పర్యావరణ పరిరక్షణకు మిషన్‌ లైఫ్‌

ఈ భూమిపై జరిగే పరిణామాలన్నింటికి మానవులుగా మనమే కారకులం. మన అవసరాలు, అత్యాశలు భావితరాలకు తీవ్రమైన ముప్పును తెచ్చిపెడుతున్నాయి.

• ఇంధన ఆదాలో మనమూ పాలుపంచుకుందామా

హైదరాబాద్‌, జూలై 7 (నమస్తే తెలంగాణ): ఈ భూమిపై జరిగే పరిణామాలన్నింటికి మానవులుగా మనమే కారకులం. మన అవసరాలు, అత్యాశలు భావితరాలకు తీవ్రమైన ముప్పును తెచ్చిపెడుతున్నాయి. మానవాళి అవసరాల కోసం ప్రకృతిని పణంగా పెట్టి తెచ్చుకున్న పారిశ్రామిక విప్లవం ఓవైపు మన అభివృద్ధికి, జీవన ప్రమాణాల పెంపునకు దోహదపడుతూనే మరోవైపు కాలుష్యాన్ని తెచ్చిపెట్టింది. ఫలితంగా వాతావరణంలో పెను మార్పులు సంభవించి ప్రకృతి వైపరీత్యాలతోపాటు మరెన్నో అనర్థాలు తలెత్తుతున్నాయి.

ఈ నేపథ్యంలో మనం ఇంధన పొదుపు పద్దతులను పాటించడంతోపాటు జీవనశైలిలో కొన్ని మార్పులు చేసుకోగలిగితే పర్యావరణాన్ని, సమాజాన్ని రక్షించిన వారమవుతాం. ఇందుకోసం ఉద్దేశించిన కార్యక్రమమే ‘మిషన్‌ లైఫ్‌’. దీని ద్వారా 2022-23 ఆర్థిక సంవత్సరంలో 307 బిలియన్‌ యూనిట్ల విద్యుత్తు, 24.68 మిలియన్‌ టన్నుల చమురును ఆదా చేయడంతోపాటు 306.40 మిలియన్‌ టన్నుల కర్బన ఉద్గారాలను తగ్గించగలిగాం. 2027-28 నాటికి దేశంలోని వంద కోట్ల మందిని ఈ కార్యక్రమంలో భాగస్వాములను చేసేందుకు బ్యూరో ఆఫ్‌ ఎనర్జీ ఎఫిషియెన్సీ (బీఈఈ) నడుం బిగించింది. ఈ యజ్ఞంలో పాలుపంచుకోవాల్సిన బాధ్యత మనందరిపైనా ఉన్నది.

ఇంధన ఆదా కోసం ఇలా చేద్దాం..

• ట్రాఫిక్‌ సిగ్నళ్లు, రైల్వే క్రాసింగ్‌ల వద్ద కార్లు, ద్విచక్రవాహనాల ఇంజిన్లను ఆఫ్‌ చేయడం ద్వారా 22.5 బిలియన్‌ కిలోవాట్ల ఇంధనాన్ని ఆదాచేయవచ్చు.
• షాపింగ్‌కు బట్టసంచులను (క్లాత్‌ బ్యాగ్‌లను) వాడటం ద్వారా ఏటా 375 మిలియన్‌ టన్నుల ప్లాస్టిక్‌ వ్యర్థాలు భూమిలో చేరకుండా నిరోధించవచ్చు.
• నల్లాలు, కులాయిలను సకాలంలో ఆపడం వల్ల 9 ట్రిలియన్‌ లీటర్ల నీటిని ఆదా చేయవచ్చు.
• పనికిరాని ఎలక్ట్రానిక్‌ ఉపకరణాలను రీసైకిల్‌ చేయడం ద్వారా 0.75 మిలియన్‌ టన్నుల ఎలక్ట్రానిక్‌ వ్యర్థాలను నియంత్రించవచ్చు.
• ఏసీల్లో ఉష్ణోగ్రతను 24 డిగ్రీల వద్ద సెట్‌ చేసుకోవడం, ఇతర ఎలక్ట్రానిక్‌ ఉపకరణాలను ఇంధన పొదుపు మోడ్‌లో ఉంచడం, ఎల్‌ఈడీ బల్బులను ఉపయోగించడం, తక్కువ నీరు అవసరమయ్యే మినుము లాంటి పంటలను సాగు చేయడం, పంట మార్పిడి విధానాన్ని ప్రోత్సహించడం ద్వారా పర్యావరణాన్ని కాపాడుకోవచ్చు.