తక్కువ ఖర్చుతో మినరల్‌ వాటర్‌

మనం నిత్యం వాడే నీటిని తక్కువ ఖర్చుతో మినరల్‌ వాటర్‌గా మార్చే అధునాతన పరికరాన్ని తెలంగాణ యువ శాస్త్రవేత్త డాక్టర్‌ శ్రీనాథ్‌ బొలిశెట్టి తయారు చేశారు.

• స్వచ్ఛమైన నీటిని అందించే స్మార్ట్‌ మల్టీప్యూర్‌
• తెలంగాణ యువ శాస్త్రవేత్త శ్రీనాథ్‌ అద్భుత సృష్టి
• ఆర్‌వో ఫిల్టర్లకు ప్రత్యామ్నాయం.. 5 వేలకే లభ్యం

హైదరాబాద్‌, ఏప్రిల్‌ 4 (నమస్తే తెలంగాణ): మనం నిత్యం వాడే నీటిని తక్కువ ఖర్చుతో మినరల్‌ వాటర్‌గా మార్చే అధునాతన పరికరాన్ని తెలంగాణ యువ శాస్త్రవేత్త డాక్టర్‌ శ్రీనాథ్‌ బొలిశెట్టి తయారు చేశారు. నీటిని వృథా చేయకుండా ఈ పరికరంతో అన్ని రకాల మినరల్స్‌ గల స్వచ్ఛమైన నీటిని తయారు చేసుకోవచ్చని ఆయన చెప్తున్నారు. ‘బ్లూ యాక్ట్‌ స్మార్ట్‌ మల్టీప్యూర్‌ 2.0’ పేరుతో తయారు చేసిన ఈ పరికరాన్ని రాష్ట్ర మీడియా అకాడమీ చైర్మన్‌ అల్లం నారాయణ సోమవారం తన కార్యాలయంలో ఆవిష్కరించారు. ఆర్‌వో ప్యూరిఫయర్లకు ప్రత్యామ్నాయంగా కేవలం రూ.5 వేలకే స్మార్ట్‌ మల్టీప్యూర్‌ 2.0’ను అందుబాటులోకి తెచ్చినట్టు శ్రీనాథ్‌ తెలిపారు.

స్మార్ట్‌ మల్టీప్యూర్‌ 2.0 ప్రత్యేకతలు

• నాలుగు రకాల ఫిల్టర్లు ఉండే ఈ పరికరానికి కరెంట్‌ కనెక్షన్‌ అవసరంలేదు. కేవలం ట్రిపుల్‌-ఏ ఆల్కలీన్‌ బ్యాటరీలతోనే పనిచేస్తుంది
• కుళాయి నీటిని మినరల్‌ వాటర్‌గా మార్చడమే కాకుండా, రంగు, రుచిని మెరుగుపరుస్తుంది.
• కేవలం 2 కిలోల బరువుండే ఈ పరికరాన్ని బిగించడం, వాడటం చాలా సులభం. ప్లంబర్‌ అవసరం లేకుండా నేరుగా నల్లా నుంచి ఇన్‌లెట్‌ పైపును బిగించి, ఔట్‌లెట్‌ పైపు ద్వారా నీళ్లు పట్టుకోవచ్చు.
• ఇందులోని ఫిల్టర్లతో నిమిషానికి లీటర్‌ చొప్పున మొత్తం 4 వేల లీటర్ల నీటిని శుభ్రం చేసుకోవచ్చు.
• ఆ తర్వాత ఫిల్టర్లను మార్చుకొని ఎన్నిరోజులైనా ఉపయోగించుకోవచ్చు.
• బ్లూ యాక్ట్‌ స్మార్ట్‌ మల్టీప్యూర్‌ 2.0 పనితీరును ఎన్‌జీఆర్‌ఐ పరీక్షించింది. శుద్ధజలం తయారవుతున్నట్టు ధ్రువీకరించింది.
• 8 రకాల పేటెంట్లను కలిగివున్న ఈ పరికరాన్ని నిక్షేపంగా వినియోగించవచ్చని ప్రపంచ ఆరోగ్య సంస్థ సైతం తేల్చింది.