బడుల్లో బోధనోద్యమం

బడుల్లో ‘తొలిమెట్టు’ కార్యక్రమంపై పాఠశాల విద్యాశాఖ ప్రత్యేక ప్రణాళికలు రూపొందించింది. పిల్లలు సామర్థ్యాలు సాధించాలంటే..

• నేటి నుంచి పకడ్బందీగా తొలిమెట్టు
• 15 రోజుల పాటు బోధనపై ప్రత్యేక దృష్టి
• పిల్లల్లో మార్పు తేవటమే ముఖ్యం
• పాఠశాల విద్యాశాఖ ప్రత్యేక ప్రణాళికలు

హైదరాబాద్‌, అక్టోబర్‌ 14 (నమస్తే తెలంగాణ) : బడుల్లో ‘తొలిమెట్టు’ కార్యక్రమంపై పాఠశాల విద్యాశాఖ ప్రత్యేక ప్రణాళికలు రూపొందించింది. పిల్లలు సామర్థ్యాలు సాధించాలంటే.. తొలుత బోధనలో మార్పు లు రావాలని నిర్ణయించింది. అందుకు ఈ నెల 15 నుంచి బడుల్లో బోధన ఉద్యమాన్ని నిర్వహించనున్నారు. ప్రతి తరగతిలో సోపానాల క్రమంగా బోధించడం, బోధనోపకరణాలు ఉపయోగించడం, ఆటపాటలు, కృత్యాలతో బోధించి, సామర్థ్యాల సాధన చేపడుతారు.

తొలిమెట్టు అమలుపై ఇటీవలే ఉన్నతాధికారులు ఆసిఫాబాద్‌, నిర్మల్‌ తదితర జిల్లాలపై సమీక్షించారు. ఈ నెల 15 నుంచి 31 వరకు ప్రత్యేక దృష్టి కేంద్రీకరించి.. తొలిమెట్టును ఓ ఉద్యమంగా నిర్వహించాలని ప్రణాళికలు రూపొందించారు. ఈ 15రోజుల పాటు విద్యాసంబంధిత అంశాలు తప్ప మరే ఇతర కార్యక్రమాల జోలికెళ్లరాదని విద్యాశాఖ కార్యదర్శి వాకాటి కరుణ, పాఠశాల విద్యాశాఖ డైరెక్టర్‌ శ్రీదేవసేన, ఎస్సీఈఆర్టీ అధికారులు, కలెక్టర్లు, విద్యాశాఖ అధికారులంతా గట్టి నిర్ణయం తీసుకొన్నారు.

15 రోజుల ప్రణాళికలు

• సింగిల్‌ టీచర్‌ అయినా.. టీచర్లు ఇద్దరున్నా నిర్దేశిత టైమ్‌ టేబుల్‌ను విధిగా పాటించాల్సిందే.
• ఈ నెల 15 నుంచి 31 వరకు మండలంలోని ప్రతి స్కూల్‌ను అధికారులు పర్యవేక్షిస్తారు.
• 50శాతం స్కూళ్లను నోడల్‌ ఆఫీసర్‌ ద్వారా, మిగిలిన 50శాతం స్కూళ్లను క్లస్టర్‌ నోడల్‌ ఆఫీసర్స్‌ ద్వారా పర్యవేక్షణ జరుపుతారు. పరిశీలన అంటే భయానక వాతావరణంలో కాకుండా బోధనలో మార్పు తెచ్చేందుకు సహాయసహాకారాలు అందిస్తారు.
• తెలుగు, ఆంగ్లం, గణితం బోధనలోని వివిధ ప్రక్రియల అమలు తీరుతెన్నులను క్లాస్‌రూం అబ్జర్వేషన్‌ ద్వారా నిశితంగా పరిశీలిస్తారు. స్పాట్‌ అసెస్‌మెంట్‌ విధానంలో అక్కడికక్కడే మూల్యాంకనం చేస్తారు.
• యూనిట్‌ ప్రణాళిక, పాఠ్య ప్రణాళికలను తప్పనిసరిగా అమలుచేయాల్సిందే. వీటి ప్రకారమే అభ్యసన ప్రక్రియలు చేపడుతారు.
• చెప్పిన పాఠ్యాంశాల్లో 80శాతం పిల్లలు ఆశించిన సామర్థ్యాలను సాధిస్తేనే ఆ తర్వాతి పాఠానికి వెళ్తారు.
• ఈ రెండు వారాల్లో బోధనాభ్యసన ప్రక్రియలో మార్పు రావాల్సిందే. బోధన ఉపన్యాస పద్ధతిలో కాకుండా చర్చ(ఇంటరాక్టివ్‌)పద్ధతిలో బోధిస్తారు.
• లైబ్రరీ పీరియడ్‌ను అన్ని తరగతులకు ఒకేసారి కాకుండా తరగతి బోధనకు ఇబ్బందుల్లేకుండా నిర్వహిస్తారు.
• తొలిమెట్టు అమలుపై మండల స్థాయిలో ఈ నెల 27, 28న, జిల్లా స్థాయిలో 29న , రాష్ట్రస్థాయిలో 30న సమావేశాలు నిర్వహిస్తారు. బేస్‌లైన్‌ టెస్ట్‌ తర్వాత జరిగిన బోధనతో పిల్లల్లో వచ్చిన మార్పుపై సమీక్షిస్తారు.