యే శంకర్‌నాయక్‌ ఆధ్వర్యంలో బీఆర్‌ఎస్‌ నాయకులు వినతిపత్రం అందజేశారు. ఆరు గ్యారెంటీల పేరుతో సీఎం రేవంత్‌రెడ్డి నిరుపేదలను మోసం చేశారని అన్నారు.
• వరంగల్‌ స్టేషన్‌ రోడ్డులోని గాంధీ విగ్రహానికి వరంగల్‌ తూర్పు మాజీ ఎమ్మెల్యే నన్నపునేని నరేందర్‌ ఆధ్వర్యంలో వినతిపత్రం సమర్పించారు. గ్రామాల్లో రైతు భరోసా, పట్టణాల్లో ఇందిరమ్మ ఇండ్ల పేరుతో మభ్యపెట్టాలని కాంగ్రెస్‌ ప్రభుత్వం చూస్తున్నదని, ఇచ్చిన హామీలు అమలు చేసేదాకా బీఆర్‌ఎస్‌ ప్రజల పక్షాన పోరాటం చేస్తుందని అన్నారు.
• మహబూబాబాద్‌ జిల్లా కురవి మండల కేంద్రంలోని గాంధీజీ విగ్రహానికి డోర్నకల్‌ మాజీ ఎమ్మెల్యే డీఎస్‌ రెడ్యానాయక్‌ వినతిపత్రం అందజేశారు. అంతకుముందు నేరెడ క్రాస్‌రోడ్‌ నుంచి గాంధీ సెంటర్‌ వరకు పెద్ద ఎత్తున తరలివచ్చిన బీఆర్‌ఎస్‌ శ్రేణులతో కలిసి ర్యాలీ నిర్వహించారు.
• జనగామ జిల్లా స్టేషన్‌ఘన్‌పూర్‌ డివిజన్‌ కేంద్రంలోని జాతిపిత విగ్రహానికి మాజీ ఎమ్మెల్యే డాక్టర్‌ తాటికొండ రాజయ్య వినతిపత్రం సమర్పించారు. రాష్ట్రంలో 420 ప్రభుత్వ పాలన కొనసాగుతున్నదని, సీఎం రేవంత్‌రెడ్డికి స్వర్గీయ ఇందిరాగాంధీ, రాజీవ్‌గాంధీ జ్ఞానోదయం కలిగించాలన్నారు.
• వరంగల్‌ జిల్లా సంగెం మండల కేంద్రంలోని గాంధీజీ విగ్రహానికి పరకాల మాజీ ఎమ్మెల్యే చల్లా ధర్మారెడ్డి వినతి పత్రం అందజేశారు. అసమర్థ ప్రభుత్వం కళ్లు తెరిపించు.. చేతగాని కాంగ్రెస్‌కు దారి చూపించి బుద్ధి ప్రసాదించు.. సీఎం రేవంత్‌రెడ్డికి జ్ఞానోదయం కలిగించు అని జాతిపితను వేడుకున్నారు.