బీఆర్‌ఎస్‌పై నిఘా.. భద్రతకు దగా!

నడిరోడ్లపైనే హత్యలు.. బహిరంగంగా దోపిడీలు..మహిళలపై విచ్చలవిడిగా పెరిగిపోతున్న దాడులు.. ప్రస్తుతం రాష్ట్రంలో పరిస్థితి ఇది. నేరాలను నియంత్రించాల్సిన పోలీస్‌ విభాగం అసలు పనిని వదిలేయడం వల్లే ఈ పరిస్థితి దాపురించిందనే ఆరోపణలు ఉన్నాయి.

• నేరాల నియంత్రణ గాలికి.. బీఆర్‌ఎస్‌ నేతలపైనే ఇంటెలిజెన్స్‌ విభాగం ఫోకస్‌
• నేరాల నియంత్రణను పక్కనబెట్టిన యంత్రాంగం
• ధర్నాలు, ఆందోళనలు అడ్డుకోవడానికే ప్రాధాన్యం
• సివిల్‌ వివాదాల్లో తలదూర్చుతున్న అధికారులు
• రాష్ట్రవ్యాప్తంగా విపరీతంగా పెరిగిపోతున్న నేరాలు
• అభాసుపాలవుతున్న రాష్ట్ర పోలీసుశాఖ తీరు
• ఫోన్ల ట్యాపింగ్‌, లొకేషన్‌ ట్రేసింగ్‌పైనే మొత్తం దృష్టి
• ధర్నాలు, ఆందోళనలు అడ్డుకోవడానికే ప్రాధాన్యం
• నడిరోడ్లపై హత్యలు, బహిరంగంగా చోరీలు
• మహిళల పట్ల విచ్చలవిడిగా పెరిగిన నేరాలు
• పొరుగు రాష్ర్టాల పోలీసుల సీక్రెట్‌ ఆపరేషన్లు
• సంఘ విద్రోహ శక్తులపై తగ్గిపోత్తున్న నిఘా

హైదరాబాద్‌, సెప్టెంబర్‌ 13 (నమస్తే తెలంగాణ): నడిరోడ్లపైనే హత్యలు.. బహిరంగంగా దోపిడీలు..మహిళలపై విచ్చలవిడిగా పెరిగిపోతున్న దాడులు.. ప్రస్తుతం రాష్ట్రంలో పరిస్థితి ఇది. నేరాలను నియంత్రించాల్సిన పోలీస్‌ విభాగం అసలు పనిని వదిలేయడం వల్లే ఈ పరిస్థితి దాపురించిందనే ఆరోపణలు ఉన్నాయి. రాష్ట్రంలో పోలీసుల ఫోకస్‌ పూర్తిగా మారిపోయిందనే విమర్శలు ఉన్నాయి. రాజకీయచట్రంలో చిక్కుకున్న కొందరు ఉన్నతాధికారుల కారణంగా సిబ్బంది శాంతి భద్రతలను గాలికి వదిలేస్తున్నారన్న విమర్శలు వినిపిస్తున్నాయి. నేరస్తులపై నిఘా వదిలేసి ప్రతిపక్ష రాజకీయ నేతలపైనే నిఘా పెడుతుండటంతో నేరాల సంఖ్య క్రమంగా పెరుగుతున్నదని చర్చ జరుగుతున్నది. రాష్ట్రంలో బీఆర్‌ఎస్‌ గ్రామ కార్యకర్తలు మొదలు మండల, జిల్లా, రాష్ట్ర స్థాయి నాయకులపై పోలీసు నిఘా పెరిగిందన్నది బహిరంగ రహస్యం. అంతేకాదు.. పొద్దున లేచింది మొదలు ‘ఈ రోజు ప్రభుత్వానికి వ్యతిరేకంగా ఎవరు ఆందోళనలు చేస్తున్నారు? ఎప్పుడు ధర్నాలు చేస్తున్నారు.? వారు ఎక్కడున్నారు?’ వంటి వివరాలు కనుక్కోవడానికే సమయం సరిపోతున్నదని పోలీస్‌ వర్గాలే పేర్కొంటున్నాయి. వారి మొబైల్‌ నంబర్లు కనుక్కొని, ఆ నంబర్లను ట్రేస్‌ చేస్తూ, ముందస్తు అరెస్టులు చేయడానికి, వారు హైదరాబాద్‌ వరకు చేరకుండా అడ్డుకోవడానికే పూర్తి సమయం వెచ్చించాల్సి వస్తున్నదని వాపోతున్నారు.

రాజకీయ చక్రంలో చిక్కి..
మండలస్థాయి నుంచి జిల్లా ఎస్పీ కార్యాలయాల వరకూ పోలీసులు రాజకీయ చట్రంలో కొట్టుమిట్టాడుతున్నారన్న ఆరోపణలు ఉన్నాయి. జిల్లా పోలీసు బాసులు స్థానిక రాజకీయ నేతలు, మంత్రులు చెప్పే అంశాలపైనే ఎక్కువగా దృష్టిసారిస్తూ అసలు డ్యూటీలను పక్కన పెడుతున్నారనే విమర్శలు వస్తున్నాయి. యూరియా కోసం ఇబ్బందులు పడుతున్న రైతుల ఇండ్లకు వెళ్లి బెదిరించడం, తమ చెప్పులతో తామే కొట్టుకున్నా కూడా రైతులపై కేసులు పెట్టే స్థాయికి దిగజారడమే ఇందుకు నిదర్శనంగా పేర్కొంటున్నారు. చాలామంది పోలీసులు భూ వివాదాల్లో తలదూర్చుతున్నారనేది బహిరంగ రహస్యం. సివిల్‌ వివాదాలను పక్కనపెట్టి, నేరాల కట్టడికి కృషి చేయాలని ఇప్పటికే సుప్రీంకోర్టు, డీజీపీ హెచ్చరించినా కొందరి తీరు మారడం లేదు. నేరాలను తగ్గించడానికి ప్రణాళికలు రచించడం, పెట్రోలింగ్‌ పెంచడం, మహిళలకు, ప్రజలకు భరోసా కల్పించడం వంటి పోలీసుల డ్యూటీని ఎప్పుడో వదిలేశారని బాధితులు ఆరోపిస్తున్నారు.

స్టేషన్‌ రావడమే మానేశారు
కొందరు ఖాకీలు రోజూ గంటల తరబడి ల్యాండ్‌ సెటిల్‌మెంట్లు, సొంత పనుల్లో కాలం వెళ్లదీస్తున్నారని విమర్శిస్తున్నారు. వారు స్టేషన్లలో అందుబాటులో ఉండకపోవడంతో ఫిర్యాదుదారులు గంటల తరబడి ఎదురుచూసి, నిరాశగా వెనుదిరుగుతున్నారని ఆవేదన వ్యక్తం చేస్తున్నారు. కొందరు ఎస్‌హెచ్‌వోలు ఉదయం పదిగంటలకు స్టేషన్‌లో దర్శనమిస్తే మళ్లీ రాత్రి 7 గంటల తర్వాతే ఫిర్యాదుదారులను కలుస్తున్నారని విమర్శలు ఉన్నాయి. పోలీసు వ్యవస్థ పనితీరు కోసం ఏర్పాటు చేసిన క్యూఆర్‌ కోడ్‌ ఫిర్యాదుల్లో ఇదే విషయం తేటతెల్లమైంది.

నేరగాళ్లకు భయం పోతున్నది
పోలీసులు తమ డ్యూటీలను పక్కన పెట్టడం, గ్రామస్థాయిలో సరైన పెట్రోలింగ్‌ లేకపోవడం, పెరుగుతున్న పట్టణీకరణకు అనుగుణంగా నిఘా పెట్టకపోవడం వల్ల నేరస్తులకు పోలీసులు అంటేనే భయం లేకుండా పోతున్నదన్న ఆరోపణలు ఉన్నాయి. నేరం చేసే సమయంలో ‘పోలీసులు పట్టుకుంటారేమో? జైలుకు పంపుతారేమో? శిక్ష పడుతుందేమో?’ అనే భయం ఏ మాత్రం కనిపించడం లేదని పోలీస్‌ వర్గాలే పేర్కొంటున్నాయి. అందుకే నేరం చేయాలనుకునే వారు నిర్భయంగా, జంకు లేకుండా దారుణాలకు ఒడిగడుతున్నారు. నడి రోడ్డుపైనే అత్యంత దారుణంగా ప్రత్యర్థులను నరికి చంపడం, ‘ఎందుకు?’ అని అడిగితే.. ‘మమ్మల్ని అనేవారు ఎవరు?’ అంటూ నిర్భయంగా సమాధానాలు చెప్తున్న పరిస్థితి. పోలీసులు పట్టుకుంటారనే భయం లేకుండా పట్టపగలే చోరీలు, హత్యలు, దోపిడీలు, మహిళలపై అఘాయిత్యాలు వంటి తీవ్రమైన నేరాలు పెరుగుతున్నట్టు చర్చ జరుగుతున్నది. ఇక విచ్చలవిడిగా మద్యం, డ్రగ్స్‌ దొరకడం కూడా నేరాల పెరుగుదలకు కారణమన్న ఆరోపణలు ఉన్నాయి. పాత నేరస్తులే కాదు కొత్తగా నేరాలు చేయాలనుకున్న వారిలోనూ భయం ఏమాత్రం లేకపోవడం ఆందోళనకరం. తెలంగాణలో ఇటీవల నమోదైన నేరాల్లో కొత్తగా నేరం చేసిన వారే 80శాతం వరకూ ఉండటం ఆందోళన కలిగించే అంశం.

పక్క రాష్ర్టాల నుంచి సీక్రెట్‌ ఆపరేషన్లు
తెలంగాణ పోలీసులకు తెలియకుండా పక్క రాష్ర్టాల పోలీసులు, జాతీయ దర్యాప్తు సంస్థలు ఇక్కడికి వచ్చి రహస్యంగా ఆపరేషన్లు నిర్వహిస్తున్నారు. వారు వచ్చి.. పెద్ద పెద్ద కేసుల్లో నిందితులను అరెస్టు చేసి, ట్రాన్సిట్‌ వారెంట్‌కు వెళ్లే వరకూ మనోళ్లకు సమాచారం లేకపోవడం గమనార్హం. ఇటీవల చర్లపల్లి డ్రగ్స్‌ కేసులో మహరాష్ట్ర పోలీసుల ఆపరేషన్‌ ఇలానే జరిగింది. గతంలో ఛత్తీస్‌గఢ్‌ పోలీసులు, ముంబై క్రైమ్‌ బ్రాంచ్‌ పోలీసులు పలు కేసుల్లో సీక్రెట్‌ ఆపరేషన్లు నిర్వహించారు. ఇటీవల తెలంగాణలో ఉగ్రవాదులు ఉన్నారంటూ జాతీయ దర్యాప్తు సంస్థ (ఎన్‌ఐఏ) వచ్చి బోధన్‌లో అరెస్టు చేసింది. పాకిస్థాన్‌తో కలిసి కుట్రలు చేస్తున్న హైదరాబాద్‌కు చెందిన సమీర్‌ను అదుపులోకి తీసుకుంది. గతంలో గూఢచర్యం చేస్తున్నారని పలుచోట్ల తనిఖీలు నిర్వహించింది. మావోయిస్టులను రహస్యంగా అరెస్టు చేసిన ఘటనలు ఉన్నాయి. కనీసం ఇప్పటికైనా రాష్ట్ర పోలీస్‌ శాఖ మేల్కొనాలని ప్రజలు కోరుతున్నారు.

కొన్ని కీలక కేసులు..

• ఈనెల 12న కుషాయిగూడలో రియల్‌ ఎస్టేట్‌ వ్యాపారి శ్రీకాంత్‌రెడ్డిని నడిరోడ్డుపై ఇద్దరు దారుణంగా పొడిచి చంపారు.
• ఈనెల 10న రేణు అగర్వాల్‌ను ఇద్దరు వ్యక్తులు దారుణంగా చంపి.. నగలు, నగదుతో పరారయ్యారు.
• కూకట్‌పల్లిలో ఆగస్టు 18న 12 ఏండ్ల బాలికను ఓ బాలుడు దారుణంగా హత్య చేశాడు.
• ఆగస్టు 12న ఉదయం 10.30 నిమిషాలకు హైదరాబాద్‌, చందానగర్‌లోని ఖజానా జ్యువెలరీ షాపులో భారీ చోరీ జరిగింది.
• ఈనెల 7న కరీనంగర్‌లో ఎమర్జెన్సీ వార్డులో యువతిపై ఓ కాంపౌండర్‌ అత్యాచారం చేశాడు.
• ఈనెల 7న రంగారెడ్డి జిల్లా యాచారం మండలంలో బాలికపై ఇద్దరు యువకులు అత్యాచారం చేశారు.
• మే 2న పెద్దపల్లిలో ఓ మహిళలను అత్యంత కిరాతకంగా హతమార్చారు.
• ఏప్రిల్‌ 1న నాగర్‌ కర్నూల్‌ జిల్లాలో ఓ మహిళపై ఏడుగురు కిరాతంగా సామూహిక అత్యాచారం చేసి, నోట్లో మూత్రం పోసిన ఘటన సంచలంగా మారింది.
• కాచిగూడలో వ్యాపారవేత్త ఇంట్లో పనివాళ్ళే మత్తుమందు ఇచ్చి సుమారు రూ. 50 లక్షల నగదు, కిలో బంగారం అపహరించారు.
• రంగారెడ్డి జిల్లా కొత్తపల్లిలో పట్టపగలు సినీ ఫక్కీలో రూ.40 లక్షలు దారిదోపిడీ చేశారు.
• బ్యాంకులో ఓ బాలుడు రూ.5 లక్షలు కాజేసిన ఘటన సంచలనంగా మారింది.
• గద్వాలలో 32 ఏళ్ల ల్యాండ్‌ సర్వేయర్‌ గంట తేజేశ్వర్‌ హత్య.
• ఈ ఏడాది ఏప్రిల్‌ 1న నగరంలోని పహాడిషరీఫ్‌ పరిధిలో జర్మనీ నుంచి వచ్చిన యువతిపై కారు డ్రైవర్‌ అత్యాచారానికి పాల్పడ్డాడు.
• 2025 జూన్‌ 14న కాంగ్రెస్‌ నాయకుడు మారెల్లి అనిల్‌ను నిందితులు తుపాకీతో కాల్చి చంపారు.
• 2025 జూన్‌ 14న మలక్‌ పేటలో సీపీఐ నేతపై కంట్లో కారం కొట్టి కాల్పులు జరిపి చంపారు.
• 2025 ఫిబ్రవరి 1న ప్రిజం పబ్‌ వద్ద మోస్ట్‌ వాంటెడ్‌ క్రిమినల్‌ బత్తుల ప్రభాకర్‌, సైబరాబాద్‌ సీసీఎస్‌ పోలీసులపై కాల్పులు జరిపాడు.
• 2024 నవంబర్‌ 1న హైదరాబాద్‌ సరూర్‌ నగర్‌ పోలీస్‌ స్టేషన్‌ పరిధిలోని వెంకటేశ్వర కాలనీలో ఓ వ్యక్తి తాను ప్రేమించిన అమ్మాయి తండ్రిపై ఎయిర్‌ గన్‌తో కాల్పులు జరిపాడు.

ఇటీవల తెలంగాణలో నమోదైన నేరాల గణాంకాలు

• 2024లో 2.34 లక్షలు
• హైదరాబాద్‌ కమిషనరేట్‌ పరిధిలో41%
• సైబరాబాద్‌లో65%క్రైం డిటెక్షన్‌ రేట్‌ 31%
• ఛేదించలేకపోయిన నేరాల సంఖ్య 163
• అసభ్య ప్రవర్తనపై నమోదైన కేసులు11,325

పెరిగిన కేసులు శాతం

• వరకట్న మరణాలు 6.35
• వేధింపుల కేసులు 2.61
• ఇండ్లలో దోపిడీలు 5