రెండ్రోజులు శ్రీవారి వీఐపీ బ్రేక్‌ దర్శనాలు రద్దు.. 15న కోయిల్‌ అళ్వార్‌ తిరుమంజనం, 16న ఆణివార ఆస్థానం : టీటీడీ

తిరుమలలో ఈనెల 15,16 తేదీల్లో ప్రొటోకాల్‌ ప్రముఖులకు మినహా.. శ్రీవారి వీఐపీ బ్రేక్‌ దర్శనాలు రద్దు చేస్తున్నట్టు తిరుమల తిరుపతి దేవస్థానం ఆదివారం ఒక ప్రకటనలో తెలిపింది. 16న బుధవారం శ్రీవారి ఆలయంలో ఆణివార ఆస్థానం నిర్వహించనున్నట్లు పేర్కొన్నది.

హైదరాబాద్‌, జూలై 6 (నమస్తే తెలంగాణ) : తిరుమలలో ఈనెల 15,16 తేదీల్లో ప్రొటోకాల్‌ ప్రముఖులకు మినహా.. శ్రీవారి వీఐపీ బ్రేక్‌ దర్శనాలు రద్దు చేస్తున్నట్టు తిరుమల తిరుపతి దేవస్థానం ఆదివారం ఒక ప్రకటనలో తెలిపింది. 16న బుధవారం శ్రీవారి ఆలయంలో ఆణివార ఆస్థానం నిర్వహించనున్నట్లు పేర్కొన్నది.

ఈ క్రమంలో 15న కోయిల్‌ ఆళ్వార్‌ తిరుమంజనం చేపడతారని, దీంతో రెండ్రోజులు వీఐపీ బ్రేక్‌ దర్శనాలను రద్దు చేస్తున్నట్టు వెల్లడించింది. ప్రతి ఏడాది సౌరమానం ప్రకారం దక్షిణాయన పుణ్యకాలంలో కరాటక సంక్రాంతి రోజు ఆణివార ఆస్థానం ఉత్సవాన్ని నిర్వహిస్తారని తెలిపింది. ఈ సందర్భంగా శ్రీదేవి, భూదేవి సమేత శ్రీమలయప్పస్వామి పుష్పపల్లకీపై తిరుమల మాఢవీధుల్లో ఊరేగుతూ భక్తులను దర్శనమిస్తారని పేర్కొన్నది.