Grand Nursery Mela | నెక్లెస్ రోడ్‌లో గ్రాండ్​ నర్సరీ మేళా.. అందుబాటులో అరుదైన మొక్కలు, విత్తనాలు

కాంక్రీట్ జంగిల్‌గా మారిన సిటీల్లో టెర్రస్ గార్డెన్లను ప్రోత్సహించేందుకు ప్రతీ రెండో శనివారం శిక్షణ కార్యక్రమాలను నిర్వహిస్తున్నామని ఉద్యానవన కమిషనర్ యాస్మిన్​ భాషా అన్నారు. హైదరాబాద్‌ నెక్లెస్ రోడ్ పీపుల్స్ ప్లాజాలో 18వ గ్రాండ్​ నర్సరీమేళా (Grand Nursery Mela) పేరుతో నిర్వహిస్తున్న ఆల్ ఇండియా హార్టికల్చర్ షోను ఆమె ప్రారంభించారు.

హైదరాబాద్: కాంక్రీట్ జంగిల్‌గా మారిన సిటీల్లో టెర్రస్ గార్డెన్లను ప్రోత్సహించేందుకు ప్రతీ రెండో శనివారం శిక్షణ కార్యక్రమాలను నిర్వహిస్తున్నామని ఉద్యానవన కమిషనర్ యాస్మిన్​ భాషా అన్నారు. హైదరాబాద్‌ నెక్లెస్ రోడ్ పీపుల్స్ ప్లాజాలో 18వ గ్రాండ్​ నర్సరీమేళా (Grand Nursery Mela) పేరుతో నిర్వహిస్తున్న ఆల్ ఇండియా హార్టికల్చర్ షోను ఆమె ప్రారంభించారు. ఈ సందర్భంగా మాట్లాడుతూ గ్రీనరీ ప్రియులకు అందుబాటులో తీసుకువచ్చేందుకు దేశ వ్యాప్తంగా వివిధ రాష్ట్రాల నుంచి అరుదైన మొక్కలు, విత్తనాలు తీసుకువచ్చి ఒక వేదికగా నర్సరీ మేళాలో ప్రదర్శించడం అభినందనీయమన్నారు. మెడిసినల్ ప్లాంట్స్​, కిచెన్, అవుట్‌డోర్, బల్బ్, సీడ్, సీడ్‌లింగ్స్, ఇండోర్, ఆడినియం, బోన్సాయ్, క్రీపర్స్, ఫ్లవర్స్, ఇంపోర్టెడ్ ప్లాంట్స్‌తో పాటు ఎగ్జాటిక్ ప్లాంట్స్, వాటర్ లిల్లీస్, కోకో పిట్, గార్డెన్ ఎక్విప్‌మెంట్, ఫామ్ ఎక్విప్‌మెంట్ వంటి వివిధ రకాల ఉత్పత్తులను ప్రదర్శనలో అందుబాటులో ఉన్నాయన్నారు.

మేళా ఇన్‌చార్జీ ఖాలీద్​ అహ్మద్ మాట్లాడుతూ.. ఏపీ, కోల్‌కతా, ఢిల్లీ, హర్యానా, ముంబై, బెంగళూరు, పుణె, షిర్డీ, కడియం, చెన్నై, వెస్ట్ బెంగాల్ తదితర ప్రాంతాల నుంచి వచ్చిన మొక్కలతో 150 స్టాల్స్‌ను ఏర్పాటు చేస్తున్నట్లు వివరించారు. ఈ షోలో టెర్రస్ గార్డెనింగ్, వర్టికల్ గార్డెనింగ్ వంటి ఆధునిక సాంకేతిక పద్ధతులను ప్రదర్శిస్తున్నట్లు చెప్పారు. ఉదయం 9 నుంచి రాత్రి 9 గంటల వరకు మేళా సందర్శకులకు అందుబాటులో ఉంటుందని పేర్కొన్నారు. పశ్చిమ బెంగాల్‌లోని కాలీపంగ్ నుంచి ప్రత్యేక ఎగ్జాటిక్ ప్లాంట్స్ స్టాల్ కూడా ఆకర్షణగా నిలుస్తుందని ఆయన తెలిపారు. ఈ ప్రదర్శనలో రూ.30 నుంచి రూ.3 లక్షల వరకు విలువైన మొక్కలు లభ్యమవుతాయని చెప్పారు.