ఎయిర్‌పోర్టుల్లో నాసిరకం నిర్మాణాలు!

దేశంలోని విమానాశ్రయాల్లో నాసిరకం నిర్మాణాలపై ఆందోళన వ్యక్తమవుతున్నది. ఇటీవల చోటుచేసుకున్న వరుస ప్రమాద ఘటనలపై విమర్శలు వ్యక్తమవుతున్నాయి.

• రాజధాని ఢిల్లీలో కూలిన ఎయిర్‌పోర్టు పైకప్పు
• లక్నో విమానాశ్రయంలో లీకేజీ
• మధ్యప్రదేశ్‌, గుజరాత్‌లోనూపలు ఘటనలు
• మోదీ ప్రభుత్వ అవినీతి వల్లే
• కేంద్రంపై విపక్ష పార్టీల ధ్వజం

న్యూఢిల్లీ, జూన్‌ 30: దేశంలోని విమానాశ్రయాల్లో నాసిరకం నిర్మాణాలపై ఆందోళన వ్యక్తమవుతున్నది. ఇటీవల చోటుచేసుకున్న వరుస ప్రమాద ఘటనలపై విమర్శలు వ్యక్తమవుతున్నాయి. గత నాలుగు రోజుల వ్యవధిలో దేశ రాజధాని ఢిల్లీ ఎయిర్‌పోర్టుతో సహా బీజేపీ పాలిత రాష్ర్టాలైన మధ్యప్రదేశ్‌లోని జబల్‌పూర్‌, గుజరాత్‌లోని రాజ్‌కోట్‌, యూపీలోని లక్నో విమాశ్రయాల్లో పైకప్పులు కూలడం, వర్షాలకు నీళ్ల లీకేజీ వంటి ఘటనలు జరిగాయి. కేంద్రంలో పదేండ్ల మోదీ ప్రభుత్వ అవినీతి, నిర్లక్ష్యం వల్లే నాసిరకంగా మౌలిక సదుపాయాలు కూలిపోతున్నాయని విపక్షాలు విమర్శిస్తున్నాయి.

కీలకమైన ఢిల్లీ ఎయిర్‌పోర్టులోనే..

ఢిల్లీలోని ఇందిరా గాంధీ అంతర్జాతీయ విమానాశ్రయంలో గత శుక్రవారం టెర్మినల్‌-1 వద్ద పైకప్పు కుప్పకూలింది. ఈ ప్రమాదంలో క్యాబ్‌ డ్రైవర్‌ మరణించగా, మరో ఎనిమిది మందికి గాయాలయ్యాయి. విమానాశ్రయంలో ప్రయాణికుల సామర్థ్యాన్ని పెంచే టెర్మినల్‌ ఆధునీకరణను ప్రధాని మోదీ ప్రారంభించిన నాలుగు నెలల్లోపే ఈ ఘటన చోటుచేసుకోవడం గమనార్హం.

3 నెలల క్రితమే ప్రారంభం

ప్రధాని మోదీ మూడు నెలల క్రితం ప్రారంభించిన మధ్యప్రదేశ్‌లోని జబల్‌పూర్‌ ఎయిర్‌పోర్టులోనూ గత గురువారం ఇదే విధంగా పైకప్పు కూలి ఓ కారుపై పడింది. అదృష్టవశాత్తూ ఎవరికీ గాయాలు కాలేదు.

రాజ్‌కోట్‌ ఎయిర్‌పోర్టులో కూలిన కెనోపీ

శనివారం గుజరాత్‌లోని రాజ్‌కోట్‌ ఎయిర్‌పోర్టు టెర్మినల్‌ బయట వాహనాలు ఆగే చోట ఏర్పాటు చేసిన కెనోపీ భారీ వర్షాలకు కుప్పకూలింది. ఈ ఘటనలో ఎవరికీ గాయాలు కాలేదు.ఈ గ్రీన్‌ఫీల్డ్‌ ఎయిర్‌పోర్టును ప్రధాని మోదీ గత ఏడాది జూలైలో ప్రారంభించారు.

లక్నో ఎయిర్‌పోర్టులో నీళ్ల లీకేజీ

తాజాగా ఉత్తరప్రదేశ్‌లో అదానీ గ్రూపు నిర్వహిస్తున్న లక్నో ఎయిర్‌పోర్టు టెర్మినల్‌-3 పైకప్పు నుంచి నీళ్లు లీకేజీ అవుతున్న వీడియో శనివారం సామాజిక మాధ్యమాల్లో వైరల్‌గా మారింది. ఈ కొత్త టెర్మినల్‌ను కూడా మూడు నెలల క్రితమే ప్రారంభించారు. నీళ్ల లీకేజీ ఘటనపై ప్రయాణికులు భయాందోళన, తీవ్ర అసంతృప్తి వ్యక్తం చేస్తున్నారు. ‘ ఒక అంతర్జాతీయ విమానాశ్రయం పైకప్పు నుంచి నీరు కారడం మంచి సంకేతం కాదు. ఇది నాసిరకపు పనిని ప్రతిబింబిస్తుంది’ అని శరద్‌ కుమార్‌ అనే వ్యక్తి పేర్కొన్నారు.