పడ్డ ఓట్ల లెక్కలో తేడా!

2019లో జరిగిన లోక్‌సభ ఎన్నికల్లో బీజేపీ అవకతవకలకు పాల్పడిందని, తద్వారా మెజారిటీ స్థానాల్లో గెలిచిందని ఆరోపిస్తూ అశోకా యూనివర్సిటీకి చెందిన ప్రొఫెసర్‌ సబ్యసాచి దాస్‌ వెలువరించిన పరిశోధనాత్మక పత్రంపై సర్వత్రా చర్చ జరుగుతున్నది.

• 2019 ఎన్నికల్లో బీజేపీ కుట్ర
• పోల్‌ అయిన ఓట్లు, లెక్కించిన ఓట్లకు మధ్య భారీ వ్యత్యాసం
• అశోకా వర్సిటీ ప్రొఫెసర్‌ సబ్యసాచి పరిశోధనా పత్రంలో వెల్లడి

(స్పెషల్‌ టాస్క్‌ బ్యూరో) హైదరాబాద్‌, ఆగస్టు 1 (నమస్తే తెలంగాణ): 2019లో జరిగిన లోక్‌సభ ఎన్నికల్లో బీజేపీ అవకతవకలకు పాల్పడిందని, తద్వారా మెజారిటీ స్థానాల్లో గెలిచిందని ఆరోపిస్తూ అశోకా యూనివర్సిటీకి చెందిన ప్రొఫెసర్‌ సబ్యసాచి దాస్‌ వెలువరించిన పరిశోధనాత్మక పత్రంపై సర్వత్రా చర్చ జరుగుతున్నది. ఈ పత్రంలో సబ్యసాచి పేర్కొ న్న మరికొన్ని కీలక విషయాలు ఇలా ఉన్నాయి.

మరికొన్ని కీలకాంశాలు

• 2019లో ఏడు విడుతలుగా జరిగిన లోక్‌సభ ఎన్నికల్లో తొలి నాలుగు దఫాల్లో ఈవీఎంలలో పోల్‌ అయిన ఓట్లకు, కౌంటింగ్‌ సమయంలో ఈవీఎంలలో లెక్కించిన ఓట్లకు మధ్య భారీ వ్యత్యాసం ఉన్నది. ఇదే విషయమై అప్పట్లో మీడియాలోనూ పెద్దయెత్తున వార్తలు వచ్చాయి. దీంతో ఫైనల్‌ ఓటింగ్‌ శాతాన్ని ఈసీ వెబ్‌సైట్‌ నుంచి తొలగించింది.
• ఎన్నికల్లో అవకతవకలు మూడు విధాలుగా జరిగాయి.
• రిజిస్ట్రేషన్‌ మ్యానిప్యులేషన్‌: బీజేపీకి వ్యతిరేకంగా ఉన్న ముస్లింల ఓట్లను రిజిస్ట్రేషన్‌ సమయంలోనే ఉద్దేశపూర్వకంగా రద్దు చేశారు.
• పోలింగ్‌ స్టేషన్‌లో అడ్డగింత: పోలింగ్‌ స్టేషన్లలో బీజేపీ వ్యతిరేక ఓటర్లను పోలింగ్‌ ఆఫీసర్లు వివిధ కారణాలు చూపించి ఓటేయకుండా అడ్డుకొన్నారు.
• కౌంటింగ్‌ మ్యానిప్యులేషన్‌: పోల్‌ అయిన ఓట్లకు.. కౌంటింగ్‌ చేయగా వచ్చిన ఓట్లకు మధ్య భారీ వ్యత్యాసం కనిపించింది.
• మొత్తం 543 స్థానాల్లో 373 పార్లమెంటరీ నియోజకవర్గాలకు తొలి నాలుగు దఫాల్లో పోలింగ్‌ జరిగింది. ఇందులో 36 శాతం నియోజకవర్గాల్లో పోలైన ఓట్ల కంటే, కౌంటింగ్‌లో వచ్చిన ఓట్లు తక్కువగా ఉన్నట్టు తేలింది.
• నియోజకవర్గంలోని అన్ని పోలింగ్‌ స్టేషన్లలో పోలైన ఓట్లు, ఒక్కో స్టేషన్‌లో ఒక్కో అభ్యర్థికి పోలైన ఓట్లు, మొత్తం అభ్యర్ధుల ఓట్లను ‘బెన్‌ఫోర్డ్‌ డిస్ట్రిబ్యూషన్‌ లా’ ప్రకారం విశ్లేషించగా.. బీజేపీ అభ్యర్థులు గెలిచిన నియోజకవర్గాల్లో పోల్‌ అయిన ఓట్లు, కౌంటింగ్‌ చేసిన ఓట్లలో వ్యత్యాసం కనిపిస్తున్నది.
• ఎన్నికల విధుల్లో 36 శాతం పరిశీలకులుగా రాష్ర్టాలకు చెందిన ఎస్‌సీఎస్‌ క్యాడర్‌ అధికారులను నియమించారు. బీజేపీ ఓటమిపాలైన స్థానాల్లో ఎస్‌సీఎస్‌ క్యాడర్‌ అధికారులు పరిశీలకులుగా లేరు. ఓటింగ్‌ ప్రక్రియలో పెద్దగా అవకతవకలను గుర్తించలేదు. బీజేపీ అభ్యర్థులు గెలిచిన స్థానాల్లో ఎస్‌సీఎస్‌ క్యాడర్‌ అధికారులు పరిశీలకులుగా ఉండటంతో పాటు ఓటింగ్‌ ప్రక్రియలో అవకతవకలు కనిపించాయి.