బనకచర్ల వద్దే వద్దు!.. ప్రాజెక్టుపై విముఖత.. అభ్యంతరాలు

గోదావరి నదిపై బనకచర్ల ప్రాజెక్టు నిర్మాణం చేపట్టడంపై అన్నివైపులా తీవ్ర అభ్యంతరాలు, విముఖత వ్యక్తమైంది. ఏపీ ప్రభుత్వం పోలవరం బనకచర్ల లింక్‌ ప్రాజెక్టుకు సంబంధించి పీఎఫ్‌ఆర్‌ (ప్రీ ఫిజబులిటీ రిపోర్టు)ను కేంద్ర జల్‌శక్తి శాఖకు సమర్పించిన విషయం విధితమే. ఆ ప్రాజెక్టు పీఎఫ్‌ఆర్‌పై అభిప్రాయాలను తెలపాలని కేంద్రం తన పరిధిలోని జాతీయ సంస్థలకు, బేసిన్‌ పరిధిలోని తెలంగాణ సహా అన్ని రాష్ర్టాలకు లేఖలు రాసింది.

• కేంద్ర సంస్థలన్నింటిదీ ఒకే మాట
• బేసిన్‌ పరిధి రాష్ర్టాలదీ అదేమాట

హైదరాబాద్‌, జూలై19 (నమస్తే తెలంగాణ): గోదావరి నదిపై బనకచర్ల ప్రాజెక్టు నిర్మాణం చేపట్టడంపై అన్నివైపులా తీవ్ర అభ్యంతరాలు, విముఖత వ్యక్తమైంది. ఏపీ ప్రభుత్వం పోలవరం బనకచర్ల లింక్‌ ప్రాజెక్టుకు సంబంధించి పీఎఫ్‌ఆర్‌ (ప్రీ ఫిజబులిటీ రిపోర్టు)ను కేంద్ర జల్‌శక్తి శాఖకు సమర్పించిన విషయం విధితమే. ఆ ప్రాజెక్టు పీఎఫ్‌ఆర్‌పై అభిప్రాయాలను తెలపాలని కేంద్రం తన పరిధిలోని జాతీయ సంస్థలకు, బేసిన్‌ పరిధిలోని తెలంగాణ సహా అన్ని రాష్ర్టాలకు లేఖలు రాసింది. ప్రతీ కేంద్ర సంస్థ కూడా బనకచర్ల ప్రాజెక్టును చేపట్టడంపై విముఖతను వ్యక్తం చేయడంతోపాటు, అనేక అభ్యంతరాలను లేవనెత్తాయి. ఆయా సంస్థలు ఏకంగా ప్రాజెక్టు వద్దే వద్దే అని తేల్చిచెప్పాయి. అన్ని రాష్ర్టాలూ అదే మాటను వ్యక్తంచేశారు.

సీడబ్ల్యూసీ ఏం చెప్పిందంటే?

• ఆంధ్రప్రదేశ్‌ కోసం ఆమోదం పొందిన, పొందని ప్రాజెక్టుల ప్రధాన వివరాలు, ఇప్పటికే నిర్మించిన, ప్రస్తుతం నిర్మాణంలో ఉన్న, భవిష్యత్తులో నిర్మించాలని భావిస్తున్న ప్రాజెక్టుల వివరాలను సమర్పించాలి.
• 2010 మార్గదర్శకాల ప్రకారం ప్రాజెక్టులకు అనుమతుల మంజూరుకు 75 శాతం డిపెండబులిటీ కింద నీటి లభ్యత ఉండటం అవసరం. ఏపీ ప్రతిపాదిత 200 టీఎంసీల జల మళ్లింపునకు 75 శాతం డిపెండబులిటీ కింద ఎంత ఉన్నదీ అంచనా వేయాలి.
• సెక్షన్‌-3 ప్రకారం బచావత్‌ ట్రిబ్యునల్‌ బేసిన్‌లోని రాష్ర్టాలకు చేసిన కేటాయింపులు, ప్రస్తుతం వాటి వినియోగ వివరాలను సమర్పించాలి.
• పోలవరం నుంచి వరద నీటిని ప్రకాశం బరాజ్‌కు మళ్లించే ప్రతిపాదన ఉన్నది. ఇది అవార్డుకు అనుగుణంగా ఉన్నదా? లేదా అనే అంశాన్ని స్పష్టం చేయాలి.
• 510 క్యూమెక్స్‌ల పంపింగ్‌ సామర్థ్యంతో 24 గంటలపాటు నీటిని మళ్లిస్తే 200 టీఎంసీల మళ్లింపునకు 129 రోజులు అవసరం. కాబట్టి పోలవరం వద్ద వరద ప్రవాహాల డాటా ఆధారంగా సిమ్యులేషన్‌ స్టడీ చేయాలి. వరద ఉంటుందా లేదా చూడాలి. అవార్డును పరిగణనలోకి తీసుకుని ఇది సాధ్యమా? కాదా? అని నిర్ధారించాలి.

పోలవరం ప్రాజెక్టు అథారిటీ చెప్పిందేమిటి?

• పోలవరం నుంచి 200 టీఎంసీల మళ్లింపు ప్రతిపాదన డీపీఆర్‌లో భాగంగా లేదు. కాబట్టి నీటిలభ్యత, అంతర్‌రాష్ట్ర ప్రభావాలు, ట్రిబ్యునల్‌ అవార్డుకు లోబడి ఉన్నదా? లేదా? వంటి అంశాలను అధ్యయనం చేయాలి.
• పోలవరం ప్రాజెక్టు పూర్తి ఎఫ్‌ఆర్‌ఎల్‌ (150 ఫీట్లు) స్థాయికి చేరిన తర్వాత, సవరించిన డీపీఆర్‌ను సమర్పించాకే నీటి మళ్లింపును పరిగణనలోకి తీసుకోవాలి.
• ప్రస్తుత ప్రతిపాదిత బనకచర్ల ప్రాజెక్టులో కొత్త కాల్వ నిర్మాణం, తదితర స్ట్రక్చర్లు ఇప్పటికే ఆమోదం పొందిన పోలవరం ప్రాజెక్టు డీపీఆర్‌కు విరుద్ధం. కాబట్టి కొత్తగా అంచనాలు రూపొందించి, ఆమోదం పొందడం అవసరం. టీఏసీ అనుమతులను మరోసారి పొందాలి.

ఎన్‌డబ్ల్యూడీఏ (నేషనల్‌ వాటర్‌ డెవలప్‌మెంట్‌ అథారిటీ) ఏం చెప్పింది?:

• 75 శాతం డిపెండబులటీ కింద గోదావరిలో మిగులే లేదు. 157 టీఎంసీల లోటు ఉన్నది.
• నీటి లభ్యతపై ఇప్పటికీ స్పష్టత లేదు. అన్నీ 30 ఏండ్ల క్రితం నాటి అధ్యయనాలే. కొత్తగా అధ్యయనం చేయడం అవసరం.
• వరద పేరిట గోదావరి బనకచర్లకు ఆమోదం తెలిపితే పలు ప్రాజెక్టులపై ప్రతికూల ప్రభావం పడుతుంది. అధ్యయనం చేసిన తర్వాతే ముందుకు పోవాలి.

జీఆర్‌ఎంబీ ఏంచెప్పిందంటే?

• బనకచర్ల ప్రాజెక్టు ద్వారా గోదావరి నీటి మళ్లింపు పోలవరం ప్రాజెక్టు పరిధిని, నిర్వహణ షెడ్యూల్‌ను పూర్తిగా మారుస్తుంది.
• ఇందుకోసం గోదావరి బేసిన్‌లోని అన్ని రాష్ర్టాల ముందస్తు అనుమతి, రాతపూర్వక అంగీకారం అవసరం ఉంటుంది.
• గోదావరి జలాల పంపకంలో ఏపీ, తెలంగాణ మధ్య పరస్పర అంగీకారం లేదు. 75 శాతం డిపెండబులిటీ వద్ద 80 టీఎంసీలకు మించి మళ్లింపు జరిగితే జీడబ్ల్యూడీటీ, కేడబ్ల్యూడీటీ అవార్డుల ప్రకారం అన్ని రాష్ర్టాల మధ్య పంచుకోవాలి.
• ఏపీ విభజన చట్టం ప్రకారం నదీజలాల నియంత్రణలన్నీ ట్రిబ్యునల్‌ అవార్డులకు అనుగుణంగా ఉండాలి. కానీ ఇది పాటించలేదు.

కేంద్ర పర్యావరణ, అటవీ మంత్రిత్వశాఖ ఈఏసీ (ఎక్స్‌పర్ట్‌ అప్రయిజల్‌ కమిటీ) చెప్పిందేమిటి?

1) కేంద్ర జల సంఘం (సీడబ్ల్యూసీ) వరద జలాల లభ్యతపై సమగ్ర అధ్యయనం చేయాలి.
2) 1980 గోదావరి ట్రిబ్యునల్‌ అవార్డు (తీర్పు)కు విరుద్ధంగా బనకచర్ల ప్రాజెక్టు ఉన్నదన్న అంశాలను పరిగణనలోకి తీసుకోవాలి.
3) అంతర్‌రాష్ట్ర పర్యావరణ ప్రభావ అంచనా తయారీకి ముందు రాష్ట్రాల మధ్య నీటి పంపిణీపై స్పష్టత కోసం కేంద్ర జలసంఘం అనుమతి తీసుకోవాలి.