శిథిలావస్థలో సర్కారు కాలేజీ భవనాలు.. 35 కాలేజీల్లో దినదిన గండంగా గడుపుతున్న విద్యార్థులు

ఒకటేమో నిజాంకాలంలో నిర్మించినది. మరోటేమో 1970, ఇంకోటేమో 1982లో కట్టిన భవనం. కొన్నింటిలో పెచ్చులూడుతున్నాయి.

• వినియోగించడానికి వీల్లేదని తేల్చిన ఇంజినీర్లు
• గత వారం కూలిన నాంపల్లి బజార్‌ఘాట్‌ కాలేజీ భవనం 

హైదరాబాద్‌, ఆగస్టు 23 (నమస్తే తెలంగాణ): ఒకటేమో నిజాంకాలంలో నిర్మించినది. మరోటేమో 1970, ఇంకోటేమో 1982లో కట్టిన భవనం. కొన్నింటిలో పెచ్చులూడుతున్నాయి. ఇంకొన్నింటిలో వర్షం పడితే చాలు నీళ్లు కారుతున్నా యి. వర్షాలకు నాని నాని ఎప్పుడు కూలుతాయో తెలియని పరిస్థితిలో మరికొన్ని ఉన్నాయి. ఇలా ఒకటి కాదు.. రెండు కాదు ఏకంగా 35 భవనాలు శిథిలావస్థకు చేరుకున్నాయి. ఇది రాష్ట్రంలో ప్రభుత్వ జూనియర్‌ కాలేజీ భవనాల పరిస్థితి. రాష్ట్రంలో తెరిపినివ్వకుండా వానలు పడుతుండటంతో ఈ కాలేజీల్లో దినదిన గండం అన్నట్టుగా సాగుతున్నది. భారీ వర్షాలకు హైదరాబాద్‌ నాంపల్లి బజర్‌ఘాట్‌లోని ప్ర భుత్వ జూనియర్‌ కాలేజీ భవనం పైకప్పు కొంత భాగం అకస్మాత్తుగా కూలింది. 55 ఏండ్ల క్రితం నిర్మించిన ఈ భవనం శిథిలావస్థకు చేరుకోవడంతో కొంత భాగం కూలిపోయింది.

ఈ భవనంలో ఉదయం, మధ్యాహ్నం రెండు షిఫ్ట్‌ల్లో రెండు కాలేజీలను నడుపుతున్నారు. 1,300కు పైగా విద్యార్థులున్నారు. 30 గదుల్లో 10గదులు పూర్తిగా పాడవడంతో వాడటంలేదు. మ రో 20 గదులు అధ్వానస్థితిలో ఉన్నాయి. అయితే గత ఆదివారం సెలవుకావడంతో ఎలాంటి ప్రమాదం జరగలేదు. అదే వర్కింగ్‌డే అయితే జరిగే నష్టాన్ని ఊహించలేం. భవనం కూలిపోవడం, వర్షాలకు నీరు చేరడంతో ఈ కాలేజీకి అధికారులు సెలవు ప్రకటించారు. రాష్ట్రంలో 430 ప్రభుత్వ జూనియర్‌ కాలేజీలుండగా, 398 కాలేజీలకు సొంత భవనాలున్నాయి. వీటిలో ఆరు భవనాలు నిర్మాణంలో ఉన్నాయి. 32 కాలేజీలకు అసలు భవనాలే లేవు. శిథిలావస్థకు చేరిన ఈ 35 కాలేజీలకు కొత్త భవనాలు నిర్మించాలని అధ్యాపక సంఘాలు, విద్యార్థులు డిమాండ్‌ చేస్తున్నారు.

పరిస్థితులిలా..

• నిజామాబాద్‌ పట్టణంలోని ప్రభుత్వ బాలుర జూనియర్‌ కాలేజీ భవనం అత్యంత దయనీయంగా ఉంది. ఈ భవనాన్ని వినియోగించొద్దని టీజీఈడబ్ల్యూఐడీసీ డిప్యూటీ ఇంజినీర్‌ తేల్చారు. ఆర్మూర్‌ కాలేజీ భవనాన్ని కూడా వినియోగించొద్దని ఆదేశించారు. బోధన్‌ కాలేజీ భవనం 40ఏండ్ల కిందిది.
• హనుమకొండ జిల్లా ధర్మాసాగర్‌ కాలేజీ నాలుగు గదుల సీలింగ్‌ చెడిపోయింది. మూడు గదుల్లో ఫ్లోరింగ్‌ పూర్తిగా ధ్వంసమైంది. ఇదే జిల్లాలోని వడ్డేపల్లి కాలేజీలోనూ సమస్యలు ఉన్నాయి.
• వరంగల్‌ క్రిష్ణాకాలనీలోని బాలికల జూనియర్‌ కళాశాల భవనం పూర్తిగా శిథిలావస్థకు చేరింది. దీంతో సమీపంలోని స్కూల్‌లో నిర్వహిస్తున్నారు.
• ఆదిలాబాద్‌ జిల్లా కేంద్రంలోని బాలికల కళాశాలలో ఎనిమిది గదులు శిథిలావస్థకు చేరాయి. ఉట్నూరు కాలేజీని 1982లో నిర్మించగా ఇది కూడా అవసాన దశకు చేరింది.
• హైదరాబాద్‌లోని చంచల్‌గూడ ప్రభుత్వ జూనియర్‌ కాలేజీ భవనం శిథిలావస్థకు చేరుకోవడంతో ప్రస్తుతం కూల్చివేశారు. పక్కన పాఠశాలలో కాలేజీ నడుపుతున్నారు.
• హైదరాబాద్‌ అబిడ్స్‌లోని మహబూబియా బాలికల కాలేజీ భవనం శిథిలావస్థకు చేరుకుంది. ఇది హెరిటేజ్‌ భవనం కావడంతో పలుమార్లు పెచ్చులూడగా.. చెట్ల కింద పాఠాలు చెబుతున్నారు. ఆలియా జూనియర్‌ కాలేజీలో పాత భవ నం కూలిపోయింది. ప్రిన్సిపాల్‌ ఆఫీస్‌, కార్యాలయం ఇంకా పాత భవనంలోనే నిర్వహిస్తున్నారు.
• నిర్మల్‌ జిల్లా ఖానాపూర్‌లోని ప్రభుత్వ కాలేజీ భవనం 1970లో కట్టింది. ఇది మట్టితో కట్టిన భవనం.

జిల్లాలవారీగా వివరాలు
ఖమ్మం 3, నారాయణపేట 2, నాగర్‌కర్నూల్‌ 2, నిజామాబాద్‌ 6, నిర్మల్‌ 3, హనుమకొండ 2, ఆదిలాబాద్‌ 2, వరంగల్‌ 5, ములుగు 1, పెద్దపల్లి 3, కామారెడ్డి 1, మహబూబ్‌నగర్‌ 2, హైదరాబాద్‌ 3, యాదాద్రి 1 చొప్పున శిథిలావస్థలో ఉన్నట్టు అధికారిక సమాచారం.