Musi Project | ‘మెయిన్‌’ మలుపు ఆ భేటీయే.. బాబు- రేవంత్‌ సమావేశం తర్వాత కీలక పరిణామాలు?!

మూసీ సుందరీకరణ అంచనా వ్యయంలోనే కాదు, మాస్టర్‌ప్లాన్‌ తయారీ కన్సల్టెన్సీ ఎంపిక టెండర్లలోనూ భారీ గోల్‌మాల్‌ జరిగినట్టు ఆరోపణలు వెల్లువెత్తుతున్నాయి.

• లోక్‌సభ ఎన్నికలకు ముందే మూసీ ఆలోచన
• 58 వేల కోట్ల అంచనాతో టెండర్‌ కూడా జారీ
  బిడ్ల గడువు పూర్తి.. ఎల్‌-1 సాయి కన్సల్టెన్సీ
• మేలో ఏపీ ఎన్నికల్లో చంద్రబాబు విజయం
• జూలైలో తెలంగాణ సీఎం రేవంత్‌తో మీటింగ్‌
• తర్వాత 16 రోజులకే టెండర్ల రద్దుకు నిర్ణయం
• రెండోసారి టెండర్లలో ఎల్‌-1పై సాంకేతిక అనర్హత!
• కన్సల్టెన్సీ బాధ్యత మెయిన్‌హార్ట్‌కు అప్పగింత!

Musi Project | మూసీ ప్రాజెక్టు సింగపూర్‌ కంపెనీ మెయిన్‌హార్ట్‌కే ఎలా దక్కింది? ఎందుకు దక్కింది? దీని మూలాలు తవ్వినకొద్దీ ఆసక్తికర అంశాలు వెలుగులోకి వస్తున్నాయి. నిజానికి తెలంగాణకు చెందిన కన్సల్టెన్సీకి రావాల్సిన టెండరు, చంద్రబాబు- రేవంత్‌ మీటింగ్‌ తర్వాత అకస్మాత్తుగా రైద్దెనట్టు, తర్వాత మెయిన్‌హార్ట్‌ కంపెనీకి దక్కినట్టు ఆరోపణలు వినిపిస్తున్నాయి. ఆ కథాక్రమం ఇదిగో..

05.02.2024

మూసీ ప్రాజెక్టు మాస్టర్‌ప్లాన్‌ కోసం తొలి టెండరు నోటిఫికేషన్‌ జారీ అయింది. దీన్ని ఏడోతేదీ అప్‌లోడ్‌ చేసారు. బిడ్ల దాఖలుకు మార్చి 22ను గడువుగా పెట్టారు. గడువులోగా 10 కంపెనీలు ఆసక్తి వ్యక్తీకరణ (ఎక్స్‌ప్రెషన్‌ ఆఫ్‌ ఇంటరెస్ట్‌- ఈవోఐ) బిడ్లు దాఖలు చేశాయి. ఇందులో ఏడు కంపెనీలు సాంకేతిక అర్హత సాధించాయి. తర్వాత ఏప్రిల్‌ 10న రిక్వెస్ట్‌ ఫర్‌ ప్రపోజల్‌కు నోటిఫికేషన్‌ జారీ అయింది. 5 కంపెనీలే బిడ్లు దాఖలు చేశాయి.

24.06.2024

ఆర్‌ఎఫ్‌పీ బిడ్ల దాఖలు గడువు ముగిసింది. 5 కంపెనీల్లో తెలంగాణకు చెందిన సాయి కన్సల్టెన్సీ రూ.60 కోట్లతో ఎల్‌-1గా నిలవగా, ట్రాక్ట్‌బెల్‌ అనే కంపెనీ 75 కోట్లు కోట్‌ చేసి ఎల్‌-2గా నిలిచినట్టు తెలిసింది.

06.07.2024

ఏపీ సీఎం బాబు హైదరాబాద్‌కు వచ్చి తెలంగాణ ముఖ్యమంత్రి రేవంత్‌ రెడ్డితో సమావేశమయ్యారు. ఇరు రాష్ర్టాల మధ్య సమస్యల పరిష్కారం కోసమే ఈ సమావేశమనే ప్రకటన వెలువడింది.

20.07.2024

మూసీ ప్రాజెక్టు మీద టెండర్‌ ఎవాల్యుయేషన్‌ కమిటీ ఏర్పాటు చేస్తూ జీవో ఆర్టీ నం.325 జారీ అయింది. ఏర్పాటైన రెండు రోజులకే, జూలై 22న కమిటీ తొలి భేటీ జరిగింది. మూసీ టెండర్లను రద్దు చేయాలని అందులో నిర్ణయించారు. ఇది జరిగి రెండు రోజులు తిరక్క ముందే జూలై 24న మూసీ టెండర్ల రద్దు కోసం ఎమ్మార్‌డీసీఎల్‌ ఎండీ ప్రభుత్వానికి లేఖ రాశారు.

03.08.2024

మూసీ టెండర్లను రద్దు చేసి, తిరిగి నోటిఫికేషన్‌ ఇచ్చేందుకు రేవంత్‌ సర్కారు అనుమతినిచ్చింది. తర్వాత మూడు రోజులకే అంటే 6వ తేదీన పాత టెండర్లు రద్దు చేసినట్టు తెలిసింది.

09-08-2024

టెండర్‌ ఎవాల్యుయేషన్‌ కమిటీ మళ్లీ సమావేశమై కొత్త నోటిఫికేషన్‌కు నిర్ణయించింది. తర్వాత 5 రోజులకు అంటే ఆగస్టు 13న కొత్త నోటిఫికేషన్‌ జారీ అయింది.

12.09.2024

బిడ్లకు గడువు ముగిసింది. ఈసారి కేవలం రెండు కంపెనీలే బిడ్లు దాఖలు చేశాయి. ఇందులో ఒకటి మెయిన్‌హార్ట్‌ కాగా, మరొకటి లీ అసోసియేట్స్‌ అని సమాచారం. లీ అసోసియేట్స్‌ 141 కోట్లకు బిడ్‌ వేసి ఎల్‌-1గా నిలవగా, మెయిన్‌హార్ట్‌ 143 కోట్లతో ఎల్‌-2గా ఉన్నట్టు తెలిసింది.

20.09.2024

మూడోసారి టెండర్‌ ఎవాల్యుయేషన్‌ కమిటీ సమావేశం. ఎల్‌-1గా లీ అసోసియేట్స్‌ని సాంకేతిక కారణాలతో తిరస్కరించి, మెయిన్‌హార్ట్‌ కన్సార్షియంకు బాధ్యతలు అప్పగించాలని నిర్ణయం. తర్వాత పది రోజులకు (4న) ప్రభుత్వం దీన్ని ఆమోదిస్తూ ఉత్తర్వులు జారీ చేసింది.

సందేహాలివీ…

1. కాంగ్రెస్‌ మ్యానిఫెస్టోలోగానీ, ఎన్నికల ప్రచారంలో గానీ కాంగ్రెస్‌ అగ్రనేతల మాటల్లోగానీ ఎక్కడా ప్రస్తావనకు నోచుకోని మూసీ సుందరీకరణ ప్రాజెక్టు సరిగ్గా లోక్‌సభ ఎన్నికలకు ముందు ఎందుకు పురుడుపోసుకున్నది? ఎన్నికల ఫలితాల తర్వాత ఎందుకు అనూహ్య మార్పులు చోటుచేసుకున్నాయి.?
2. ఫిబ్రవరిలో ఇచ్చిన తొలి నోటిఫికేషన్‌లో రూ.58,775 కోట్లు (7 బిలియన్‌ అమెరికన్‌ డాలర్లు)గా పేర్కొన్న మూసీ ప్రాజెక్టు అంచనా వ్యయం తర్వాత మూడింతలు ఎందుకు పెరిగింది?
3. బాబు హైదరాబాద్‌ వచ్చి సమావేశమైన తర్వాత 15 రోజులు గడవక ముందే పాత టెండర్‌ నోటిఫికేషన్‌ ఎందుకు రైద్దెంది? అందులో ఎల్‌-1గా నిలిచిన తెలంగాణ కంపెనీ సాయి కన్సల్టింగ్‌ ఇంజనీరింగ్‌కు అవకాశం ఎందుకు దక్కలేదు?
4. రెండో టెండర్‌లోనూ ఎల్‌-1గా నిలిచిన లీ అసోసియేట్స్‌కు ప్రాజెక్టు ఇవ్వకుండా అడ్డుపడ్డ ‘సాంకేతిక కారణాలు’ ఏమిటి? మొదటి, రెండో టెండర్లు రెంటిలోనూ ఎల్‌-1గా నిలవకున్నా, కొందరు పెద్దలకు సన్నిహితమని పేరున్న మెయిన్‌హార్ట్‌కు ప్రాజెక్టు ఎలా దక్కింది?
5. తొలి టెండర్లలో సాంకేతికంగా ఫిట్‌ అయిన లీ అసోసియేట్స్‌, రెండో టెండర్‌లో ఎందుకు అన్‌-ఫిట్‌ అయ్యింది? మొదటి టెండర్లలో ఎల్‌-1గా లేని మెయిన్‌ హార్ట్‌ రెండో టెండర్లో ఎల్‌-1గా ఎలా వచ్చింది?

హైదరాబాద్‌ సిటీబ్యూరో ప్రధాన ప్రతినిధి, అక్టోబర్‌ 9 (నమస్తే తెలంగాణ): మూసీ సుందరీకరణ అంచనా వ్యయంలోనే కాదు, మాస్టర్‌ప్లాన్‌ తయారీ కన్సల్టెన్సీ ఎంపిక టెండర్లలోనూ భారీ గోల్‌మాల్‌ జరిగినట్టు ఆరోపణలు వెల్లువెత్తుతున్నాయి.

మొదటిసారి టెండర్‌ నోటిఫికేషన్‌ జారీచేసిన ఎంఆర్‌డీసీఎల్‌ అధికారులు ప్రైస్‌ బిడ్లను తెరిచి ఆర్నెల్ల తర్వాత వాటిని రద్దు చేయడం ఒకవంతైతే, కేవలం వారం వ్యవధిలోనే రెండోసారి టెండర్లు పిలిచి రెండు నెలల్లోపే మెయిన్‌హార్ట్‌కు పనుల అప్పగింత ప్రక్రియను అధికారికంగా పూర్తి చేయడం మరో వంతు. అంతేకాదు, రెండోసారి టెండర్లలో మెయిన్‌హార్ట్‌ కంపెనీ కంటే లీ అసోసియేట్స్‌ తక్కువ మొత్తానికి కోట్‌ చేసినప్పటికీ అధికారులు సాంకేతిక కారణాన్ని చూపి లీ అసోసియేట్స్‌ను ఎలిమినేట్‌ చేసినట్టు విశ్వసనీయం సమాచారం.

ప్రధానంగా సీఎం రేవంత్‌రెడ్డితో ఏపీ సీఎం చంద్రబాబునాయుడు అధికారికంగా భేటీ అయిన తర్వాతనే ఈ టెండర్ల ప్రక్రియలో కీలక పరిణామాలు చోటుచేసుకున్నాయనే ఆరోపణలు వినిపిస్తున్నాయి. మెయిన్‌హార్ట్‌కు మూసీ సుందరీకరణ బాధ్యతలు అప్పగించేందుకే టెండర్ల ప్రక్రియను అద్యంతం తామనుకున్నట్టు నడిపించారని తెలిపింది.

రోజుకో మలుపు

మూసీ సుందరీకరణ ప్రాజెక్టు వ్యవహారం రోజుకో మలుపు తిరుగుతున్నది. ఈ ప్రాజెక్టును నిర్వహించే మూసీ రివర్‌ఫ్రంట్‌ డెవలప్‌మెంట్‌ కార్పొరేషన్‌ లిమిటెడ్‌ (ఎంఆర్‌డీసీఎల్‌) అధికారులు ఆదిలో నిబంధనల ప్రకారమే టెండర్ల ప్రక్రియను నిర్వహించినప్పటికీ అనంతరం ‘సాంకేతిక కారణాలు’ అనే ముసుగు తొడిగి, నిబంధనలకు తిలోదకాలివ్వడం వెనక ‘పెద్దల’ జోక్యం ఉందనే విమర్శలు వినిపిస్తున్నాయి. కాంగ్రెస్‌ ప్రభుత్వం అధికారంలోకి వచ్చిన తర్వాత మూసీ సుందరీకరణ ప్రాజెక్టును రూ.50 వేల కోట్లతో చేపడుతున్నట్టు సీఎం రేవంత్‌రెడ్డి ప్రకటించారు.

ఈ క్రమంలో ఎంఆర్‌డీసీఎల్‌ అధికారులు ప్రాజెక్టు మాస్టర్‌ప్లాన్‌ రూపకల్పనకు కన్సల్టెన్సీ ఎంపికను చేపట్టారు. ఈ మేరకు ఎంఆర్‌డీసీఎల్‌ అధికారులు ఆసక్తి వ్యక్తీకరణ బిడ్ల కోసం ఈ ఏడాది ఫిబ్రవరి ఐదో తేదీన టెండర్‌ నోటీస్‌ (నెం.05/ఎస్‌ఈ(ఎంఆర్‌డీసీఎల్‌)/2023-24, తేదీ: 5.2.2024) జారీ చేశారు. ఇందుకుగాను పది కంపెనీలు ముందుకొచ్చి బిడ్లు దాఖలు చేశాయి. నిబంధనల ప్రకారం అధికారులు ప్రీ బిడ్‌ సమావేశాన్ని కూడా ఏర్పాటు చేశారు. బిడ్లు దాఖలు చేసిన వాటిలో నిబంధనల మేరకు ఏడు కన్సల్టెన్సీ కంపెనీలు సాంకేతిక అర్హత సాధించాయి. అనంతరం అధికారులు ఏప్రిల్‌ 10వ తేదీన ఆర్‌ఎఫ్‌పీ (రిక్వెస్ట్‌ ఫర్‌ ప్రపోజల్‌) నోటిఫికేషన్‌ జారీచేశారు.

ఇందులో బిడ్ల దాఖలును అదే రోజు ప్రారంభించి, చివరి తేదీని జూన్‌ 24గా నిర్ణయించారు. అయితే సాంకేతిక అర్హత సాధించిన ఏడు కంపెనీల్లో ఐదు కంపెనీలు మాత్రమే ఈ నోటిఫికేషన్‌కు స్పందించి, ఆర్‌ఎఫ్‌పీని సమర్పించాయి. అందులో లీ అసోసియేట్స్‌ సౌత్‌ ఏషియా ప్రైవేటు లిమిటెడ్‌, జురాంగ్‌ కన్సల్టెంట్స్‌ ఇండియా ప్రైవేటు లిమిటెడ్‌, ట్రాక్టబుల్‌ ఇంజినీరింగ్‌ ప్రైవేటు లిమిటెడ్‌, సాయి కన్సల్టెన్సీ ఇంజినీరింగ్‌ లిమిటెడ్‌, మెయిన్‌హార్ట్‌ సింగపూర్‌ ప్రైవేటు లిమిటెడ్‌ ఉన్నాయి.

ఈ నేపథ్యంలో అధికారులు ప్రైస్‌ బిడ్లను తెరవగా అందులో అతి తక్కువగా సాయి కన్సల్టెన్సీ కంపెనీ రూ.60 కోట్లకు కోట్‌ చేసి ఎల్‌-1గా నిలిచి, ఎల్‌-2గా ట్రాక్టబుల్‌ ఇంజినీరింగ్‌ ప్రైవేటు లిమిటెడ్‌ రూ.75 కోట్లను కోట్‌ చేసినట్టు తెలిసింది. దీంతో సాయి కన్సల్టెన్సీకి అధికారులు బాధ్యతను అప్పగించాలి. కానీ ఆతర్వాత సీన్‌ మారింది. సాంకేతిక కారణాలతో ఆర్‌ఎఫ్‌పీ టెండర్లను రద్దు చేస్తున్నట్టుగా ఎంఆర్‌డీసీఎల్‌ అధికారులు ఆగస్టు ఆరో తేదీన నిర్ణయం తీసుకున్నారు. అసలు ఆ సాంకేతిక కారణాలేమిటో? ఎందుకు రద్దు చేశారనేది అధికారులు వెల్లడించడం లేదు.

రెండోసారి నోటిఫికేషన్‌ జారీ

ఎంఆర్‌డీసీఎల్‌ అధికారులు మొదటిసారి ఆర్‌ఎఫ్‌పీ నోటిఫికేషన్‌ను రద్దుచేసిన వారం రోజుల్లోనే రెండో దఫా నోటిఫికేషన్‌ జారీచేశారు. ఆగస్టు 13న బిడ్ల దాఖలును మొదలుపెట్టిన అధికారులు చివరి తేదీని సెప్టెంబరు 12గా నిర్ణయించారు. అయితే ఈసారి మాత్రం కేవలం రెండు కన్సల్టెన్సీ కంపెనీలు మాత్రమే బిడ్లు దాఖలు చేసినట్టు తెలిసింది. ఇందులో లీ అసోసియేట్స్‌ ఒకటికాగా, రెండోది మెయిన్‌హార్ట్‌ సింగపూర్‌ ప్రైవేటు లిమిటెడ్‌. గతంలో ఏకంగా పది కంపెనీలు ఉత్సాహంగా ముందుకొచ్చిన పరిస్థితి నుంచి రెండోసారి కేవలం రెండు కంపెనీలు మాత్రమే బిడ్లు దాఖలు చేయడంపైనా సందేహాలు వ్యక్తమవుతున్నాయి.

రెండు కంపెనీలకు సంబంధించిన ప్రైస్‌ బిడ్లను తెరవగా అందులో లీ అసోసియేట్స్‌ రూ.141 కోట్లు కోట్‌ చేస్తే, మెయినహార్ట్‌ కన్సల్టెన్సీ రూ.143 కోట్లు కోట్‌ చేసినట్టు తెలిసింది. ఈ నేపథ్యంలో ఎంఆర్‌డీసీఎల్‌ అధికారులు లీ అసోసియేట్స్‌ను ఎల్‌-1గా నిర్ధారించి బాధ్యతలు అప్పగించాలి. కానీ, ఇక్కడే అసలు మతలబు చోటుచేసుకుందనే ఆరోపణలున్నాయి. తర్జనభర్జనల తర్వాత అధికారులు లీ అసోసియేట్స్‌ బిడ్‌ను సాంకేతిక కారణాలతో తిరస్కరించినట్టుగా సమాచారం. ఇక మిగిలింది మెయిన్‌హార్ట్‌ కావడంతో దాని బిడ్‌ను సుమారు రూ.141 కోట్లుగా నిర్ధారించి, ఎల్‌-1గా ఎంపిక చేసినట్టు తెలిసింది.

రేవంత్‌-బాబు భేటీ తర్వాతే..

ఎంఆర్‌డీసీఎల్‌ అధికారులు ఆదిలో నిబంధనల ప్రకారమే టెండర్ల ప్రక్రియను ముందుకు తీసుకుపోగా, తదుపరి ఎందుకు ఇంత గందరగోళానికి తావిచ్చారనే దానిపై తీవ్రస్థాయిలో ఆరోపణలు వినిపిస్తున్నాయి. అమరావతి గ్రాఫిక్స్‌ సృష్టికర్త సింగపూర్‌ మాజీ మంత్రి ఈశ్వరన్‌తో సంబంధాలున్న మెయిన్‌హార్ట్‌కు మూసీ మాస్టర్‌ప్లాన్‌ బాధ్యతలు అప్పగించేందుకు తెర వెనక పెద్ద వ్యక్తులే పావులు కదిపారనే ప్రచారం జరుగుతున్నది. రేవంత్‌, చంద్రబాబు భేటీ తర్వాతే ఇందులో కీలక పరిణామాలు చోటుచేసుకున్నాయనే ప్రచారమూ పెద్దఎత్తున జరుగుతున్నది.

అంచనా వ్యయం రూ.58 వేల కోట్లే!

వాస్తవానికి మూసీ సుందరీకరణ అంచనా వ్యయం రూ.58వేల కోట్లే. ఇదే విషయాన్ని ఎంఆర్‌డీసీఎల్‌ అధికారులు ఈ ఏడాది ఫిబ్రవరిలో జారీచేసిన టెండరు నోటీసు డాక్యుమెంట్లలో స్పష్టంగా పొందుపరిచారు. 31 పేజీల డాక్యుమెంట్లలో 13వ పేజీలో మూసీ రివర్‌ఫ్రంట్‌ ప్రాజెక్టు వ్యయం ఏడు బిలియన్‌ అమెరికా డాలర్లు (సుమారు రూ.58,775.22 కోట్లు) ఉంటుందని అంచనా వేస్తున్నట్టుగా పేర్కొన్నారు. అందుకే సీఎం రేవంత్‌రెడ్డి కూడా పలుసార్లు రూ.50వేల కోట్లతో మూసీ సుందరీకరణ చేపడతామని ప్రకటించారు. కానీ, మెయిన్‌హార్ట్‌ రంగ ప్రవేశం తర్వాత అమాంతంగా అది లక్షన్నర కోట్లకు ఎగబాకింది. సీఎం నోటి నుంచి ప్రకటన రూపంలో రావడం మొదలైంది. అయితే, తొలిసారి లక్షన్నర కోట్ల వ్యయాన్ని ప్రకటించిన ముఖ్యమంత్రి… పెద్ద ఎత్తున విమర్శలు రావడంతో కేవలం మూసీ సుందరీకరణ కోసమే కాదు, ఐదేండ్లలో హైదరాబాద్‌ అభివృద్ధి కోసమని అన్నారు.

ఎప్పుడు.. ఏం జరిగింది?

• 06.02.2024న మెయిన్‌హార్ట్‌ ప్రతినిధుల బృందం సీఎం రేవంత్‌ను కలిసింది.
• మే నెల చివరలో మెయిన్‌హార్ట్‌ కన్సల్టెన్సీ కంపెనీ లక్షన్నర కోట్ల అంచనా వ్యయంతో ప్రభుత్వానికి ప్రతిపాదనలు సమర్పించినట్టు తెలిసింది.
• ఈ క్రమంలో మొదటిసారి టెండర్ల ప్రకారం ఆర్‌ఎఫ్‌పీ బిడ్ల దాఖలు 24.6.2024న ముగిసింది. దీని ప్రకారం ఎంఆర్‌డీసీఎల్‌ అధికారులు ప్రైస్‌ బిడ్లను తెరవగా, ఎల్‌-1గా సాయి కన్సల్టెన్సీ నిలిచింది. అధికారులు ఈ మేరకు నిర్ణయం తీసుకొని ఎంపిక ప్రక్రియకు ఆమోదం కోసం ప్రభుత్వానికి పంపాలి. మరి అధికారులు పంపారో, లేదో తెలియదుగానీ సాయి కన్సల్టెన్సీని ఎంపిక చేసినట్టుగా మాత్రం ప్రకటించలేదు.
• నగరంలోని ప్రజాభవన్‌లో 6.7.2024న రెం డు రాష్ర్టాల ముఖ్యమంత్రులు భేటీ అయ్యారు.
• అనంతరం కొన్నిరోజుల పాటు టెండర్ల ప్రక్రియపై స్తబ్దత నెలకొంది. తిరిగి ప్రభుత్వం హుటాహుటిన 20.7.2024న జీవో ఆర్టీ నంబరు 325 జారీచేసింది. మూసీ మాస్టర్‌ప్లాన్‌కు సంబంధించి కన్సల్టెన్సీ ఎంపిక కోసం చేపట్టే ఆర్‌పీఎఫ్‌ టెండర్ల పరిశీలనకు సాంకేతిక కమిటీని ఏర్పాటు చేసింది. ఇందులో పబ్లిక్‌ హెల్త్‌ ఈఎన్‌సీ ఛైర్మన్‌గా, పురపాలక శాఖలోని ఏడు విభాగాలకు చెందిన ఇంజినీర్లు సభ్యులుగా నియమించింది.
• ఈ కమిటీ 22.7.2024న భేటీ అయింది. సాయి కన్సల్టెన్సీ ఎంపికైన ఆర్‌పీఎఫ్‌ టెండర్ల ప్రక్రియను రద్దు చేస్తున్నట్టుగా నిర్ణయించింది.
• కమిటీ నిర్ణయానికి అనుగుణంగా ఎంఆర్‌డీసీఎల్‌ మేనేజింగ్‌ డైరెక్టర్‌ 24.7.2024న టెండర్ల రద్దు కోసం ప్రభుత్వానికి లేఖ రాశారు.
• ఎండీ లేఖను పరిశీలించిన ప్రభుత్వం తిరిగి మరోసారి ఆర్‌పీఎఫ్‌ టెండర్‌ నోటీసు జారీచేసేందుకు ఎంఆర్‌డీసీఎల్‌కు అనుమతినిస్తూ 3.8.2024న జీవో ఆర్టీ నంబరు 343 జారీచేసింది. టెండరు ఎవాల్యుయేషన్‌ కమిటీ హైదరాబాద్‌ మెట్రో రైలు అధికారుల అభిప్రాయా లు తీసుకొని టెండరు నోటీస్‌ (ఆర్‌ఎఫ్‌పీ)లో మార్పులు చేసి, కొత్తగా టెండరు నోటీసు జారీచేసేందుకు అనుమతినిస్తున్నట్టు పేర్కొన్నారు.
• అనంతరం 6.8.2024న తొలుత జారీచేసిన ఆర్‌ఎఫ్‌పీ టెండరు నోటీసును రద్దు చేస్తూ ఎంఆర్‌డీసీఎల్‌ నిర్ణయం తీసుకున్నట్టు తెలిసింది.
• టెండరు ఎవాల్యుయేషన్‌ కమిటీ 9.8.2024న మరోసారి భేటీ అయి కొత్త టెండరు నోటీసు జారీకి నిర్ణయించింది.
• 13.8.2024న రెండోసారి జారీచేసిన ఆర్‌ఎఫ్‌పీ టెండరు నోటీసులకు అనుగుణంగా బిడ్లను తీసుకోవడం ప్రారంభించారు.
• బిడ్ల దాఖలుకు 12.9.2024న చివరి తేదీగా నిర్ణయించారు.
• 20.9.2024న మూడోసారి టెండరు ఎవాల్యుయేషన్‌ కమిటీ భేటీ అయింది. మెయిన్‌హార్ట్‌ సింగపూర్‌ ప్రైవేటు లిమిటెడ్‌ కన్సార్షియంకు మూసీ మాస్టర్‌ప్లాన్‌ బాధ్యతల అప్పగింతకు నిర్ణయించింది.
• మెయిన్‌హార్ట్‌ కన్సార్షియం సింగపూర్‌ ప్రైవేటు లిమిటెడ్‌కు మూసీ మాస్టర్‌ప్లాన్‌ బాధ్యతల అప్పగింత ప్రతిపాదనలను ఆమోదించాల్సిందిగా ఎంఆర్‌డీసీఎల్‌ ఎండీ 25.9.2024న ప్రభుత్వానికి లేఖ రాశారు.
• మెయిన్‌హార్ట్‌ కన్సార్షియంకు బాధ్యతలు అప్పగించేందుకు ఆమోదం తెలుపుతూ ప్రభుత్వం 4.10.2024న ఉత్తర్వులు జారీచేసింది.
• మరుసటి రోజే అంటే 5.10.2024న ఎంఆర్‌డీసీఎల్‌ చీఫ్‌ ఇంజినీర్‌ మెయిన్‌హార్ట్‌ కన్సార్షియంకు ఎల్‌వోఏను జారీచేశారు. ఏడో తేదీన అవుట్‌వార్డులో నమోదు కాగా, 8న ఎల్‌వోఏ ప్రతులు మెయిన్‌హార్ట్‌కు చేరాయి.