బుధవారం 21 అక్టోబర్ 2020
Warangal-city - Jul 23, 2020 , 02:04:23

క‌రోనాపై ఎవ‌రికి వారే..

క‌రోనాపై ఎవ‌రికి వారే..

  • మహమ్మారిపై స్వచ్ఛంద యుద్ధం
  • కట్టడికోసం కలిసికట్టుగా ముందుకు 
  •  పట్టణాల్లో ఎక్కడికక్కడ లాక్‌డౌన్లు
  •  సంఘాల వారీగా ప్రకటనలు
  •  స్వీయ నిర్బంధంలో కాలనీలు
  •  ముఖ్య కూడళ్లు.. వీధుల్లో విడతల వారీగా షాపులు బంద్‌

మొన్నటిదాకా కరోనా నుంచి ప్రజల రక్షణ కోసం ప్రభుత్వం లాక్‌డౌన్‌ను పకడ్బందీగా అమలు చేసింది. ప్రతి ఒక్కరూ స్వీయ నిర్బంధం పాటించాలని పదేపదే సూచించింది. కానీ, చాలా మంది ‘నిర్లక్ష్యపు’ జబ్బుతో నిబంధనలను బేఖాతరు చేయడం కొంపముంచింది. పర్యవసానంగా మహ్మమారి కోరలు చాచి ఇప్పుడు పట్టణాలను చుట్టుముట్టింది. రోజురోజుకూ విజృంభిస్తున్న ‘కొవిడ్‌-19’పై ప్రజల్లో ఆందోళన ఎక్కువైంది. ఇక ‘స్వీయ నిర్బంధమే శ్రీరామరక్ష’ అన్న అవగాహనకు వచ్చి స్వచ్ఛందంగా లాక్‌డౌన్‌ పాటించేలా చేసింది. పట్టణాల్లో ఇప్పుడు ఎక్కడ కేసులు నమోదవుతున్నా సమీప ప్రాంతాల్లోని ముఖ్య కూడళ్లు, వీధుల్లో వ్యాపార సంఘాలు ‘సెల్ఫ్‌ లాక్‌డౌన్‌'ను అమలు చేస్తున్నాయి. తేదీలను ప్రకటించి మరీ షాపులను మూసి ఉంచుతున్నాయి.  - నర్సంపేట 


నర్సంపేట : కరోనా మహమ్మారికి కళ్లెం వేయాలని కేంద్ర, రాష్ట్ర ప్రభుత్వాలు లాక్‌డౌన్‌ను పటిష్టంగా అమలు చేశాయి. అనంతరం సామాజిక ఇబ్బందులను దృష్టిలో పెట్టుకొని విడుతల వారీగా లాక్‌డౌన్‌ను ఎత్తేశాయి. విద్యా సంస్థలు, ప్రజలు ఎక్కువగా గుమిగూడే అవకాశం ఉండేవాటికి ఇంకా అనుమతులు రాలేదు. కాగా ఒక్కసారిగా పట్టణాల్లో కరోనా వ్యాప్తి ఎక్కువైంది. రోజురోజుకూ విజృంభిస్తున్నది. దీంతో ప్రజలో ఒకింత ఆందోళన నెలకొంది. ఈ క్రమంలో ఇప్పుడు స్వచ్ఛంద లాక్‌డౌన్‌కు వ్యాపారులు, ప్రజలు ముందుకొస్తున్నారు. కొన్ని రోజులుగా పట్టణాలు, పల్లెల్లో కరోనా కేసులు పెరుగుతుండడంతో స్వీయ నియంత్రణే శ్రీరామ రక్ష అనే అవగాహనకు వస్తూ ప్రజలు, వ్యాపార సంస్థలవారు సెల్ఫ్‌ లాక్‌డౌన్‌కు మొగ్గు చూపుతున్నారు. వర్తక, వ్యాపారులు స్వచ్ఛందంగా బంద్‌ పాటిస్తున్నారు. 

కొన్ని సంస్థలను మొత్తానికే మూసి వేయగా, మరికొన్నింటిని కొంత సమయం వరకు తెరిచి ఉంచుతున్నారు. ఉమ్మడి వరంగల్‌ జిల్లాలోని దాదాపు అన్ని పట్టణాలు, మండల కేంద్రాల్లో గతంలో విధించిన లాక్‌డౌన్‌ మాదిరిగానే షాపుల మూసివేతకు ముందుకు వస్తున్నారు.  

వ్యాపార సంఘాలు బంద్‌కే మొగ్గు

కరోనా వ్యాప్తిని అరికట్టేందుకు వ్యాపార సంఘాలు సైతం బంద్‌లకే మొగ్గు చూపుతున్నాయి. వరంగల్‌ రూరల్‌ జిల్లా నర్సంపేటలో అన్నిషాపులూ సాయంత్రం ఆరు గంటల వరకే మూసేస్తున్నారు. నల్లబెల్లిలో మధ్యాహ్నం ఒంటిగంట వరకు, నెక్కొండలో మధ్యాహ్నం రెండు గంటల వరకే బంద్‌ చేస్తున్నారు. చెన్నారావుపేట, దుగ్గొండి, ఖానాపురంలోనూ పరిమిత సమయం పెట్టుకొని షాపులను మూసి ఉంచుతున్నారు. సెలూన్లను అన్నిచోట్లా ఈ నెల 31 వరకు బంద్‌ పాటిస్తున్నట్లు స్థానిక సంఘాలు ప్రకటించాయి. సరుకులను పంపిణీ చేసే ఏజెన్సీలు కూడా నర్సంపేటలో ఈ నెల 31 వరకు బంద్‌ చేస్తున్నట్లు చెప్పాయి. నిర్ణీత సమయంలోనే గ్రామాల నుంచి ప్రజలు పట్టణాలకు వచ్చి తమకు కావాల్సినవి కొనుక్కుపోతున్నారు. షాపుల మూసివేతతో ముఖ్య కూడళ్లు, బజార్లు బోసిపోయి కనిపిస్తున్నాయి. చికెన్‌, మటన్‌షాపులను, కూరగాయల మార్కెట్లను సైతం ఉదయం పూటే తెరుస్తున్నారు.  

ఉమ్మడి జిల్లా కీలక సెంటర్‌ బంద్‌..

వరంగల్‌ పట్టణంలోని పిన్నవారి స్ట్రీట్‌, బీట్‌ బజార్‌, బట్టల బజార్‌, దిలీప్‌స్టోర్‌ వీధి, సెంటర్‌ మొత్తం బంద్‌ ఉంటున్నాయి. ఉమ్మడి జిల్లా కేంద్రానికి మొత్తం ఇక్కడి నుంచే నిత్యావరసర, ఇతర వస్తువులు స రఫరా అవుతుంటాయి. ఈ బజార్‌లో ఈ నెల 31దాకా బంద్‌ పాటిస్తున్నట్లు వర్తక సంఘాలవారు ప్రకటించారు. ఇక్కడున్న పెద్ద వర్తక సంస్థల నుంచే రోజువారీగా ఆరు జిల్లాలకు వస్తువులు సరఫరా అవుతున్నాయి. కరోనా కేసులు విస్తృతం కావడంతో ఉమ్మడి వరంగల్‌ జిల్లాలోని కీలకమైన ఈ వ్యాపార కేంద్రం కూడా బందయ్యింది. దీంతో మిగతా చోట్ల కూడా వర్తక, వ్యాపార సంస్థలు స్తంభించాయి.  

గ్రామీణ ప్రాంతాల్లోనూ.. 

గ్రామాల్లోని వివిధ షాపులను కూడా యజమానులు బంద్‌ చేస్తున్నారు. చిరు వ్యాపారులు తమ దుకాణాలను ఎక్కువగా మూసే ఉంచుతున్నారు. ప్రభుత్వం లాక్‌లౌన్‌ విధించకున్నా, స్వచ్ఛందంగా ముందుకు వచ్చి బంద్‌ చేస్తున్నారు. ఈ క్రమంలో ప్రజలు ఎక్కువ ఇబ్బందులు పడకుండా కొంత సమయం పాటు షాపులను ఉంచుతున్నారు. సెలూన్లు, లాండ్రీ షాపులు మాత్రం పూర్తిగా బంద్‌ ఉంటున్నాయి. రైతులకు తమకు కావాల్సిన ఎరువులు, పురుగుమందులు, విత్తనాలను మధ్యాహ్నంలోగా పట్టణాలకు వచ్చి కొనుగోలు చేసి తీసుకెళ్తున్నారు. 

మాస్క్‌లు మస్ట్‌

కరోనా దరిచేరకుండా ఉండాలంటే మాస్క్‌ ధరించడం తప్పనిసరని గుర్తిస్తున్న ప్రజలు బయటకు వెళ్లేటప్పుడు కచ్చితంగా మాస్క్‌ ధరిస్తున్నారు. పల్లె, పట్టణం తేడా లేకుండా అందరూ మాస్కులతోనే కనిపిస్తున్నారు. భౌతికదూరం పాటిస్తూనే తమ పనులు తాము చేసుకుంటున్నారు. ఏమైనా నలతగా ఉన్నా, లక్షణాలు కనిపించినా స్వీయ నిర్బంధంలోకి వెళ్తున్నారు. 



logo