హైదరాబాద్‌లో మౌలిక వసతులు భేష్‌

విశ్వనగరంగా ఎదుగుతున్న హైదరాబాద్‌లో మౌలిక వసతుల కల్పన అద్భుతంగా జరుగుతున్నదని ప్రశంసలు వెల్లువెత్తున్నాయి.

• సౌకర్యాల కల్పన వల్లే కంపెనీలకు ప్రధాన గమ్యస్థానం
• బెంగళూరులో వసతులు అధ్వాన్నం
• ఎయిమ్స్‌ పూర్వ విద్యార్థి డాక్టర్‌ ప్రసాద్‌ గురు ట్వీట్‌
• హైదరాబాద్‌ ఫైనాన్షియల్‌ డిస్ట్రిక్ట్‌ ఫొటోలు షేర్‌.. నెటిజన్ల విస్తృత చర్చ

హైదరాబాద్‌ సిటీబ్యూరో ప్రధాన ప్రతినిధి, అక్టోబర్‌ 14 (నమస్తే తెలంగాణ): విశ్వనగరంగా ఎదుగుతున్న హైదరాబాద్‌లో మౌలిక వసతుల కల్పన అద్భుతంగా జరుగుతున్నదని ప్రశంసలు వెల్లువెత్తున్నాయి. తెలంగాణ ప్రభుత్వం గత ఎనిమిదేండ్ల నుంచి వేల కోట్ల రూపాయలతో విస్తృత స్థాయిలో మౌలిక వసతులను కల్పిస్తుండటం ఇతర మెట్రో నగరాల వాసులనూ ఆకర్షిస్తున్నదని, అందుకే వివిధ కంపెనీలు, వ్యాపారాలకు హైదరాబాద్‌ దేశంలోనే ప్రధాన గమ్యస్థానంగా మారుతున్నదని ఎయిమ్స్‌ పూర్వ విద్యార్థి డాక్టర్‌ ప్రసాద్‌ గురు కొనియాడారు.

ఈ మేరకు ఆయన గురువారం సాయంత్రం ఓ ట్వీట్‌ చేశారు. భారత సిలికాన్‌ వ్యాలీగా పేరు పొందిన కర్ణాటక రాజధాని బెంగళూరులో మౌలిక వసతుల కల్పన హైదరాబాద్‌లో జరిగినంత విస్తృతంగా జరగడం లేదని ఆ ట్వీట్‌లో అభిప్రాయపడ్డారు. ఆ ట్వీట్‌కు రాజకీయాన్ని కూడా జోడించిన డాక్టర్‌ ప్రసాద్‌ గురు.. కర్ణాటకలో సీఎం బసవరాజ్‌ బొమ్మైతోపాటు సిద్ధరామయ్య, డీకే శివకుమార్‌, కుమారస్వామి లాంటి ప్రతిపక్ష నేతలంతా బెంగళూరులో మౌలిక వసతుల కల్పనను విస్మరిస్తున్నారని, ఇది ఇలాగే కొనసాగితే భవిష్యత్తులో కంపెనీలకు హైదరాబాదే ప్రధాన గమ్యస్థాంగా మారుతుందని కుండ బద్ధలుకొట్టారు.

హైదరాబాద్‌ ఫైనాన్షియల్‌ డిస్ట్రిక్ట్‌ పరిధిలోని టీ-హబ్‌, కేబుల్‌ బ్రిడ్జి, రహేజా మైండ్‌ స్పేస్‌ తదితర ప్రాంతాల్లో మౌలిక వసతుల అభివృద్ధికి అద్ధం పట్టే 4 ఫొటోలను జోడించడంతో ఆయన ట్వీట్‌ వైరల్‌గా మారింది. రాష్ట్ర పురపాలక శాఖ మంత్రి కేటీఆర్‌ సహా ఎంతో మంది లైక్‌లు కొట్టడంతో ఆ ట్వీట్‌పై బెంగళూరు, హైదరాబాద్‌కు చెందిన వందలాది మంది నెటిజన్ల మధ్య చర్చ మొదలైంది.

నెటిజన్ల స్పందన ఇదీ..

• హైదరాబాద్‌లో మౌలిక వసతుల కల్పన అద్భుతంగా జరుగుతున్నది. మంత్రి కేటీఆర్‌ ముందు చూపే ఇందుకు కారణం. ప్రస్తుతం దేశంలో మెడికల్‌ టూరిజం రంగంలో చెన్నై తర్వాత హైదరాబాద్‌ ద్వితీయ స్థానంలో ఉన్నది.
• బెంగళూరును అధిగమించి దేశ ఐటీ రాజధానిగా ఆవిర్భవించే దిశగా హైదరాబాద్‌ పరుగులు తీస్తున్నది. రానున్న 10-15 ఏండ్లలో హైదరాబాద్‌ ఈ ఘనత సాధించడం ఖాయం.
• ప్రస్తుతం కర్ణాటకలో అనైతిక రాజకీయాలు కొనసాగుతుండటంతో కంపెనీలన్నీ హైదరాబాద్‌ వైపే చూస్తున్నాయి.
• బీజేపీ నాయకులంతా ఇప్పుడు రైళ్ల పేర్లను మార్చడంలో బిజీగా ఉన్నారు. ఒకవేళ కంపెనీలు హైదరాబాద్‌కు తరలిపోకుండా ఉంటే అప్పుడు బెంగళూరులో మౌలిక వసతుల కల్పనపై ఆలోచిస్తారేమో. అది కూడాతదుపరి ఎన్నికలు ఎప్పుడు జరుగుతాయన్న దానిపైనే ఆధారపడి ఉంటుంది.
• హైదరాబాద్‌లో జూబ్లీహిల్స్‌ నుంచి ఐటీ కారిడార్‌కు వెళ్లేవారికి దుర్గం చెరువుపై నిర్మించిన కేబుల్‌ బ్రిడ్జి చాలా ఉపకరిస్తున్నది. హైటెక్‌ సిటీని చేరుకొనేవారికి ఇది ఎంతో సమయాన్ని ఆదా చేస్తున్నది.
• భాగ్యనగరం, సైబరాబాద్‌, హైటెక్‌ సిటీ, సిటీ ఆఫ్‌ పెరల్స్‌, సిటీ ఆఫ్‌ నవాబ్స్‌, వరల్డ్‌ బిర్యానీ క్యాపిటల్‌, ఇండియాస్‌ ఫార్మాస్యూటికల్‌ కెప్టెన్‌ లాంటి ఎన్నో పేర్లతో భాసిల్లుతున్న హైదరాబాద్‌ ప్రపంచంలోనే రెండవ అతిపెద్ద ఐమ్యాక్స్‌ థియేటర్‌ను, భారత్‌లో తొలి ఐకియా స్టోర్‌ను కలిగి ఉండటం ఎంతో సానుకూల అంశం.
• వాస్తవానికి హైదరాబాద్‌ ఇప్పటికే ఐటీ రంగంలో బెంగళూరును అధిగమించింది. గత ఆర్థిక సంవత్సరం బెంగళూరులో కొత్తగా 1,48,500 మందికి ఐటీ ఉద్యోగాలు వస్తే.. హైదరాబాద్‌లో 1.53 లక్షల ఉద్యోగాలు వచ్చాయి.
• రహదారుల విస్తరణ, రద్దీ ప్రాంతాల్లో ఫ్లైఓవర్ల నిర్మాణంలో బెంగళూరు గత 30 ఏండ్ల నుంచి విఫలమవుతున్నది.
• దేశంలో ట్రాఫిక్‌ సమస్యలు అత్యధికంగా ఉండే నగరాల్లో బెంగళూరు ప్రధానమైనది. మెట్రో నగరాల్లో వరద నీరు నిలవడం సాధారణమే అయినప్పటికీ బెంగళూరులో ఈ సమస్య మరీ దారుణం.
• హైదరాబాద్‌లో అంతర్జాతీయ ప్రమాణాలతో కూడిన మౌలిక వసతులు అందరినీ ఆకర్షిస్తున్నాయి. అక్కడికి తరలి వెళ్తున్న కంపెనీలు, ప్రజలకు శుభాకాంక్షలు.