పాఠశాలల్లో మాస్క్‌ బాగుంది

• గాలి సరిగా రాని గదుల్లో భోజనాలు
• సామాజిక దూరం, పారిశుద్ధ్యం గాలికి
• దేశవ్యాప్తంగా లోకల్‌ సర్కిల్స్‌ సర్వే

హైదరాబాద్‌, సెపెంబర్‌ 23 (నమస్తే తెలంగాణ): కరోనా కేసులు తగ్గుముఖం పట్టడం, త్వరలోనే 12 నుంచి 18 ఏండ్ల పిల్లలకు వ్యాక్సిన్‌ అందుబాటులోకి రానుండటంతో చాలా రాష్ర్టాల్లో పాఠశాలలు ప్రారంభమయ్యాయి. స్కూళ్లలో మాస్క్‌లు ధరించడం, సామాజిక దూరాన్ని పాటించడం, వ్యక్తిగత పరిశుభ్రతకు ప్రాధాన్యం ఇస్తున్నా.. కొన్ని విషయాల పట్ల తల్లిదండ్రులు తమ పిల్లల భద్రతపై ఆందోళన వ్యక్తం చేస్తున్నారు. బ్రిటన్‌, స్విట్జర్లాండ్‌, అమెరికా, ఐరోపా దేశాల్లో డెల్టా వేరియంట్‌ కేసులు పెరిగిన నేపథ్యంలో మన దేశంలో స్కూళ్లు పునఃప్రారంభించడంపై లోకల్‌ సర్కిల్స్‌ సంస్థ తల్లిదండ్రుల నుంచి అభిప్రాయాలు సేకరించింది. గాలి, వెలుతురు సరిగా లేని గదుల్లో బోధిస్తున్నారని, ఆ గదుల్లోనే పిల్లలు భోజనం చేస్తున్నారని, అందరూ ఒకేచోట గుంపుగా చేరుతున్నారని పలువురు పేర్కొన్నారు. పిల్లలు మాస్క్‌ ధరిస్తున్నా సామాజిక దూరం పాటించడం లేదని, పారిశుద్ధ్యానికి ప్రాధాన్యం ఇవ్వడం లేదని తెలిపారు. ఈ సర్వేలో దేశవ్యాప్తంగా 38వేల మంది పాల్గొన్నారు. ‘మీ పిల్లలు వెళ్లే పాఠశాలల్లో ఎలాంటి కొవిడ్‌ నిబంధనలు పాటిస్తున్నారు?’ అంటూ వివిధ అంశాలపై అడిగిన ప్రశ్నలకు వారు ఇచ్చిన సమాధానాలు ఇలా ఉన్నాయి. 84 శాతం మంది మాస్కింగ్‌ బాగుందని సమాధానం ఇచ్చారు. 70శాతం పాఠశాలల్లో సామాజిక దూరం, మరో 72శాతం పరిశుభ్రత, శానిటేషన్‌ బాగుందన్నారు. మాస్క్‌లు ధరించడానికి స్కూళ్లు అధికప్రాధాన్యం ఇస్తున్నాయని ఎక్కువ మంది తల్లిదండ్రులు చెప్పారు. సామాజిక దూరం, పరిశుభ్రత, శానిటేషన్‌ ఇంకా మెరుగుపడాలని అందరూ అభిప్రాయపడ్డారు. భోజనాలు, ఉదయం ప్రార్థనలను ఔట్‌డోర్‌లోనే నిర్వహించాలని మెజారిటీ తల్లిదండ్రులు కోరుకున్నారు.

పాఠశాలల్లో మీ పిల్లలు ఎక్కడ భోజనం చేస్తున్నారు?

• ఇరుకైన తరగతి గదుల్లో : 41శాతం
• బయటికి వచ్చి తింటున్నారు: 6 శాతం
• ఎక్కడ తింటున్నారో తెలియదు: 12శాతం
• తక్కువ సమయం పాఠశాల నడుస్తున్నందున లంచ్‌ టైం లేదు: 41
• భోజనం ఎక్కడ చేస్తున్నారనే దానికన్నా పాఠశాలలో భోజనం చేయడమం ప్రమాదకరమని 50శాతం మంది తల్లిదండ్రులు అభిప్రాయపడ్డారు. ఇరుకు గదుల్లో మాస్క్‌ తీసేసి తినడంపై ఆందోళన వ్యక్తం చేశారు.

ఉదయం ప్రార్థన నిర్వహిస్తున్నారా?

• పాఠశాల బయట మాస్క్‌లు ధరించి ప్రార్థన నిర్వహిస్తున్నారు: 32శాతం
• పాఠశాల లోపల మాస్క్‌, సామాజిక దూరం పాటిస్తూ ప్రార్థన నిర్వహిస్తున్నారు: 5శాతం
• మాస్క్‌లు, సామాజిక దూరం పాటిస్తూ ప్రార్థన జరుగుతున్నది : 14శాతం
• అసలు సమావేశాలు పెట్టడం లేదు: 36శాతం
• ఏం చెప్పలేం: 13శాతం

తరగతి గదుల్లో వెంటిలేషన్‌ ఎలా ఉంది

• తరగతి గదులకు కిటికీలు ఉన్నాయి. అందులో నుంచి బయటి గాలి వస్తుంది: 40శాతం
• గదుల్లో ఎయిర్‌ ప్యూరిఫైయర్లు ఉన్నాయి పిల్లలు ఉన్నంత సేపు వాటిని ఆన్‌ చేస్తున్నారు: 3శాతం
• పై రెండు ఉన్నాయి: 9శాతం
• గదులకు కిటికీలు ఉన్నా బయటి గాలి రాకుండా మూసి ఉంచుతున్నారు: 12శాతం
• అసలు కిటికీలే లేవు :24శాతం
• చెప్పలేం: 12శాతం
• తరగతి గదుల్లోకి స్వచ్ఛమైన గాలి వచ్చే సదుపాయం లేదు: 36శాతం