Visit:
HYDRA | హైదరాబాద్‌ సిటీబ్యూరో, ఆగస్టు 28 (నమస్తే తెలంగాణ): చెరువుల ఆక్రమణలపై కన్నెర్ర చేస్తున్న సీఎం రేవంత్‌ రెడ్డి, హైడ్రా కమిషనర్‌ రంగనాథ్‌కు నెటిజన్లు సూటిప్రశ్నలు సంధిస్తున్నారు. తాజాగా సీఎం రేవంత్‌రెడ్డి మీడియాతో చిట్‌చాట్‌లో ‘చెరువులు, కుంటలను ఆక్రమించి నా కుటుంబసభ్యుల నిర్మాణాలు ఉన్నా నిలబడి కూల్చివేస్తా’ అని స్పష్టం చేశారు. దీంతో సీఎం రేవంత్‌రెడ్డి సోదరుడు తిరుపతిరెడ్డి దుర్గం చెరువును ఆక్రమించుకొని నిర్మించిన ఇంటి వివరాలను నెటిజన్లు వెలుగులోకి తెచ్చారు.
2000 సంవత్సరంలో భారీ వరదలు వస్తే.. ఈ చెరువు వరద నీరు ప్రవహించి ఏకంగా 9 కాలనీలు నీట మునిగాయి. దీంతో అప్పట్లోనే దుర్గం చెరువు ఫుల్‌ ట్యాంక్‌ లెవల్‌ను నిర్ధారిస్తూ హద్దు రాళ్లను ఏర్పాటు చేశారు. కానీ చెరువు బఫర్‌జోన్‌, ఎఫ్టీఎల్ పరిధిలో అక్రమ నిర్మాణాలు చేపట్టారు. ఇందులోనే సీఎం రేవంత్‌రెడ్డి సోదరుడు తిరుపతిరెడ్డి ప్లాట్‌ నంబర్‌ 54, 55లో భారీ భవంతిని నిర్మించుకోవటమే ఇప్పుడు ప్రధాన చర్చకు కారణమైంది.
మరి ఈ ఇంటినీ కూల్చివేస్తారా? అని నెటిజన్లు సూటిగా ప్రశ్నిస్తున్నారు. ఇలాంటి సంపన్నుల కబ్జా భవంతులను తొలి ప్రాధాన్యంగా కూల్చాలని డిమాండ్‌ చేస్తున్నారు. చెరువుకు సంబంధించిన పూర్తి ఆధారాలతో సోషల్‌మీడియా వేదికగా పంచుకోగా.. సీఎం, హైడ్రా కమిషనర్‌ రంగనాథ్‌ ఏ విధంగా స్పందిస్తారో చూడాలి.
బీఆర్‌ఎస్‌ ప్రభుత్వం తొలి కేబుల్‌ బ్రిడ్జిని దుర్గం చెరువుపై నిర్మించగా, కాంగ్రెస్‌, టీడీపీ పాలనలోనే చెరువులు అన్యాక్రాంతం అయ్యాయని నెటిజన్లు చెప్తున్నారు. అందుకు తిరుపతిరెడ్డి ఇల్లే నిదర్శనం అని పేర్కొంటున్నారు. దుర్గం చెరువు దాదాపు 85 ఎకరాల విస్తీర్ణంలో విస్తరించి ఉండగా.. ఎఫ్టీఎల్, బఫర్‌ జోన్లలోని ప్రాంతాలను పూడ్చివేసి కాలనీలు, రెసిడెన్షియల్‌ ప్రాజెక్టులను నిర్మించటం ఇప్పుడు వెలుగులోకి వచ్చింది. అమర్‌ కో ఆపరేటివ్‌ హౌజింగ్‌ సొసైటీ, కావూరి హిల్స్‌, కల్యాణ్‌నగర్‌, బృందావన్‌ కాలనీ, హెక్టార్‌ గార్డెన్‌ వంటి కాలనీలన్నీ 2000లో వరదలోనే మునిగాయని ఇరిగేషన్‌శాఖ గుర్తించింది.
ఈ క్రమంలో చెరువు భూముల్లో నిర్మించిన భవనాలను వ్యతిరేకిస్తూ కొందరూ కోర్టును ఆశ్రయించగా.. ఎఫ్టీఎల్ పరిధిలో అనుమతుల్లేని భవనాలను ఇరిగేషన్‌, రెవెన్యూ, హూడా అధికారులు తొలగించారు. ఆ తర్వాత కోర్టు ఆదేశాలతో ఆక్రమణలపై చర్యలు నిలిచిపోయాయి. కానీ ఇరిగేషన్‌, హెచ్‌ఎండీఏ, రెవెన్యూశాఖ అధికారులు ఇచ్చిన ఆధారాలతో ఈ భూములు రెసిడెన్షియల్‌ కార్యాకలాపాలకు అనుకూలం కాదని, రిక్రియేషనల్‌ జోన్‌గా మార్చాలని అప్పట్లోనే హైకోర్టు ఆదేశించింది.
చెరువులు, కుంటలను ఆక్రమించి చేపట్టిన నిర్మాణాల విషయంలో దూకుడుగా వ్యవహారిస్తున్న హైడ్రా.. సామాన్యుడు నిర్మించుకున్న ఇండ్లపైనే ప్రతాపం చూపుతున్నదన్న విమర్శలు ఎదుర్కొంటున్నది. సామాన్యుడు నిర్మించుకునే, బిల్డర్లు, డెవలపర్లు చేసే తప్పిదాలతో కలల సౌధాలు కండ్ల ముందే పేకమేడల్లా కూలిపోతుంటే గుండెలు బాదుకొని కన్నీరు మున్నీరు అవుతున్నారు. రాజకీయ పలుకుబడితో చెరువులు, జలవనరులను చెరబట్టిన సంపన్న వర్గాల నిర్మాణాలను కూడా కూల్చివేసేలా చర్యలు తీసుకోవాలని డిమాండ్‌ చేస్తున్నారు.
