హైదరాబాద్, జూన్ 24 (నమస్తే తెలంగాణ): నల్లమల పేరు వింటేనే అభయారణ్యంతోపాటు అడవి అందాలు గుర్తుకొస్తాయి. నల్లమల అంటేనే ఒళ్లు పులకరించి పోతుంది. దట్టమైన అరణ్యం, పశుపక్ష్యాదు లు, వన్యమృగాల సోయగాలతో మనసును రంజింపజేస్తుంది. అడవితల్లి ఒడిలో పారే సెలయేళ్లు.. పక్షుల కిలకిల రావాలు, ఆకుపచ్చని అందాలు పర్యాటకులను ఆకర్షిస్తాయి. కనుచూపుమేర పచ్చదనం.. నింగిని తాకుతున్నట్టు కనిపించే అరుదైన వృక్షాలు.. పర్యాటకుల మనసును ఆహ్లాదపరుస్తాయి. ఆ అభయారణ్యంలో ఎన్నో వన్యప్రాణులు తలదాచుకొంటూ తమ సంతతిని వృద్ధి చేసుకుంటున్నాయి.
అడవిని చీల్చుతూ ముందుకుసాగే రోడ్డు వెంట ఎన్నో మరెన్నో అందాలు చూడొచ్చు. అలాంటి మహాద్భుతమైన నల్లమల అందాల చిత్రాలను రాజ్యసభ సభ్యుడు, గ్రీన్ ఇండియా చాలెంజ్ వ్యవస్థాపకుడు సంతోషకుమార్ శుక్రవారం ట్వీట్ చేశారు. ‘చినుకు పడితే చాలు పుడమి తల్లి పులకరించి పచ్చని చీర చుట్టుకున్నట్టుంది. ఈ వర్షకాలంలో నల్లమల ఆకుపచ్చని అందాలతో కనువిందు చేస్తున్నది. ఈ సారి నల్లమల అత్యంత అద్భుతంగా ఉన్నది. ఈ అడవుల్లో ఉన్న వృక్షాలను, జంతువులను కాపాడుకోవడానికి అటవీశాఖ అధికారులు చేస్తున్న ప్రయత్నాన్ని తప్పకుండా అభినందించాలి. తెలంగాణలో ఇలాంటి అడవులు ఉన్నందుకు మనమందరం గర్వపడాలి’ అని ఎంపీ సంతోష్కుమార్ ట్వీట్లో పేర్కొన్నారు.