TSRTC | వైజాగ్‌, తిరుపతికి ఆధునిక హంగులతో ఏసీ స్లీపర్‌ బస్సులు.. టీఎస్‌ఆర్టీసీ తెస్తున్న ఈ బస్సుల స్పెషాలిటీ ఇదే..

TSRTC | ప్రైవేటుకు దీటుగా అత్యాధునిక హంగులతో టీఎస్‌ఆర్టీసీ కొత్తగా 16 ఏసీ స్లీపర్‌ బస్సులను తీసుకురానున్నది. మార్చి నెలలో ఇవి అందుబాటులోకి రానున్నాయి. సుదూర ప్రాంతాలకు వెళ్లే వారికి మరింతగా చేరువయ్యేందుకు హైటెక్‌ మాడల్‌లో ఈ బస్సులను రూపొందించింది.

హైదరాబాద్‌, ఫిబ్రవరి 20 (నమస్తే తెలంగాణ): ప్రైవేటుకు దీటుగా అత్యాధునిక హంగులతో టీఎస్‌ఆర్టీసీ కొత్తగా 16 ఏసీ స్లీపర్‌ బస్సులను తీసుకురానున్నది. మార్చి నెలలో ఇవి అందుబాటులోకి రానున్నాయి. సుదూర ప్రాంతాలకు వెళ్లే వారికి మరింతగా చేరువయ్యేందుకు హైటెక్‌ మాడల్‌లో ఈ బస్సులను రూపొందించింది. కర్ణాటకలోని బెంగళూరు, హుబ్లీ, ఆంధ్రప్రదేశ్‌లోని విశాఖపట్నం, తిరుపతి, తమిళనాడులోని చెన్నై మార్గాల్లో ఈ బస్సులను సంస్థ నడపనుంది. నాన్‌ ఏసీ స్లీపర్‌ బస్సుల మాదిరిగానే ఏసీ స్లీపర్‌ బస్సులకు లహరిగా నామకరణం చేసింది. హైదరాబాద్‌లోని బస్‌ భవన్‌ ప్రాంగణంలో నూతన నమూనా ఏసీ స్లీపర్‌ బస్సును ఆర్టీసీ ఎండీ వీసీ సజ్జనార్‌ సోమవారం పరిశీలించారు. తెలంగాణలో మొదటిసారిగా అందుబాటులోకి తీసుకొస్తున్న ఏసీ స్లీపర్‌ బస్సులకు ప్రజల నుంచి మంచి ఆదరణ ఉంటుందని ఆశాభావం వ్యక్తం చేశారు. కార్యక్రమంలో సీవోవో డాక్టర్‌ వీ రవీందర్‌, ఎగ్జిక్యూటివ్‌ డైరెక్టర్‌ (ఆపరేషన్స్‌) పీవీ మునిశేఖర్‌, సీపీఎం కృష్ణకాంత్‌, సీఎంఈ రఘునాథరావు, సీటీఎం జీవన్‌ ప్రసాద్‌ తదితరులు పాల్గొన్నారు.

ఏసీ స్లీపర్‌ బస్సు ప్రత్యేకతలు

• 12 మీటర్ల పొడవుండే ఏసీ స్లీపర్‌ బస్సులో లోయర్‌15, అప్పర్‌ 15 కలిపి మొత్తం 30 బెర్తుల సామర్థ్యం ఉంది.
• బెర్తు వద్దే వాటర్‌ బాటిల్‌ బాక్స్‌, మొబైల్‌ చార్జింగ్‌ సౌకర్యం, రీడింగ్‌ ల్యాంప్‌లు ఉంటాయి.
• వెహికిల్‌ ట్రాకింగ్‌ సిస్టంతో పాటు.. పానిక్‌ బటన్‌ సదుపాయం కల్పించారు. అది ఆర్టీసీ కంట్రోల్‌ రూముకు అనుసంధానమై ఉంటుంది.
• వైఫై సదుపాయంతో రెండు సీసీ టీవీ కెమెరాలు ఉంటాయి.
• మరమ్మతుకు వీలుగా రివర్స్‌ పారింగ్‌ అసిస్టెన్స్‌ కెమెరా ఉంటుంది.
• బస్సుకు ముందు వెనక ఎల్‌ఈడీ బోర్డులుంటాయి. వాటిలో గమ్యస్థానాల వివరాలు కనిసిప్తాయి.
• అగ్ని ప్రమాదాలను ముందుగానే గుర్తించి నివారించేందుకు బస్సుల్లో ఫైర్‌ డిటెక్షన్‌ సప్రెషన్‌ సిస్టం (ఎఫ్‌డీఎస్‌ఎస్‌) ఉంటుంది.
• ప్రయాణికులకు సమాచారం చేరవేసేందుకు వీలుగా పబ్లిక్‌ అడ్రస్‌ సిస్టం ఉంటుంది.