సర్కారీ బడుల్లో ప్రతినెలా పీటీఎం

ప్రభుత్వ పాఠశాలల్లో ప్రతి నెలా మూడో శనివారం తప్పనిసరిగా పేరెంట్స్‌ టీచర్‌ సమావేశాలు నిర్వహించాలని రాష్ట్ర పాఠశాల విద్యాశాఖ ఆదేశాలు జారీ చేసింది.

• మూడో శనివారం తల్లిదండ్రులతో భేటీ
• సమగ్రశిక్ష అభియాన్‌ మార్గదర్శకాలు జారీ

హైదరాబాద్‌, ఆగస్టు 24 (నమస్తే తెలంగాణ): ప్రభుత్వ పాఠశాలల్లో ప్రతి నెలా మూడో శనివారం తప్పనిసరిగా పేరెంట్స్‌ టీచర్‌ సమావేశాలు నిర్వహించాలని రాష్ట్ర పాఠశాల విద్యాశాఖ ఆదేశాలు జారీ చేసింది. సమావేశం నిర్వహణకు మార్గదర్శకాలు, ఎజెండాకు సంబంధించిన అంశాలపై సమగ్రశిక్ష అభియాన్‌ (ఎస్‌ఎస్‌ఏ) అధికారులు బుధవారం ఉత్తర్వులు జారీ చేశారు. ప్రతి నెలా పాఠశాల యాజమాన్య కమిటీ (ఎస్‌ఎంసీ) సమావేశాలతో పాటు వీటిని సైతం తప్పనిసరిగా నిర్వహించాలని పేర్కొన్నారు.

పీటీఎం మార్గదర్శకాలు

• ప్రతి నెలా తరగతుల వారీగా పేరెంట్‌ టీచర్‌ సమావేశాలను మూడో శనివారం నిర్వహించాలి. ఒకవేళ మూడో శనివారం సెలవురోజు అయితే నాలుగో శనివారం నిర్వహించుకోవచ్చు.
• తరగతుల వారీగా తల్లిదండ్రులు, ఉపాధ్యాయులు పరస్పరం చర్చించి.. విద్యార్థుల విద్యా పురోగతి, హాజరు, ప్రవర్తన, సమస్యలు, అలవాట్లు, ఆసక్తులు మొదలైన వాటిని అంచనావేయాలి.
• విద్యా ప్రమాణాలు, పాఠశాలల్లో సౌకర్యాలు, మధ్యాహ్న భోజనం మెరుగుపర్చడం తదితర అంశాలపై తల్లిదండ్రుల సూచనలు స్వీకరించాలి.
• పాఠశాల ప్రధానోపాధ్యాయుడు, పాఠశాల యాజమాన్య కమిటీ చైర్‌పర్సన్లు తరగతుల వారీగా పేరెంట్‌ టీచర్‌ సమావేశాల ప్రణాళికను రూపొందించాలి. సమావేశాలను సాధ్యమైనంత మేరకు ఉదయమే నిర్వహించాలి. తల్లిదండ్రులంతా హాజరయ్యేలా చూడాలి.
• హెచ్‌ఎంలు చొరవ తీసుకొని అన్ని తరగతుల పేరెంట్‌ టీచర్‌ సమావేశాలు సవ్యంగా జరిగేలా పర్యవేక్షించాలి.
• ప్రధానోపాధ్యాయుడు లిఖితపూర్వక సమాచారం ద్వారా తల్లిదండ్రులను సమావేశాలకు ఆహ్వానించాలి.