సోమవారం 25 జనవరి 2021
Warangal-city - Dec 01, 2020 , 02:24:29

కార్తీక దీపాలు

కార్తీక  దీపాలు

  • భక్తిశ్రద్ధలతో పౌర్ణమి వేడుకలు
  • ఆలయాల్లో భక్తుల ప్రత్యేక పూజలు
  • ఉసిరి చెట్టు వద్ద దీపాలు, సామూహిక వ్రతాలు
  • రుద్రేశ్వరునికి ప్రముఖుల అభిషేకాలు

హన్మకొండ చౌరస్తా: చారిత్రక రుద్రేశ్వరాలయం కార్తీక పౌర్ణమి కృత్తికా నక్షత్రం శివప్రీతికరమైన సోమవారం రోజున కార్తీక శోభ సంతరించుకుంది. ఉద యం 4 గంటలకు బ్రహ్మముహూర్తంలో మంగళవాయిద్య సేవ ఉత్తిష్ఠ గణపతికి పంచామృతాభిషేకం, రుద్రేశ్వరునికి మహాన్యాస పూర్వక రుద్రాభిషేకం, సామూహిక రుద్రాభిషేకాలు, ఉదయం 5 నుంచి రాత్రి 9 గంటల వరకు భక్తుల గోత్రనామాదులతో రుద్రాభిషేకాలు నిర్వర్తించినట్లు ఆలయ ప్రధానార్చకుడు గంగు ఉపేంద్రశర్మ తెలిపారు. రుద్రాభిషేకంలో ప్రముఖ శివభక్తుడు వద్దిరాజు వెంకటేశ్వర్లు, రాష్ట్ర సమాచారశాఖ కమిషనర్‌ శంకర్‌నాయక్‌, ఏసీపీ జితేందర్‌రెడ్డి దంపతులు, హన్మకొండ సీఐ చంద్రశేఖర్‌ దంపతులు, జిల్లా జడ్జి శైలజ, వ్యాపారవేత్తలు పాల్గొని రుద్రాభిషేకం తదితర పూజలు నిర్వహించారు. 

లక్షదీపోత్సవాలు : సాయంత్రం 5.30 గంటలకు కార్తీకపౌర్ణమి లక్షదీపోత్సవాల కార్యక్రమాన్ని ప్రముఖ వ్యాపారవేత్త, ఆధ్యాత్మికవేత్త గట్టు మహేశ్‌బాబు, మాడిశెట్టి సాంబయ్య పాల్గొని జ్యోతిప్రజ్వలన నిర్వహించారు. వేలాది మంది భక్తులు ఓంకార ఆకారం, స్వస్తిక్‌, స్వాగత ఆకారాలతో దీపాలు అలంకరించారు. భక్తులు దీపాల వద్ద సెల్ఫీలు దిగారు. అనంతరం ఆలయ అధికారులు, అర్చకులు ఆకాశ దీపాన్ని వెలిగించారు. భక్తులకు ఇబ్బందులు కలుగకుండా దేవాదాయ, పోలీసుశాఖ ఆధ్వర్యంలో ఏర్పాట్లు చేశారు. 

కాజీపేటలోని ఆలయాల్లో..

కాజీపేట : పట్టణంలోని దేవాలయాల్లో మహిళలు కార్తీక పౌర్ణమిని పురష్కరించుకుని సోమవారం ప్రత్యేక పూజలు నిర్వహించారు. కాజీపేటలోని శ్వేతార్క, చౌరస్తాలోని శ్రీ భ్రమరాంభిక మల్లికార్జునస్వామి, సోమిడిలోని సోమేశ్వరస్వామి, రైల్వే దేవాలయ సముదాయం, డీజిల్‌కాలనీ అభయాంజనేయస్వామి తదితర దేవాలయాలు భక్తులతో కిక్కిరిసి పోయాయి. మహిళలు అత్యంత భక్తి శ్రద్ధలతో సమీపంలోని దేవాలయాలకు వెళ్లి ఉసిరి కొమ్మ, ఉసిరి కాయలతో శి వుడికి ప్రత్యేక అభిషేకా లు, పూజలు చేసి, కార్తీక వత్తులను వెలిగించి మొక్కులు తీర్చుకున్నారు. భక్తులకు ఇబ్బందులు కలుగకుండా పోలీసులు బందోబస్తు నిర్వహించారు.

శ్వేతార్కలో ...: కార్తీక పౌర్ణమిని పురస్కరించుకుని కాజీపేటలోని శ్రీ శ్వేతార్క మూల గణపతి దేవాలయం తెల్లవారుజామునుంచే భక్తులతో కిక్కిరిసిపోయింది. అయినవోలు సాయికృష్ణశర్మ ఆధ్వర్యంలో భక్తులు శివాభిషేకం, ప్రత్యేక అభిషేకాలు చేశారు. త్రిగుళ్ల శ్రీనివాసశర్మ ఆధ్వర్యం లో భక్తులు రుద్రాభిషేకం, ఏకాదశ రుద్ర హోమం నిర్వహించి, పుట్టమన్నుతో తయారు చేసిన 365 శివ లింగాలకు మహాలింగార్చన చేశారు. దేవాలయ ప్రాంగణంలో భక్తులు సామూహిక  సత్యనారాయణ వ్రతం నిర్వహించారు. కార్యక్రమంలో కార్పొరేటర్‌ జక్కుల రమారవీందర్‌ యాదవ్‌, జంగా సుజాత, శారద, మహాతి తదితరులు పాల్గొన్నారు. 


32వ డివిజన్‌లో ప్రత్యేక పూజలు

న్యూశాయంపేట: గ్రేటర్‌ వరంగల్‌ పరిధి 32వ డివిజన్‌ శ్రీ రాజరాజేశ్వర ఆలయంలో కార్తీక పౌర్ణమి సందర్భంగా సోమవారం ప్రత్యేక పూజలు నిర్వహించారు. అర్చకుడు పానుగంటి నాగేంద్రశర్మ  తెల్లవారుజామున  సుప్రభాతసేవ, సామూహిక అభిషేకాలు, సాయంత్రం ఆకాశదీపం నిర్వహించారు. ఆలయ కమిటీ అధ్యక్షుడు తాళ్లపల్లి శ్రీనివాస్‌, కమిటీ సభ్యులు, భక్తులు పాల్గొన్నారు.

మహాలక్ష్మి ఆలయంలో సామూహిక వ్రతాలు

నయీంనగర్‌ : గ్రేటర్‌ వరంగల్‌ 46వ డివిజన్‌ గోపాలపురంలోని మహాలక్ష్మి దేవాలయంలో పూజారి నల్లాని చక్రవర్తుల రామకృష్ణాచార్యులు సోమవారం ప్రత్యేక పూజలు నిర్వహించారు. పరిసర ప్రాంతాల భక్తులు తండోపతండాలుగా హాజరై పూజలో పాల్గొన్నారు. అనంతరం పూజారి ప్రత్యేక పూజలు నిర్వహించి స్వామి తీర్థప్రసాదాలు అందజేశారు. 

మెట్టుగుట్టపై మార్మోగిన శివనామస్మరణ

మడికొండ: కార్తీక పౌర్ణమి సందర్భంగా సోమవారం మెట్టుగుట్టపై ఆలయం శివనామస్మరణతో మార్మోగింది. తెల్లవారుజాము నుంచే స్వామి దర్శనం కోసం భక్తులు బారులు తీరారు. శ్రీస్వయంభూలింగేశ్వరస్వామికి అర్చకుడు రాగిచేడు అభిలాష్‌శర్మ ఆధ్వర్యంలో ప్రత్యేక రుద్రాభిషేకాలు నిర్వహించి భక్తులకు దర్శనం కల్పించారు. శ్రీసీతారామచంద్రస్వామికి విశేష అర్చనలు జరిపించారు. ఆలయ ప్రాంగణంలో మహిళలు దీపాలు వెలిగించారు. కార్యక్రమంలో అర్చకులు పరాశురం రామాచార్యులు, విష్ణువర్ధనాచార్యులు, పారుపల్లి సత్యనారాయణశర్మ, దేవేందర్‌శర్మ, సిబ్బంది పాల్గొన్నారు. 


జలేశ్వరాలయంలో పౌర్ణమి పూజలు

హన్మకొండ చౌరస్తా: హన్మకొండ కాకాజీకాలనీలోని జలేశ్వరాలయంలో కార్తీక పౌర్ణమి వేడుకలను ఘనంగా నిర్వహించారు. భక్తులు అధిక సంఖ్యలో పాల్గొని రుద్రేశ్వరునికి అభిషేకాలు నిర్వహించారు. సాయంత్రం వివిధ ఆకారాలతో మహిళలు దీపాలు వెలిగిలించారు.


logo