ఆర్థిక పురోభివృద్ధిలో యువతదే కీలకపాత్ర

2047 నాటికి 30 ట్రిలియన్‌ డాలర్ల స్థూల జాతీయోత్పత్తిగా ఎదగడానికి భారత్‌కు పుషల అవకాశాలు ఉన్నాయని రాష్ట్ర ఇంచార్జి గవర్నర్‌ సీపీ రాధాకృష్ణన్‌ అన్నారు.

• ఉద్యాన వర్సిటీ స్నాతకోత్సవంలో గవర్నర్‌ రాధాకృష్ణన్‌

ములుగు, హైదరాబాద్‌, జూన్‌ 11 (నమస్తే తెలంగాణ) : 2047 నాటికి 30 ట్రిలియన్‌ డాలర్ల స్థూల జాతీయోత్పత్తిగా ఎదగడానికి భారత్‌కు పుషల అవకాశాలు ఉన్నాయని రాష్ట్ర ఇంచార్జి గవర్నర్‌ సీపీ రాధాకృష్ణన్‌ అన్నారు. ఇది వికసిత్‌ భారత్‌ ద్వారా సాధ్యమవుతుందని, అందులో యువత ప్రముఖ పాత్ర పోషించాలని పేర్కొన్నారు.

సిద్దిపేట జిల్లా ములుగులో మంగళవారం కొండా లక్ష్మణ్‌ తెలంగాణ రాష్ట్ర ఉద్యాన విశ్వవిద్యాలయం మూడో స్నాతకోత్సవంలో ఆయన మాట్లాడుతూ.. విద్యార్థులు విజయమే ధ్యేయంగా ముందుకు సాగాలని కష్టాలు ఎదురైతే విరామం ఇవ్వచ్చు కానీ వెనక్కి చూడొద్దని గవర్నర్‌ పిలుపునిచ్చారు. బీఎస్సీ హానర్స్‌ హార్టికల్చర్‌లో అత్యధిక ఓజీపీఏ సాధించినందుకు 2023బ్యాచ్‌కు చెందిన ఆర్‌ వరలక్ష్మి మూడు బంగారు పతకాలు అందుకొన్నారు.

బీఎస్సీ హానర్స్‌ ఫారెస్ట్రీలో పీసీసీఎఫ్‌ గోల్డ్‌ మెడల్‌ను కే రవళి, డీన్స్‌ గోల్డ్‌ మెడల్‌ను కే ప్రత్యూష అందుకున్నారు. ఎమ్మెస్సీ హార్టికల్చర్‌ విభాగంలో ఎం మాళవిక మూడు గోల్డ్‌ మెడల్స్‌, పండ్ల శాస్త్ర విభాగంలో జీఎస్‌ దివ్య, పూల శాస్త్ర విభాగంలో పీ విద్యశ్రీ, ఔషధ, సుగంధ ద్రవ్య పంటల విభాగంలో పీ మహేశ్వరి గోల్డ్‌ మెడల్స్‌ అందుకొన్నారు. ఈ స్నాతకోత్సవంలో 156మందికి ఉద్యాన డిగ్రీ, 50మందికి ఫారెస్ట్‌ డిగ్రీ, 45మందికి ఉద్యాన పీజీ, 30 మందికి ఫారెస్ట్‌ పీజీ, మరో ఆరుగురికి పీహెచ్‌డీ డాక్టరేట్‌ పట్టాలు ప్రదానం చేశారు.