ఉన్నత విద్యలో మహిళల హవా

రాష్ట్రంలో ఉన్నత విద్య అడ్మిషన్లలో మహిళలదే పైచేయిగా కనిపిస్తున్నది. డిగ్రీ, పీజీ వంటి వృత్తి విద్యాకోర్సుల్లో మహిళల హవా కొనసాగుతున్నది. 2019-20 విద్యా సంవత్సరంతో పోల్చితే 2020-21లో మహిళల ఎన్‌రోల్‌మెంట్‌ 4.5% పెరిగింది.

• గత ఏడాదితో పొల్చితే 4.5 శాతం పెరిగిన ప్రవేశాలు
• మొత్తం ఎన్‌రోల్‌మెంట్‌ 4.8 శాతం పెరుగుదల
• అయిషే 2020-21 నివేదికలో వెల్లడి

హైదరాబాద్‌, జనవరి 29 (నమస్తే తెలంగాణ): రాష్ట్రంలో ఉన్నత విద్య అడ్మిషన్లలో మహిళలదే పైచేయిగా కనిపిస్తున్నది. డిగ్రీ, పీజీ వంటి వృత్తి విద్యాకోర్సుల్లో మహిళల హవా కొనసాగుతున్నది. 2019-20 విద్యా సంవత్సరంతో పోల్చితే 2020-21లో మహిళల ఎన్‌రోల్‌మెంట్‌ 4.5% పెరిగింది. ఇదే కాలం లో మొత్తం ఎన్‌రోల్‌మెంట్‌ 4.8% పెరగడం విశేషం. కేంద్ర విద్యాశాఖ ఆదివారం విడుదలచేసిన ఆల్‌ ఇండి యా సర్వే ఆన్‌ హయ్యర్‌ ఎడ్యుకేషన్‌ (అయిషే) నివేదికలో ఈ విషయాలు వెల్లడయ్యాయి. ఉన్నత విద్యలో 2017-18 నుంచి ఏటా మహిళల నమోదు పెరుగుతుండగా, 2020-21లోనూ అదే ట్రెండ్‌ కొనసాగింది.

అత్యధిక కాలేజీలు..

• దేశంలో అత్యధిక కాలేజీలున్న జిల్లాల్లో హైదరాబాద్‌ది (488) 3వ స్థానం
• 1,058 కాలేజీలతో బెంగళూరు అర్బన్‌ మొదటి స్థానంలో నిలువగా, ఆ తర్వాత జైపూర్‌(671) రెండోస్థానంలో నిలిచింది.
• రాష్ట్రంలో నమోదు రాబోయే రోజుల్లో వర్సిటీలు, వర్సిటీ కాన్‌స్టియంట్‌ కాలేజీల్లో 2,47,467 కాలేజీల్లో 12,33,492, స్టాండలోన్‌ కాలేజీల్లో 92,827 చొప్పున మొత్తంగా 15,73,786 విద్యార్థులు చేరే అవకాశం ఉన్నదని అంచనావేసింది.
• దేశవ్యాప్తంగా 48,035 మంది విదేశీ విద్యార్థులు చదువుతుండగా, తెలంగాణలో 1,389 విదేశీ విద్యార్థులు ఉన్నారు.

జాతీయ స్థాయిలో ముఖ్యాంశాలు

• దేశవ్యాప్తంగా ఉన్నత విద్యలో నమోదు తొలిసారిగా నాలుగు కోట్లు దాటింది. 2020-21 సంవత్సరానికి 4.14 కోట్ల విద్యార్థులు ప్రవేశాలు పొందారు. ఇది 2019-20తో పోల్చితే 7.5%, 2014-15తో పోల్చితే 21% అధికం.
• మహిళల నమోదు 2 కోట్లు దాటగా 2019-20తో పోల్చితే 13 లక్షల మంది అధికంగా ప్రవేశాలు పొందారు.
• 2014-15తో పొల్చితే ఎస్సీ విద్యార్థుల నమోదు 28% పెరిగింది. ఎస్సీ మహిళల నమోదు 38% పెరిగింది.
• ఎస్టీల నమోదు 47%, ఎస్టీ మహిళల నమోదు 63.4% పెరిగింది.
• ఓబీసీల నమోదు 32%, ఓబీసీ మహిళల నమోదు 39% పెరిగింది.
• దూరవిద్యలో నమోదు 2019-20తో పోల్చితే 7% పెరిగింది.
• యూనివర్సిటీల సంఖ్య 79, కాలేజీల సంఖ్య 1,453 పెరిగాయి.
• ఫ్యాకల్టీ సంఖ్య సైతం భారీగా పెరిగింది. ఏడాది కాలంలో 47,914 మంది ఫ్యాకల్టీ అదనంగా చేరారు.