Visit:
నమస్తే తెలంగాణ నెట్‌వర్క్‌, నవంబర్‌ 30: స్థానిక సంస్థల ఎన్నికల్లో భాగంగా పలుచోట్ల సర్పంచ్‌లు, వార్డు సభ్యులు ఏకగ్రీవంగా ఎన్నికయ్యారు. వీరి అభ్యర్థిత్వాలను అధికారికంగా ప్రకటించాల్సి ఉన్నది. జయశంకర్‌ భూపాలపల్లి జిల్లా గోరికొత్తపల్లి మండలం చెంచుపల్లె సర్పంచ్‌తోపాటు నాలుగు వార్డు సభ్యులు ఏకగ్రీవమయ్యాయ. సర్పంచ్‌ అభ్యర్థిగా జేల్లా రాముతోపాటు 4 వార్డు సభ్యులను అధికారికంగా ప్రకటించే అవకాశం ఉన్నది. జనగామ జిల్లా రఘునాథపల్లి మండలంలో 36 గ్రామ పంచాయతీలు ఉండగా, నాలుగు గ్రామాల్లో సర్పంచ్‌ స్థానాలు ఏకగ్రీవమయ్యారు. అయ్యవారిగూడెంలో పార్నంది సునీత, రామన్నగూడెంలో వాకటి అలివేలి, వెల్దిలో సింగిరెడ్డి సునీత, సోమయ్యకుంటతండాలో కెతావత్‌ ఈర్యానాయక్‌ మాత్రమే నామినేషన్‌ వేయడంతో ఏకగ్రీవానికి మార్గం సుగమమైంది. హనుమకొండ జిల్లా భీమదేవరపల్లి మండలం వీర్లగడ్డతండా సర్పంచ్‌, వార్డు సభ్యులు ఏకగ్రీవమయ్యాయి. సర్పంచ్‌ స్థానానికి గుగులోత్‌ పూర్ణిమతోపాటు 6వార్డులకు సింగిల్‌ నామినేషన్‌ దాఖలైంది. రాజన్న సిరిసిల్ల జిల్లా కోనరావుపేట మండలం వట్టిమల్ల నుంచి కమ్మరిపేటతండా సర్పంచ్‌ అభ్యర్థిగా బీఆర్‌ఎస్‌ తరఫున భూక్యా మంజుల-రాజు ఒక్కరే నామినేషన్‌ వేశారు.
