దివ్యాంగుల విద్యకు అండ

కొత్తరకం వైకల్యాలతో బాధపడుతున్న విద్యార్థులకు ప్రభుత్వం వార్షిక పరీక్షల్లో పలురకాల మినహాయింపులను ఇచ్చింది.

• 8 క్యాటగిరీల విద్యార్థులకు వార్షిక పరీక్షల్లో సడలింపులు
• మానసిక దివ్యాంగుల పాస్‌మార్కులు 10కి కుదింపు
• కుష్టు వ్యాధిగ్రస్థులు, మరుగుజ్జులకు 20 మార్కులకు తగ్గింపు

హైదరాబాద్‌, నవంబర్‌ 7 (నమస్తే తెలంగాణ): కొత్తరకం వైకల్యాలతో బాధపడుతున్న విద్యార్థులకు ప్రభుత్వం వార్షిక పరీక్షల్లో పలురకాల మినహాయింపులను ఇచ్చింది. ఆరు నుంచి పదో తరగతి వరకు ఉన్న 8 క్యాటగిరీల్లోని విద్యార్థులకు పలు మినహాయింపులిస్తూ విద్యాశాఖ కార్యదర్శి వాకాటి కరుణ సోమవారం ఉత్తర్వులు జారీచేశారు. వీరిలో కొందరికి పాస్‌ మార్కులు 35 నుంచి 10కి, మరికొందరికి 20కి కుదించారు. స్ర్కైబ్‌ (సహాయకులను)ను వినియోగించుకొనే అవకాశం ఇవ్వడంతోపాటు క్యాటగిరీని బట్టి సబ్జెక్టు మినహాయింపు (భాషలు)ను సైతం వర్తింపజేశారు. 2022 -23 విద్యాసంవత్సరం నుంచి ఇవి వర్తిస్తాయని, రాబోయే పదో తరగతి పరీక్షల్లోనూ వీటిని వర్తింపజేయాలని ఉత్తర్వుల్లో పేర్కొన్నారు.

సడలింపులు ఇవి..

• కుష్టు, సెరెబ్రల్‌, పాల్సీ, మరుగుజ్జులు, కండరాల క్షీణత, యాసిడ్‌దాడి బాధితులకు పాస్‌ మార్కులను 35 నుంచి 20కి తగ్గించారు. వీరు కాలిక్యులేటర్లు, కంప్యూటర్ల సహాయం తీసుకోవచ్చు. ఒక సబ్జెక్టు నుంచి మినహాయింపు పొందవచ్చు. అవసరమైతే దవాఖానలోను పరీక్ష రాసే అవకాశం కల్పిస్తారు.
• మానసిక వైకల్యం గల వారి పాస్‌ మార్కులను 35 నుంచి 10కి కుదించారు. 3 భాషల్లో ఏదేని ఒక భాషా పరీక్ష పరీక్షరాస్తే సరిపోతుంది.
• ఆటిజం స్పెక్ట్రమ్‌ డిజార్డర్‌బారిన పడ్డవారికి పాస్‌ మార్కులను 35 నుంచి 10కి తగ్గించారు. వీరికి కూడా 3 భాషల్లో రెండింటికి మినహాయింపునిచ్చారు. గ్రాఫ్‌లు, జామెట్రీ, మ్యాప్‌లు, వ్యాకరణ సంబంధ అంశాలను పరిగణనలోకి తీసుకోకుండా ముల్యాంకనం చేస్తారు.
• డిస్‌లెక్సియా, డిస్‌గ్రాఫియా, డిస్‌క్యాలిక్యులియా, డిస్‌ప్రాక్సియా, ఆఫేసియా వంటి అభ్యసనలోపాలతో బాధపడుతునప్నవారికి మూడు భాషల్లో రెండింటి నుంచి మినహాయింపునివ్వగా, పాస్‌ మార్కులు 35 నుంచి 20కి కుదించారు. వీరికి అవసరమైన సామాగ్రిని సమకూరుస్తారు.
• భాష, ఉచ్చారణ సంబంధ వైకల్యం గల వారి జవాబుపత్రాలను ఈ విభాగంలో శిక్షణపొందిన ఉపాధ్యాయులు మాత్రమే ముల్యాంకనం చేస్తారు.
• తీవ్ర చెవుడు గల వారికి చేతి సైగలతో అన్వయం చేసేవారు (ఇంటర్‌ప్రిటర్‌) సహకరిస్తారు. పరీక్ష సమయంలో వినికిడి ఉపకరణాలను సైతం ఉపయోగించుకోవచ్చు.