Neeraj Chopra : నీరజ్‌కు అభినందనలు.. ఈరోజు ఆటో రైడింగ్‌ ఫ్రీ

Neeraj Chopra : ఒలింపిక్స్‌లో పసిడి పతకం సాధించి చరిత్ర తిరగరాసిన నీరజ్‌ చోప్రాకు అభినందనగా.. ఆదివారం తన ఆటోలో ఫ్రీ రైడింగ్‌ ఇచ్చేందుకు ముందుకొచ్చాడు చండీఘడ్‌కు చెందిన ఓ ఆటో డ్రైవర్‌. ఈ రోజు ఉదయం 9 నుంచి సాయంత్రం 5 గంటల వరకు ఎవరైనా తన ఆటోలో ఉచితంగా ప్రయాణించవచ్చునంటున్నాడు అనిల్‌ కుమార్‌ అనే ఆటో డ్రైవర్‌

August 8, 2021 / 01:43 PM IST

Neeraj Chopra : నీరజ్‌కు అభినందనలు.. ఈరోజు ఆటో రైడింగ్‌ ఫ్రీ

చండీఘడ్‌ : ఒలింపిక్స్‌లో పసిడి పతకం సాధించి చరిత్ర తిరగరాసిన నీరజ్‌ చోప్రాకు అభినందనగా.. ఆదివారం తన ఆటోలో ఫ్రీ రైడింగ్‌ ఇచ్చేందుకు ముందుకొచ్చాడు చండీఘడ్‌కు చెందిన ఓ ఆటో డ్రైవర్‌. ఈ రోజు ఉదయం 9 నుంచి సాయంత్రం 5 గంటల వరకు ఎవరైనా తన ఆటోలో ఉచితంగా ప్రయాణించవచ్చునంటున్నాడు అనిల్‌ కుమార్‌ అనే ఆటో డ్రైవర్‌. గత కొన్నేండ్లుగా ఆర్మీ పర్సనల్‌, గర్భిణులను ఉచితంగా తీసుకెళ్తూ శహబాష్‌ అనిపించుకుంటున్నాడు.

ఒకవైపు కొవిడ్‌ వ్యాప్తి భయాలు ఉన్నప్పటికీ క్రీడాకారులు తమ ప్రాక్టీస్‌ను కొనసాగించారని, అందుకే వారీ స్థాయికి చేరుకున్నారని అనిల్‌ కుమార్‌ అన్నాడు. చండీఘడ్‌లో చదువుకుని, ఆటల్లో ఓనమాలు దిద్దిన నీరజ్‌ చోప్రా.. ఒలింపిక్స్‌లో బంగారు పతకం సాధించడం తమకు గర్వకారణమంటున్నాడు. నీరజ్‌ పతకాన్ని సాధించినందుకు సంతోషం ఉన్నందున తన ఆటోలో ఈ రోజు (ఆదివారం) ఉచితంగా ప్రయాణించేందుకు అవకాశం కల్పిస్తున్నానని చెప్పాడు. సాధారణంగా ఒక ఆటోడ్రైవర్‌ రోజులో 150 కిలీమీటర్లు ఆటో నడిపి రూ.500 వరకు సంపాదిస్తారని, తాను సంపాదించే ఈ మొత్తాన్ని పతకం సాధించిన తీపి గుర్తుకు వెచ్చించడం ఎంతో సంతోషకరంగా ఉన్నదని చెప్తున్నాడాయన‌.

ఆర్మీ జవాన్లు, గర్భిణులను తన ఆటోలో ఉచితంగా తీసుకెళ్లడం మహద్‌ భాగ్యంగా భావిస్తానంటున్నాడు. నగరంలోని ఇరుకైన వీధుల్లో నుంచి సమయానికి పెద్ద దవాఖానలకు వెళ్లలేని గర్భిణులను అనిల్ తన ఆటో ద్వారా ఉచితంగా తీసుకెళ్తూ సేవలందిస్తున్నాడు.