రెండేండ్లు ఎక్కువ బతుకుతరు

రాష్ట్ర ప్రజల ఆయుర్దాయం క్రమంగా పెరుగుతున్నట్టు నేషనల్‌ హెల్త్‌ ప్రొఫైల్‌ వెల్లడించింది. మరో పదేండ్ల తర్వాత సగటు ఆయుష్షు రెండేండ్లు పెరుగుతుందని ఇటీవల విడుదల చేసిన తాజా నివేదికలో

2031-35 నాటికి పెరుగనున్న ఆయుర్దాయం
బాలుర కంటే బాలికల ఆయుష్షు 4 ఏండ్లు ఎక్కువ
నేషనల్‌ హెల్త్‌ ప్రొఫైల్‌ తాజా నివేదికలో వెల్లడి

హైదరాబాద్‌, ఏప్రిల్‌ 17 (నమస్తే తెలంగాణ): రాష్ట్ర ప్రజల ఆయుర్దాయం క్రమంగా పెరుగుతున్నట్టు నేషనల్‌ హెల్త్‌ ప్రొఫైల్‌ వెల్లడించింది. మరో పదేండ్ల తర్వాత సగటు ఆయుష్షు రెండేండ్లు పెరుగుతుందని ఇటీవల విడుదల చేసిన తాజా నివేదికలో పేర్కొన్నది. పురుషుల కంటే మహిళలే ఎక్కువ కాలం జీవిస్తారని స్పష్టం చేసింది. అయితే ఈ లెక్కలు పదేండ్ల తర్వాత పుట్టినవారికి మాత్రమే వర్తిస్తాయని, 2031-35 మధ్య పుట్టినవారు సగటున 73.5 ఏండ్లు బతుకుతారని చెప్పింది.

నివేదిక వివరాలు

1. ప్రస్తుతం తెలంగాణలో 2021-25 మధ్య పుట్టినవారి సగటు ఆయుర్దాయం 71.6 సంవత్సరాలుగా ఉన్నది. వీరిలో మగ పిల్లలు సగటున 69.6 ఏండ్లు, ఆడ పిల్లలు 73.6 ఏండ్లు జీవిస్తారని తెలిపింది.
2. 2026-30 నాటికి సగటు ఆయుర్దాయం ఒక సంవత్సరం పెరిగి 72.6 ఏండ్లకు చేరుతుందని పేర్కొన్నది. బాలురు 70.6 ఏండ్లు, బాలికలు 74.6 ఏండ్లు బతుకుతారని అంచనా వేసింది.
3. 2031-35 నాటికి సగటు ఆయుర్దాయం మరో సంవత్సరం పెరిగి 73.5 ఏండ్లకు చేరుతుందని, ఆ ఐదేండ్లలో పుట్టిన మగ పిల్లలు సగటున 71.4 ఏండ్లు, ఆడపిల్లలు 75.6 ఏండ్లు బతుకుతారని తెలిపింది. మొత్తంగా బాలురతో పోల్చితే బాలికల సగటు ఆయుష్షు 4 ఏండ్లు ఎక్కువగా ఉంటుందని స్పష్టం చేసింది.
4. స్త్రీలతో పోల్చితే పురుషుల్లో మానసిక ఒత్తిడి ఎక్కువ. కలుషిత వాతావరణంలో ఎక్కువగా తిరుగుతుంటారు. మద్యం, సిగరెట్లు వంటి చెడు వ్యసనాలూ అధికంగా ఉంటాయి. వాహనాలను ఎక్కువగా నడుపుతుంటారు కాబట్టి ప్రమాదాలకు గురయ్యే అవకాశాలు ఎక్కువగా ఉంటాయి. ఇలాంటి కారణాల వల్ల పురుషుల సగటు ఆయుష్షు మహిళల కంటే కాస్త తక్కువగా ఉంటుందని నిపుణులు విశ్లేషిస్తున్నారు.