Visit:
పరిశ్రమల భూముల అమ్మకం గుట్టురట్టు కావడంతో ప్రభుత్వం కంగుతిన్నదా? తాము చేసిన అవినీతి దందాకు ‘సబ్‌ కమిటీ’ ముసుగు తొడగడానికి చేసిన ప్రయత్నం విఫలం అయ్యిందని భావిస్తున్నదా? ఈ చట్టవిరుద్ధమైన దందాకు చట్టబద్ధత కల్పించేందుకు కొత్త ఎత్తులు మొదలుపెట్టిందా?
అవుననే అంటున్నాయి అధికార వర్గాలు. ఈ విషయంలో ప్రభుత్వం మరికొన్ని కీలక నిర్ణయాలు తీసుకునే అవకాశం ఉన్నదని పరిశ్రమల శాఖ వర్గాలు సంకేతాలు ఇచ్చాయి.
తద్వారా రూ.5 లక్షల కోట్ల భూ కుంభకోణానికి మసిపూసి మారేడు కాయ చేసే ప్రయత్నాలు చేస్తున్నట్టు చర్చ జరుగుతున్నది. జీవో-27కు అనుబంధంగా రెండు కొత్త జీవోలు ఇవ్వాలని, అధికారుల కమిటీని వేయాలని నిర్ణయించినట్టు తెలిసింది.
హైదరాబాద్‌, నవంబర్‌ 30 (నమస్తే తెలంగాణ): హిల్ట్‌ పాలసీ పేరుతో రూ.లక్షల కోట్ల విలువైన భూములను అగ్గువకు కట్టబెట్టే ప్రయత్నంపై మంత్రులు, అధికారుల నుంచి వచ్చిన వ్యతిరేకతను తప్పించుకోవడానికి ప్రభుత్వం కొన్ని కమిటీలు వేసి డైవర్షన్‌ చేయాలని చూస్తున్నట్టు తెలిసింది. హిల్ట్‌ పాలసీపై గతంలో విడుదల చేసిన జీవో- 27 రాష్ట్ర ప్రభుత్వ విధానపరమైన ప్రకటన మాత్రమేనని బుకాయించాలని చూస్తున్నట్టు తెలిసింది. శాస్త్రీయమైన కసరత్తు చేసి, నియమ నిబంధనలు రూపొందించి, మార్గదర్శకాలు సిద్ధంచేసేందుకు ప్రత్యేకంగా ‘అధికారుల కమిటీ’ వేయాలని నిర్ణయించినట్టు విశ్వసనీయంగా తెలిసింది.
భాగస్వామ్య శాఖల నుంచి నిపుణులను ఈ కమిటీలో సభ్యులుగా తీసుకుంటారని ప్రచారం జరుగుతున్నది. కమిటీ ఏర్పాటుచేస్తూ హిల్ట్‌ పాలసీ జీవోకు అనుబంధంగా త్వరలో కొత్త జీవో విడుదలచేయాలని ముఖ్యాధికారి నిర్ణయించినట్టు సమాచారం. గత జీవోలో పొందుపరుచని ‘వనరుల సమీకరణ ఉపసంఘం సిఫారసులకు అనుగుణంగా’ అనే పదాన్ని ఇందులో కచ్చితంగా చేర్చాలని ఆదేశించినట్టు తెలిసింది.
అధికారుల కమిటీకి అధ్యయనం కోసం వారం రోజుల గడువు ఇచ్చి, మమ అనిపించాలని, తమకు అనుకూలంగా నివేదిక తెప్పించుకోవాలని భావిస్తున్నట్టు గుసగుసలు వినిపిస్తున్నాయి. ఆ తర్వాత కమిటీ నివేదికను అడ్డంపెట్టుకొని మార్గదర్శకాలను ఖరారు చేస్తూ, అంతిమంగా ఇంప్లిమెంటేషన్‌ జీవో విడుదల చేయాలని సంబంధిత శాఖకు ఇప్పటికే దిశానిర్దేశం చేసినట్టు గుసగుసలు వినిపిస్తున్నాయి. ఇద్దరు ఎస్‌వో స్థాయి అధికారులు ఈ జీవోల రూపకల్పనపై ఇప్పటికే కసరత్తు పూర్తి చేసినట్టు సచివాలయ వర్గాల్లో చర్చ జరుగుతున్నది.
‘సాధారణంగా ప్రభుత్వం ఏదైనా ఒక కొత్త నిర్ణయాన్నో, కొత్త పాలసీనో ప్రకటించాలనుకుంటే ముందు అనుబంధ శాఖల అధికారులతో శాస్త్రీయ కసరత్తు చేస్తుంది. కమిటీలు ఏర్పాటు చేసి, సంబంధిత స్టేక్‌ హోల్డర్లతో చర్చలు జరుపుతుంది. అనంతరం నియమ నిబంధనలు రూపొందిస్తుంది. కానీ హిల్ట్‌ పాలసీ విషయంలో మాత్రం పూర్తిగా విరుద్ధంగా జరుగుతున్నది. పాలసీ ప్రకటించిన తర్వాత కమిటీ వేయడం, చర్చలు జరపడం ఈ ప్రభుత్వంలోనే చూస్తున్నా’ అని ఓ అధికారి వ్యాఖ్యానించారు. పాలసీని జీవోల రూపంలో ఇవ్వరని, కేవలం ఆవిష్కరిస్తారని చెప్తున్నారు. ఆ తర్వాత దాని అమలు, విధివిధానాలను జీవోల రూపంలో ఇస్తారని చెప్తున్నారు.
కానీ, కాంగ్రెస్‌ ప్రభుత్వం మాత్రం పాలసీని జీవో రూపంలో ఇచ్చి, ఇప్పుడు విధివిధానాల పేరుతో మరో జీవో ఇస్తామని, కమిటీ వేస్తామని చెప్తున్నదని, ఇదంతా హాస్యాస్పదంగా ఉన్నదని బ్యూరోక్రాట్లు విస్మయం వ్యక్తంచేస్తున్నారు. ‘ముఖ్యనేతకు ఎవరు సలహాలు ఇస్తున్నారు? ఎందుకు ఇలాంటి గందరగోళ నిర్ణయాలు తీసుకుంటున్నారు?’ అనే చర్చ జరుగుతున్నది. విధాన ప్రకటన చేసే ముందే కూలంకశంగా చర్చలు జరుపుతారు, అంతేగానీ విధాన ప్రకటన చేసిన తర్వాత చర్చలు జరపడానికి ఏముంటుంది? అని ప్రశ్నిస్తున్నారు.
భూముల క్రమబద్ధీకరణకు సంబంధించి రాష్ట్ర ప్రభుత్వం ఈ నెల 22న విడుదలచేసిన జీవో-27లోనే పూర్తి షెడ్యూల్‌ ప్రకటించారు. విధివిధానాలను సైతం పొందుపరిచారు. దరఖాస్తుల ప్రాథమిక పరిశీలన తర్వాత టీజీఐఐసీ వీసీ అండ్‌ ఎండీ, హెచ్‌ఎండీఏ మెట్రోపాలిటన్‌ కమిషనర్‌, పరిశ్రమల శాఖ ప్రత్యేక ప్రధాన కార్యదర్శి తదితరులతో కూడిన కమిటీ పరిశీలించి, 7 రోజుల్లోపు దరఖాస్తులను ఆమోదిస్తుందని పేర్కొన్నారు. దరఖాస్తు సమయంలోనే మొత్తం రుసుములో 20% చెల్లించాలని, ఆన్‌లైన్‌ దరఖాస్తు అందిన తర్వాత అధికారులు 7 రోజుల్లోపు ప్రాథమిక పరిశీలనను పూర్తిచేస్తారని ఉత్తర్వుల్లో స్పష్టంచేశారని గుర్తుచేస్తున్నారు. దరఖాస్తుల దాఖలు, పరిశీలన, ఆమోదం, డెవలప్‌మెంట్‌ ఇంపాక్ట్‌ ఫీజు వసూలు వంటి ప్రక్రియ అంతా కేవలం 45 రోజుల్లో పూర్తి చేస్తామని పేర్కొన్నదని వివరిస్తున్నారు. ఇంత స్పష్టంగా డేట్లు, డెడ్‌లైన్లు పెట్టిన తర్వాత ఇప్పుడు కొత్తగా గైడ్‌లైన్స్‌ ఏముంటాయని ప్రశ్నిస్తున్నారు. అసలు ఆఫీసర్స్‌ కమిటీకి అవకాశం ఎక్కడ ఉన్నదని వారు నిలదీస్తున్నారు.
కొత్తగా అధికారుల కమిటీని వేయడాన్ని బట్టి హిల్ట్‌ పాలసీ తయారీకి ముందు ఏమాత్రం శాస్త్రీయ కసరత్తు జరగలేదని, భాగస్వామ్య శాఖలైన హెచ్‌ఎండీఏ, డీఐసీ (డిస్ట్రిక్ట్‌ ఇండస్ట్రియల్‌ సెంటర్‌), పురపాలక శాఖ, రెవెన్యూ, ఆర్థిక, లాండ్‌ సర్వే తదితర విభాగాలతో కనీసం సంప్రదింపులు కూడా జరపలేదన్న ఆరోపణలను ప్రభుత్వం ఒప్పుకున్నట్టేనా? అని నిపుణులు ప్రశ్నిస్తున్నారు. పాలసీని హడావుడిగా రూపొందించడం, ఆ వెంటనే ఆమోదించడం, ఉత్తర్వులు ఇవ్వడం వెనుక భారీ కుంభకోణం దాగుందన్న ఆరోపణలకు ప్రభుత్వ చర్యలు బలాన్ని చేకూరుస్తున్నాయని చెప్తున్నారు. లోపాల పుట్టగా తయారైన హిల్ట్‌ పాలసీ మంచిదని చెప్పుకోవడానికే ప్రభుత్వం ఈ ఎత్తులు వేస్తున్నదని, ఈ క్రమంలో తప్పుల మీద తప్పులు చేస్తున్నదని విశ్లేషిస్తున్నారు.
