లా కోర్సుల్లో మల్టిపుల్‌ ఎంట్రీ అండ్‌ ఎగ్జిట్‌

ఎల్‌ఎల్‌బీ, ఎల్‌ఎల్‌ఎం కోర్సుల్లో మల్టిపుల్‌ ఎంట్రీ, ఎగ్జిట్‌కు అవకాశం కల్పించాలని ఉన్నత విద్యామండలి నియమించిన నిపుణుల కమిటీ సూచించింది. బీకాం, బీబీఏ కోర్సుల్లోనూ మల్టిపుల్‌ ఎంట్రీ, ఎగ్జిట్‌ కు అవకాశం ఇవ్వాలని స్పష్టంచేసింది.

• బీకాం, బీబీఏ కోర్సుల్లోనూ అమలు
• ఇక నుంచి మెంటారింగ్‌, కౌన్సెలింగ్‌ తప్పనిసరి
• సిఫారసు చేసిన నిపుణుల కమిటీ

హైదరాబాద్‌, ఫిబ్రవరి 25 (నమస్తే తెలంగాణ ) : ఎల్‌ఎల్‌బీ, ఎల్‌ఎల్‌ఎం కోర్సుల్లో మల్టిపుల్‌ ఎంట్రీ, ఎగ్జిట్‌కు అవకాశం కల్పించాలని ఉన్నత విద్యామండలి నియమించిన నిపుణుల కమిటీ సూచించింది. బీకాం, బీబీఏ కోర్సుల్లోనూ మల్టిపుల్‌ ఎంట్రీ, ఎగ్జిట్‌ కు అవకాశం ఇవ్వాలని స్పష్టంచేసింది. ఇక సెకండియర్‌లో చేరేందుకు ల్యాట్రల్‌ ఎంట్రీకి, రీ ఎంట్రీకి సైతం అవకాశం కల్పించాలని కమిటీ సూచించింది. బీకాం, బీబీఏ, లా కోర్సుల సిలబస్‌లో మార్పుల కోసం నియమించిన నిపుణుల కమిటీ మంగళవారం మాసాబ్‌ట్యాంక్‌లోని ఉన్నత విద్యామండలి కార్యాలయంలో చైర్మన్‌ ప్రొఫెసర్‌ బాలకృష్టారెడ్డి అధ్యక్షతన భేటీ అయ్యింది. ఈ సందర్భంగా బీకాం, బీబీఏ, లా కోర్సు సిలబస్‌లో 15-20శాతం మార్పులు చేయాలని నిర్ణయించారు. యూనైటెడ్‌ నేషన్స్‌ సస్టెనబుల్‌ డెవలప్‌మెంట్‌ గోల్స్‌కు అనుగుణంగా సిలబస్‌ రూపొందించాలని, లా కోర్సుల్లో కొత్త గా సైబర్‌లాను ప్రవేశపెట్టాలని, ఇంటర్న్‌షిప్‌లు, ప్రాజెక్ట్‌లు తప్పనిసరిచేయాలని నిపుణల కమిటీ సూచించింది.

కమిటీ సిఫారసులు..

• డిగ్రీ, పీజీ కోర్సుల్లో పునరావృతమవుతున్న పాఠ్యాంశాలను తొలగించాలి. డిగ్రీలో ఉన్న పాఠాలు పీజీలోనూ ఉంటే డిగ్రీ సిలబస్‌ నుంచి ఉపసంహరించాలి.
• బీబీఏ, బీకాం, ఎల్‌ఎల్‌బీ కోర్సుల్లో జనరేటివ్‌ ఏఐ వంటి టెక్నాలజీ, స్కిల్‌ బేస్డ్‌ పాఠ్యాంశాలను అంతర్భాగం చేయాలి.
• విద్యార్థులు ఆన్‌లైన్‌ ప్లాట్‌ఫాం అయిన స్వయం, మూక్స్‌, ఎన్‌పీటీఎల్‌ కోర్సులను తీసుకునే అవకాశం కల్పించాలి.
• విద్యార్థులకు అకడమిక్‌, ప్రొఫెషనల్‌గా రాణించేందుకు మెంటారింగ్‌, కౌన్సెలింగ్‌ తప్పనిసరి.
• ఇండస్ట్రీ, స్టార్టప్‌ భాగస్వామ్యాలు, ఇంటర్న్‌షిప్‌లను ప్రోత్సహించాలి.
• ఇంజినీరింగ్‌ కాలేజీల్లోని సాంకేతిక వనరులను వినియోగించుకునేందుకు ఆయా కాలేజీలతో ఇంజినీరింగ్‌ కాలేజీలను అనుసంధానించాలి.