Visit:
Sarpanch Elections | నేలకొండపల్లి (కూసుమంచి), నవంబర్‌ 28:‘నన్ను సర్పంచ్‌ను చేయండి.. ఊరిలో ఊహించని అభివృద్ధి చేస్తా. సర్కారు ఇచ్చినా, ఇవ్వకున్నా.. తన సొంత ఖర్చులతో ఊరంతటికీ ఉపకారం చేస్తా’ అని ఎన్ఆర్ఐ అయిన ఆశావహుడైన సర్పంచ్‌ అభ్యర్థి తన సొంతూరి ప్రజలకు బంపర్‌ ఆఫర్‌ ఇచ్చాడు. తనను గెలిపించినా, ఏకగ్రీవం చేసినా ఊరికి అన్నీ తన సొంత ఖర్చులతో సేవ చేస్తానని అదిరిపోయే హామీలతో ఓ మ్యానిఫెస్టోనే విడుదల చేశాడు. ఆ మ్యానిఫెస్టో ఇప్పుడు సోషల్‌ మీడియాలో వైరల్‌గా మారింది. ఎన్ఆర్ఐ రావెళ్ల కృష్ణారావు స్వగ్రామం ఖమ్మం జిల్లా నేలకొండపల్లి మండలం మోటాపురం. ఆ పంచాయతీ పరిధిలో 1,900 జనాభా, 1,500 మంది ఓటర్లు ఉన్నారు.
తాను చేసే సేవలన్నింటినీ పొందుపరుస్తూ మ్యానిఫెస్టోను రూపొందించి గ్రామస్థుల ముందుంచాడు. ఇదే విషయంపై ఆయన్ని ‘నమస్తే తెలంగాణ’ సంప్రదించగా తన మనసులోని మాటను వెలిబుచ్చాడు. తాను పుట్టిన ఊరికి సేవ చేయాలన్నదే తన తపన అని కృష్ణారావు చెప్పారు. తన మిత్రులు, ఇతర ఎన్‌ఆర్‌ఐల సహకారంతో గ్రామ అవసరాలు తీర్చాలనుకుంటున్నట్టు వివరించారు. కృష్ణారావు ఇచ్చిన హామీలు నెరవేరాలంటే ఏటా రూ.35 లక్షల ఖర్చు అవుతుందని, ఆ మొత్తాన్ని ఏటా పంచాయతీ ఖాతాలో డిపాజిట్‌ చేస్తానంటే తాము కూడా అంగీకరిస్తామని వివిధ పార్టీల నాయకులు, ఇతర గ్రామస్థులు అభిప్రాయాలు వ్యక్తంచేస్తున్నారు.
సర్పంచ్‌గా తనకు గ్రామస్థులు అవకాశం ఇస్తే మోటాపురం గ్రామ పంచాయతీ పరిధి లో చేపట్టే పనుల వివరాలను రావెళ్ల కృష్ణారా వు కూలంకశంగా మ్యానిఫెస్టోలో పొందుపర్చారు. వీరన్నస్వామి ఆలయ నిర్మాణానికి రూ.50 లక్షల విలువైన భూమి విరాళం, అందరి ఇంటి పన్నులు, నల్లా బిల్లుల చెల్లిం పు, గ్రంథాలయ భవన నిర్మాణం, ప్రతినెలా వైద్య శిబి రం, ఉచితంగా మందుల పంపిణీ, ఆర్వో ప్లాంట్‌ ఏర్పాటు, వివాహాలు, జాతరలకు డీజే ఏర్పాటు, పేదల వివాహాలకు చీర- సారె, దివ్యాంగులకు ట్రైసైకిళ్ల పంపిణీ, ఆలయాలు, చర్చిలు, మసీదులకు ఏటా రూ.50 వేల చొప్పున విరాళం తదితర హామీలతో మ్యానిఫెస్టోను రూపొందించారు.
