ప్రాక్టికల్‌ ఫీల్డ్‌ స్టడీ.. క్విజ్‌ పోటీలు

రాష్ట్ర ఉన్నత విద్య సెమిస్టర్‌ పరీక్షల స్థానంలో నిరంతర సమగ్ర మూల్యాంకనాన్ని ఉన్నత విద్యాశాఖ అమలు చేయనున్నది. ఇండియన్‌ స్కూల్‌ ఆఫ్‌ బిజినెస్‌ (ఐఎస్‌బీ)సూచించిన ఏడు సిఫారసుల మేరకు దీనిని ఈ విద్యాసంవత్సరం నుంచి పైలట్‌ పద్ధతిలో అమలు చేయనున్నారు.

• క్లాస్‌ అయిపోగానే సడెన్‌ ఎగ్జామ్‌
• సెమిస్టర్‌ పరీక్షల స్థానంలో అమలు చేయాలి
• నిరంతర సమగ్ర మూల్యాంకనంపై ఐఎస్‌బీ ఏడు సూచనలు
• ఈ ఏడాది నుంచి ఉన్నత విద్యలో అమలు
• నివేదికను ఆవిష్కరించిన మంత్రి సబితా ఇంద్రారెడ్డి

హైదరాబాద్‌, సెప్టెంబర్‌ 11 (నమస్తే తెలంగాణ) : రాష్ట్ర ఉన్నత విద్య సెమిస్టర్‌ పరీక్షల స్థానంలో నిరంతర సమగ్ర మూల్యాంకనాన్ని ఉన్నత విద్యాశాఖ అమలు చేయనున్నది. ఇండియన్‌ స్కూల్‌ ఆఫ్‌ బిజినెస్‌ (ఐఎస్‌బీ)సూచించిన ఏడు సిఫారసుల మేరకు దీనిని ఈ విద్యాసంవత్సరం నుంచి పైలట్‌ పద్ధతిలో అమలు చేయనున్నారు. ప్రస్తుత మూల్యాంకన పద్ధతులను సమగ్రంగా అధ్యయనం చేసిన ఇండియన్‌ స్కూల్‌ ఆఫ్‌ బిజినెస్‌ ‘అసెస్సింగ్‌ అసెస్‌మెంట్‌ ఇన్‌ హైయ్యర్‌ ఎడ్యుకేషన్‌ ఏ స్టడీ ఆఫ్‌ ది అసెస్‌మెంట్‌ అండ్‌ ఎవల్యూషన్‌ సిస్టమ్స్‌ ఇన్‌ హయ్యర్‌ ఎడ్యుకేషన్‌ ఇన్‌ ది స్టేట్‌ ఆఫ్‌ తెలంగాణ’ పేరిట అధ్యయన నివేదికను రూపొందించింది. సోమవారం ఈ నివేదికను హైదరాబాద్‌లోని ఉన్నత విద్యామండలి కార్యాలయంలో మంత్రి సబితాఇంద్రారెడ్డి విడుదల చేశారు. ఐఎస్‌బీ సిఫారసులను ఇప్పటికే ఓయూలో అమలు చేస్తున్నామని మంత్రి తెలిపారు. మిగతా వర్సిటీల్లో కూడా పూర్తిస్థాయిలోకి ఆచరణలోకి తీసుకొస్తామని, ఇందుకు ఒక కమిటీని కూడా నియమిస్తామని మంత్రి సబితా ఇంద్రారెడ్డి స్పష్టంచేశారు.

సమగ్ర మూల్యాంకన పద్ధతులివే..
విద్యార్థులను ప్రాక్టికల్‌ ఫీల్డ్‌ స్టడీకి తీసుకెళ్తారు. ఫీల్డ్‌స్టడీలో ఏం నేర్చుకున్నారో అక్కడికక్కడే రాయమని టీచర్‌ చెబుతారు. క్లాస్‌ రూంలో విద్యార్థులను బృందాలుగా విడగొట్టి క్విజ్‌ పోటీ పెడతారు. విద్యార్థులకు ఒక సమస్యను ఇచ్చి పరిష్కరించమంటారు. క్లాస్‌ చెప్పిన వెంటనే అధ్యాపకుడు సడెన్‌గా ఎగ్జామ్‌ పెట్టి.. అప్పటికప్పుడే పేపర్లు దిద్దుతారు. ఇలా ప్రతి కృత్యాన్ని మూల్యాంకనం చేస్తారు. ఇలా పాఠశాల విద్యలో అవలంబిస్తున్న ‘నిరంతర సమగ్ర మూల్యాంకనాన్ని’ ఉన్నత విద్యలోని సెమిస్టర్‌ పరీక్షల స్థానంలో అమలు చేస్తారు.

అధ్యయన ఫలితాలు..

• ప్రస్తుతం అవలంబిస్తున్న మూల్యాంకన పద్ధతులపై 41శాతం అధ్యాపకులు, ఆచార్యులు అసంతృప్తి వ్యక్తంచేశారు.
• కేవలం 14శాతం విద్యార్థులు మాత్రమే ప్రస్తుతమున్న మూల్యాంకన పద్ధతులను సమర్థించారు. అధ్యాపకులలో ఉత్తమంగా ఉన్నాయన్నది 3శాతం మాత్రమే.

ఐఎస్‌బీ ఏడు సిఫారసులివే..

• ప్రతి విశ్వవిద్యాలయంలో అసెస్‌మెంట్‌, ఎవల్యూషన్‌ కోసం ప్రత్యేకంగా ఇన్నోవేషన్‌ సెంటర్లను ఏర్పాటు చేయాలి. టాస్క్‌ఫోర్స్‌ను ఏర్పాటు చేసి, ఒక అధికారిని ప్రత్యేకంగా నియమించాలి. అన్ని సబ్జెక్టుల నిపుణులు, యువ ఆచార్యులను ఈ టాస్క్‌ఫోర్స్‌లో భాగస్వామ్యం చేయాలి. నిధులను సమకూర్చాలి.
• విద్యార్థులేం కోరుకుంటున్నారు.. విద్యాసంస్థల యాజమాన్యాలు, అధ్యాపకులు ఏం ఆశిస్తున్నారో తెలుసుకొనేందుకు ఎప్పటికప్పుడు సంప్రదింపులు జరపాలి. ఇందుకోసం ప్రత్యేకంగా వ్యవస్థను ఏర్పాటు చేయాలి.
• వచ్చే ఆరు మాసాల్లో శ్రేష్టమైన మూల్యాంకన పద్ధతులను రూపొందించాలి. ఫార్మేటివ్‌ అసెస్‌మెంట్‌ పద్ధతులను అనుసరించాలి. క్షేత్ర సందర్శనలు, ప్రాజెక్ట్‌ అధ్యయనాలు, ఇంటర్న్‌షిప్‌లు, పరిశ్రమల సందర్శనలు, సమస్యా పరిష్కార ప్రాజెక్ట్‌లు, క్విజ్‌లు, ఆన్‌లైన్‌ సిమ్యూలేషన్స్‌, రిఫ్లెక్షన్‌ పేపర్స్‌ వంటి ద్వారా విద్యార్థులను మూల్యాంకనం చేయాలి.
• ఈ విద్యాసంవత్సరం ద్వితీయార్థంలో ఎంపికచేసిన ఐదు కాలేజీల్లో, సబ్జెక్టుల్లో కొత్త మూల్యాంకన పద్ధతులను అమలుచేయాలి. అటానమస్‌ కాలేజీల్లో ఈ పద్ధతులను అమలుపరచడం ఉత్తమం.
• అధ్యాపకులు, ఆచార్యుల శిక్షణకు ప్రాధాన్యం ఇవ్వాలి. ఇందుకోసం తగినంత నిధులను వెచ్చించాలి.
• ఫలితాలను ఎప్పటిప్పుడు అధ్యయనం చేయాలి. దశల వారీగా విస్తృతస్థాయిలో కొలమానం చేస్తూ ఉండాలి.
• దీర్ఘకాలంలో విద్యార్థుల జ్ఞాపకశక్తి మాత్రమే మూల్యాంకనం చేయడానికి బదులుగా వారి జ్ఞానాన్ని మూల్యాంకనం చేసే దిశగా మార్పులు తీసుకురావాలి.