ప్ర‌భుత్వ‌, ప్రైవేటు విద్యాసంస్థ‌ల విస్త‌ర‌ణ‌ అవ‌స‌రం : బి. వినోద్‌కుమార్‌

కరీంనగర్ : పెరుగుతున్న జనాభా విద్యా అవసరాలను తీర్చేందుకు ప్రభుత్వ, ప్రైవేట్ విద్యాసంస్థలు వృద్ధి చెందాల్సిన అవ‌స‌రం ఉంద‌ని రాష్ట్ర ప్ర‌ణాళిక సంఘం ఉపాధ్య‌క్షుడు బి. వినోద్ కుమార్ అన్నారు. దేశ జనాభా భవిష్యత్తులో 200 కోట్లకు చేరుతుంద‌న్నారు. ఈ నేప‌థ్యంలో ఏర్ప‌డే విద్యావ‌స‌రాల‌ను తీర్చేందుకు ప్రభుత్వ, ప్రైవేట్ విద్యాసంస్థలు పనిచేయడం అవసరం అని చెప్పారు.

క‌రీంన‌గ‌ర్‌లో ప్ర‌ముఖ విద్యావేత్త‌, వ‌నినికేత‌న్ విద్యాసంస్థ‌ల వ్య‌వ‌స్థాప‌కుడు చీటి అయోధ్య రామారావు విగ్ర‌హాన్ని వ‌నినికేథ‌న్ డిగ్రీ అండ్ పీజీ కాలేజీలో రాష్ట్ర బీసీ సంక్షేమ, పౌర సరఫరాలశాఖ‌ మంత్రి గంగుల కమలకర్‌తో కలిసి వినోద్‌కుమార్ బుధ‌వారం ఆవిష్క‌రించారు. ఈ సంద‌ర్భంగా వినోద్‌కుమార్ మాట్లాడుతూ.. ప్ర‌స్తుత త‌రం, యువ‌త అయోధ్య రామారావు నుండి క్ర‌మ‌శిక్ష‌ణ‌, స‌మ‌య‌పాల‌న నేర్చుకోవాల‌న్నారు. గ‌ణితంలో ప్ర‌తిభ చూపే విద్యార్థికి రామారావు జ్ఞాప‌కార్థంగా ప్ర‌తీ ఏడాది బంగారు ప‌త‌కాన్ని అంద‌జేయ‌నున్న‌ట్లు ఆయ‌న వెల్ల‌డించారు.

మంత్రి గంగుల క‌మ‌లాక‌ర్ మాట్లాడుతూ.. తన గురువు రామారావు విగ్రహాన్ని ఆవిష్క‌రించ‌డం సంతోషంగా ఉంద‌న్నారు. విద్యను వాణిజ్యపరంగా ఎప్పుడూ చేయలేద‌న్నారు. ఐదుగురు విద్యార్థులు, ఇద్దరు ఉపాధ్యాయులతో ప్రారంభమైన వనినికేతన్ ప్రతిష్టాత్మక సంస్థగా అభివృద్ధి చెందింద‌ని పేర్కొన్నారు. త‌న ముగ్గురు విద్యార్థులు హ‌రీశ్‌రావు, గంగుల క‌మ‌లాక‌ర్‌, ప‌ద్మా దేవేంద‌ర్‌రెడ్డి ఎమ్మెల్యేలుగా ఎన్నికైనందుకు సంతోషంగా ఉంద‌ని రామారావు చేసిన వ్యాఖ్య‌ల‌ను మంత్రి ఈ సంద‌ర్భంగా గుర్తు చేశారు.

తాను మంత్రి కావాల‌ని కోరుకున్న రామారావు అది చూడ‌కుండానే క‌న్నుమూశార‌న్నారు. ప‌ట్ట‌ణంలోని ఒక ర‌హ‌దారికి అయోధ్య రామారావు పేరు పెట్ట‌నున్న‌ట్లు మంత్రి తెలిపారు. ఈ కార్య‌క్ర‌మంలో క‌రీంన‌గ‌ర్ మేయ‌ర్ వై. సునీల్ రావు, శాత‌వాహ‌న యూనివ‌ర్సిటీ వైస్ ఛాన్స‌ల‌ర్ మ‌ల్లేశ్‌, త‌దిత‌రులు పాల్గొన్నారు.