కరెంటిస్తేనే పోలింగ్‌.. 2గంటలు నిలిచిన పోలింగ్‌

నాగర్‌కర్నూల్‌ జిల్లా కొల్లాపూర్‌ మండలం అమరగిరి చెంచుగూడెం వాసులు పోలింగ్‌ను బహిష్కరించారు. నాలుగు రోజులుగా అంధకారంలో ఉన్న గ్రామానికి కరెంటు సరఫరా పునరుద్ధరిస్తేనే ఓటేస్తామని వారు భీష్మించుకు కూర్చున్నారు. దీంతో 292వ పోలింగ్‌ బూత్‌లో ఉదయం 9గంటల వరకు ఒక్క ఓటూ నమోదు కాలేదు. చివరకు అధికారులు కరెంటును పునరుద్ధరించడంతో గ్రామస్థులు పోలింగ్‌కేంద్రానికి వచ్చారు.

• కరెంట్‌ను పునరుద్ధరించాలని అమరగిరి చెంచుగూడెంలో నిరసన
• సమస్య పరిష్కరించిన తర్వాత ఓటింగ్‌

కొల్లాపూర్‌ రూరల్‌, మే 13 : విద్యుత్తు సరఫరాను పునరుద్ధరించిన తర్వాతే ఓటేస్తామని నాగర్‌కర్నూల్‌ జిల్లా కొల్లాపూర్‌ మండలం అమరగిరి చెంచుగూడెంలో చెంచులు రెండు గంటల పాటు పోలింగ్‌ను బహిష్కరించారు. గూడెంలోని 262 నంబర్‌ పోలింగ్‌ బూత్‌లో సోమవారం ఉదయం 7 గంటలకు ప్రారంభం కావాల్సిన ఓటింగ్‌, 9 గంటలైనా మొదలుకాలేదు. ఇటీవల గాలిదుమారానికి చెట్టు విరిగిపడి కరెంట్‌ తీగలు తెగిపోవడంతో నాలుగు రోజులుగా గూడేనికి విద్యుత్‌ సరఫరా నిలిచిపోయింది. దీంతో తమకు విద్యుత్తును తిరిగి అందించేదాకా ఓటెయ్యబోమని చెంచులు భీష్మించుక్కూర్చున్నారు. తహసీల్దార్‌ శ్రీకాం త్‌, విద్యుత్తు అధికారులు గూడేనికి చేరుకొని కరెంట్‌ సరఫరాను పునరుద్ధరించారు. సమస్య పరిష్కారం కావడంతో చెంచులు ఓటేశారు.