ఇంజినీరింగ్‌ సీట్ల కన్వర్షన్‌కు అనుమతి

ఇంజినీరింగ్‌ కోర్సుల్లో సీట్ల కన్వర్షన్‌కు ప్రభుత్వం అవకాశం కల్పించింది. ఈ మేరకు విద్యాశాఖ జీవో 170ని జారీచేసింది. ఈ నేపథ్యంలో సీట్ల మార్పిడికి 100కు పైగా కాలేజీలు దరఖాస్తులు సమర్పించాయి. దీంతో ఇంజినీరింగ్‌లో కంప్యూటర్‌ సైన్స్‌.. ఐటీ రిలేటెడ్‌ కోర్సుల్లో మరో 9,120 సీట్లు పెరిగాయి. వీటిని ఎంసెట్‌ రెండో విడత కౌన్సెలింగ్‌లో భాగంగా భర్తీచేస్తారు

• జీవో 170ని జారీచేసిన విద్యాశాఖ
• సీఎస్‌ఈలో కొత్త సీట్లు 9,120
• సివిల్‌, మెకానికల్‌, ట్రిపుల్‌ఈ కోర్సుల్లో భారీగా తగ్గిన సీట్లు

హైదరాబాద్‌, సెప్టెంబర్‌ 22 (నమస్తే తెలంగాణ): ఇంజినీరింగ్‌ కోర్సుల్లో సీట్ల కన్వర్షన్‌కు ప్రభుత్వం అవకాశం కల్పించింది. ఈ మేరకు విద్యాశాఖ జీవో 170ని జారీచేసింది. ఈ నేపథ్యంలో సీట్ల మార్పిడికి 100కు పైగా కాలేజీలు దరఖాస్తులు సమర్పించాయి. దీంతో ఇంజినీరింగ్‌లో కంప్యూటర్‌ సైన్స్‌.. ఐటీ రిలేటెడ్‌ కోర్సుల్లో మరో 9,120 సీట్లు పెరిగాయి. వీటిని ఎంసెట్‌ రెండో విడత కౌన్సెలింగ్‌లో భాగంగా భర్తీచేస్తారు. సివిల్‌, మెకానికల్‌, ట్రిపుల్‌ ఈ విభాగాల్లో భారీగా సీట్లు రద్దు అయ్యాయి. ఇంజినీరింగ్‌ బ్రాంచిల్లో కనీస సీట్ల సంఖ్య 30కి పడిపోయింది. గతేడాది 60 సీట్లు ఉండగా, ఈ ఏడాది 30కి కుదించారు. కాలేజీల్లోని కోర్సులను పూర్తిగా రద్దుచేయరాదని, 50 శాతం కనీస సీట్లతో బ్రాంచిలను నిర్వహించాలని ఏఐసీటీఈ ఆదేశాలిచ్చింది.

పలు ఉదాహరణలిలా

• జీహెచ్‌ఎంసీ కొంపల్లి ప్రాంతంలోని ఓ కాలేజీలో గతేడాది ఈసీఈలో 240 సీట్లుంటే, ఈ ఏడాది 120 సీట్లకు తగ్గించి, సీఎస్‌ఈ డాటాసైన్స్‌లో 120 నుంచి 180 సీట్లకు, సైబర్‌ సెక్యూరిటీలో 60 నుంచి 180కి పెంచారు.
• మరో ఇంజినీరింగ్‌ కాలేజీలో గతేడాది సివిల్‌ బ్రాంచిలో 120 సీట్లుంటే, ఈసారి 60కి తగ్గించి ఆర్టిఫిషియల్‌ ఇంటెలిజెన్స్‌ అండ్‌ డాటాసైన్స్‌లో 60 సీట్లు పెంచారు.
• ఇంకో కాలేజీలో మొత్తం 600 సీట్లుంటే, సీఎస్‌ఈ అనుబంధ బ్రాంచిల్లో 420 సీట్లకు తగ్గాయి. ఇదే కాలేజీలో మెకానికల్‌ బ్రాంచిలో 180 సీట్లు మిగిలాయి.