గ్రంథాలయ వారోత్సవాలు ప్రారంభం

‘రీడ్‌’ కార్యక్రమంలో భాగంగా నిర్వహణ

హైదరాబాద్‌, ఫిబ్రవరి 14 (నమస్తే తెలంగాణ): విద్యార్థుల్లో పఠనాసక్తిని పెంపొందించేందుకు ‘రీడ్‌’ కార్యక్రమంలో భాగంగా గ్రంథాలయ వారోత్సవాలు నిర్వహిస్తున్నట్టు స్టేట్‌ కో ఆర్డినేటర్‌ సువర్ణ వినాయక్‌ వెల్లడించారు. చదువు – ఆనందించు – అభివృద్ధి చెందు పేరుతో రాష్ట్రంలో 100 రోజుల కార్యక్రమం చేపట్టినట్టు తెలిపారు. పాఠశాలల్లో సోమవారం నుంచి ప్రారంభమైన ఈ కార్యక్రమం ఈ నెల 21 వరకు కొనసాగుతుందని తెలిపారు. షెడ్యూల్‌ ప్రకారం కార్యక్రమాలు నిర్వహించాలని సూచించారు.

రోజువారీగా చేపట్టాల్సిన కార్యక్రమాలు

• 15న ప్రముఖులను (తల్లిదండ్రులు, విశ్రాంత ఉపాధ్యాయులు, స్వచ్ఛంద సంస్థలు, సాహితీవేత్తలు, సాహితీ సంస్థల బాధ్యులు) పాఠశాలకు ఆహ్వానించి గ్రంథాలయ ప్రాధాన్యత గురించి మాట్లాడించాలి.
• 16న పాఠశాల గ్రంథాలయాన్ని బలోపేతం చేయటానికి దాతలను గుర్తించి, బడికి ఆహ్వానించి పుస్తక సేకరణ కార్యక్రమం నిర్వహించాలి.
• 17న పాత వార్తాపత్రికలు, మ్యాగజైన్లు, ఇంటర్‌నెట్‌ నుంచి కథలు, పజిల్స్‌ సేకరించి పిల్లలతో రీడింగ్‌ కార్డులు తయారు చేయించాలి.
• 18న బడిలో మాతృభాష ప్రాధాన్యత గురించి వ్యాసరచన, ఉపన్యాస, చిత్రలేఖన పోటీలు నిర్వహించాలి.
• 19న పఠన పోటీల్లో భాగంగా పద్యపఠన పోటీలు నిర్వహించాలి.
• 21న మాతృభాషా దినోత్సవాన్ని ఘనంగా నిర్వహించాలి.