TSPSC Paper Leak | మున్నాభాయ్‌ ఎంబీబీఎస్‌ స్ఫూర్తితో.. టీఎస్‌పీఎస్సీ పరీక్ష పత్రాల లీక్‌

టీఎస్‌పీఎస్సీ పరీక్ష పత్రాల లీకేజీపై సిట్‌ జరుపుతున్న దర్యాపులో సంచలన విషయాలు బయటపడ్డాయి. ఈ పరీక్షల్లో హైటెక్‌ మాస్‌ కాపీయింగ్‌ నిర్వహించిన పెద్దపల్లి ఇరిగేషన్‌ ఏఈ పూల రమేశ్‌.. తన దందాకు ‘మున్నాభాయ్‌ ఎంబీబీఎస్‌' చిత్రాన్ని స్ఫూర్తిగా తీసుకున్నట్టు తేలింది.

• పేపర్‌ లీకేజీ ముఠా హైటెక్కులు
• బ్లూటూత్‌లు, రిసీవర్లు, ట్రాన్స్‌మీటర్లతో దందా
• 10 కోట్ల లక్ష్యం.. 1.1 కోట్లు వసూళ్లు

TSPSC Paper Leak | హైదరాబాద్‌ సిటీబ్యూరో, మే 31 (నమస్తే తెలంగాణ): టీఎస్‌పీఎస్సీ పరీక్ష పత్రాల లీకేజీపై సిట్‌ జరుపుతున్న దర్యాపులో సంచలన విషయాలు బయటపడ్డాయి. ఈ పరీక్షల్లో హైటెక్‌ మాస్‌ కాపీయింగ్‌ నిర్వహించిన పెద్దపల్లి ఇరిగేషన్‌ ఏఈ పూల రమేశ్‌.. తన దందాకు ‘మున్నాభాయ్‌ ఎంబీబీఎస్‌’ చిత్రాన్ని స్ఫూర్తిగా తీసుకున్నట్టు తేలింది. తద్వారా రూ.10 కోట్లు సంపాదించాలని లక్ష్యంగా పెట్టుకున్న ఆయన.. అందులో రూ.1.1 కోట్ల వరకు రాబట్టినట్టు వెలుగులోకి వచ్చింది. దీంతో నిందితుడిని బుధవారం కోర్టులో హాజరుపరచడంతో న్యాయమూర్తి రిమాండ్‌ విధించారు. రిమాండ్‌ రిపోర్టులో పోలీసులు కీలక అంశాలను పేర్కొన్నారు.

ఆ వివరాలు ఇవీ..

• మాస్‌ కాపీయింగ్‌ ద్వారా ఏడుగురితో ఏఈఈ, డీఏవో పరీక్షలు రాయించేందుకు సిద్ధమైన రమేశ్‌.. అందుకు ప్రతిఫలంగా ఒక్కో అభ్యర్థి నుంచి రూ.20 లక్షల నుంచి రూ.30 లక్షల వరకు పొందేలా ఒప్పందం కుదుర్చుకున్నాడు.
• గతంలో రమేశ్‌కు ప్రమాదం జరిగింది. దవాఖానలో చికిత్స పొందుతుండగా.. డాక్టర్‌ ద్వారా టీఎస్‌పీఎస్సీ ఉద్యోగి సురేశ్‌ పరిచయమయ్యాడు. ఆపై ఇద్దరూ స్నేహితులుగా మారడంతో హైదరాబాద్‌లోని సైదాబాద్‌ ప్రాం తంలో రమేశ్‌ ఇంట్లో అద్దెకు దిగిన సురేశ్‌.. ఆ తర్వాత టీఎస్‌పీఎస్సీలో ఉద్యోగం మానేశాడు.
• అప్పటికే టీఎస్‌పీఎస్సీలో తన సహోద్యోగులైన ప్రవీణ్‌, రాజశేఖర్‌రెడ్డితో స్నేహాన్ని కొనసాగించిన సురేశ్‌.. లీకైన పేపర్లను రమేశ్‌కు అందించాడు. వాటిలో ఏఈ ప్రశ్నాపత్రాన్ని రమేశ్‌ 30 మందికి విక్రయించాడు. తద్వారా వచ్చిన సొమ్మును చెరి సగం పంచుకోవాలని సురేశ్‌ భావించినప్పటికీ రమేశ్‌ అంగీకరించలేదు. దీంతో ఆయనకు 70% వాటా ఇచ్చి, మిగిలిన 30 శాతాన్ని తాను తీసుకునేందుకు సురేశ్‌ ఒప్పుకున్నాడు.
• మాస్‌కాపీయింగ్‌తో అభ్యర్ధులకు ర్యాంకులు తెప్పించేందుకు కొత్త పథకం వేసిన రమేశ్‌.. అందుకు ‘మున్నాభాయ్‌ ఎంబీబీఎస్‌’ సినిమాను ఆదర్శంగా తీసుకున్నాడు.మాస్‌కాపీయింగ్‌ కోసం బ్లూటూత్‌ డివైజ్‌, సిమ్‌కార్డు ఆధారంగా పనిచేసే చిన్న సైజు రిసీవర్‌, ట్రాన్స్‌మిట్టర్‌ కొనుగోలు చేశాడు.
• పరీక్షకు హాజరైనప్పుడు కచ్చితంగా ఇన్‌షర్ట్‌ చేసుకోవాలని ఆ ఏడుగురు అభ్యర్థులకు సూచించిన రమేశ్‌.. బ్లూటూత్‌ డివైజ్‌లను వారి చెవిలో, రిసీవర్‌లను వారి చొక్కా కింది భాగంలో ప్రత్యేకంగా కుట్టించిన జేబులో అమర్చి, తనిఖీల్లో ఎవరికీ దొరక్కుండా చేశాడు.
• పరీక్ష మొదలవగానే సదరు సెంటర్‌ నిర్వాహకుడు ఆ పరీక్షకు రానివారి అన్ని సిరీస్‌ల ప్రశ్నాపత్రాలను ఫొటో తీసి రమేశ్‌కు పంపాడు. వాటిలోని ప్రశ్నలకు సమాధానాలు చెప్పేందుకు రమేశ్‌ అప్పటికే ఓ టెక్‌ బృందాన్ని ఏర్పాటు చేశాడు. బృందంలోని సభ్యులు చాట్‌ జీపీటీలోకి వెళ్లి సమాధానాలు సిద్ధం చేశారు. ఆపై వాటిని తమ వద్ద ఉన్న ట్రాన్స్‌మిట్టర్‌ ద్వారా ఆ ఏడుగురు అభ్యర్థులకు చెప్పారు.