NAAC | న్యాక్‌లో మనం పూర్‌.. ప్రశ్నార్థకంగా ఉన్నత విద్యలో నాణ్యత

రాష్ట్రంలో ఉన్నత విద్యలో నాణ్యత ప్రశ్నార్థకంగా మారింది. ఇందుకు నేషనల్‌ అసెస్‌మెంట్‌ అండ్‌ అక్రెడిటేషన్‌ కౌన్సిల్‌ (న్యాక్‌) గుర్తింపు గల కాలేజీల సం ఖ్యయే నిదర్శనం. 88శాతం కాలేజీలు న్యాక్‌ గుర్తింపును దక్కించుకోలేదు.

• 88% విద్యాసంస్థలకు నో అక్రెడిటేషన్‌
• 2వేల కాలేజీల్లో కేవలం 260కే న్యాక్‌ గుర్తింపు
• ఇటీవల వివరాలు వెల్లడించిన యూనివర్సిటీ గ్రాంట్స్‌ కమిషన్‌

NAAC | హైదరాబాద్‌, డిసెంబర్‌ 25 (నమస్తే తెలంగాణ) : రాష్ట్రంలో ఉన్నత విద్యలో నాణ్యత ప్రశ్నార్థకంగా మారింది. ఇందుకు నేషనల్‌ అసెస్‌మెంట్‌ అండ్‌ అక్రెడిటేషన్‌ కౌన్సిల్‌ (న్యాక్‌) గుర్తింపు గల కాలేజీల సం ఖ్యయే నిదర్శనం. 88శాతం కాలేజీలు న్యాక్‌ గుర్తింపును దక్కించుకోలేదు. ఈ విషయం లో రాష్ట్రంలోని కాలేజీలు అత్యంత వెనుకబడి ఉన్నాయి. 2,083 కాలేజీలుంటే కేవలం 260(12%) మాత్రమే ఇప్పటి వరకు న్యాక్‌ గుర్తింపు దక్కించుకున్నాయి. దీంట్లో 90 వరకు ప్రభుత్వ డిగ్రీ కాలేజీలే ఉన్నాయి. ఈ విషయాన్ని యూనివర్సిటీ గ్రాంట్స్‌ కమిషన్‌(యూజీసీ) ఇటీవలే వెల్లడించింది.

యూజీసీ వెల్లడించిన వివరాలిలా..

• రాష్ట్రంలో 31 వర్సిటీలుండగా 11 మాత్రమే న్యాక్‌ గుర్తింపు పొందాయి.
• ఓయూ న్యాక్‌ గుర్తింపు గడువు పూర్తవగా ఇంత వరకు తిరిగి దక్కించుకోలేదు. తెలంగాణ, శాతవాహన, పాలమూరు, తెలుగు వర్సిటీలు న్యాక్‌ గుర్తింపులేకుండానే నడుస్తున్నాయి.
• ఇఫ్లూ వర్సిటీ న్యాక్‌ గుర్తింపు 2021లో ముగియగా, ఇంత వరకు గుర్తింపును దక్కించుకోలేకపోయింది.
• ప్రభుత్వ డిగ్రీ కాలేజీలు న్యాక్‌ విషయంలో ముందంజలో ఉన్నాయి. వందేండ్ల చరిత్ర గల ప్రభుత్వ సిటీ కాలేజీ 3.67 సీజీపీఏతో న్యాక్‌ ఏ++ గ్రేడ్‌ దక్కించుకున్నది. అంతకుముందు ఖమ్మంలోని ఎస్సార్‌ అండ్‌ బీజీఎన్నార్‌ ప్రభుత్వ డిగ్రీ కాలేజీ ఖమ్మం 3.64 సీజీపీఏ ఏ++ గ్రేడ్‌తో దేశంలోని ప్రభుత్వ డిగ్రీ కాలేజీల్లో అధిక గ్రేడ్‌ పొందిన కాలేజీగా రికార్డు సృష్టించగా.. ఇప్పుడు ఈ రికార్డును సిటీ కాలేజీ అధిగమించింది.
• జాతీయంగా 1,168 వర్సిటీలుండగా, 384(33%) వర్సిటీలు న్యాక్‌ గుర్తింపు పొందాయి. 45,473 కాలేజీలుండగా 5,967(13%) కాలేజీలు న్యాక్‌ గుర్తింపును దక్కించుకున్నాయి.
• పెద్ద రాష్ర్టాలను తీసుకుంటే అత్యధికంగా న్యాక్‌ గుర్తింపు పొందిన వాటిలో ఛత్తీస్‌గఢ్‌(42%), అస్సాం(41%), మహారాష్ట్ర (40%) తొలి మూడు స్థానాల్లో ఉన్నాయి.