మనసంతా బీజేపీ!

• పార్టీ నేతల ట్వీట్లకు గవర్నర్‌ లైకులు

హైదరాబాద్‌, ఏప్రిల్‌ 24 (నమస్తే తెలంగాణ): గవర్నర్‌ తమిళిసై సౌందరరాజన్‌ మనసంతా బీజేపీ చుట్టూనే తిరుగుతున్నదా? ఆమె వ్యవహార శైలిని, ట్విట్టర్‌ ఖాతాను పరిశీలిస్తున్నవారు ఇదే అనుమానం వ్యక్తంచేస్తున్నారు. గవర్నర్‌ హోదాలో ఉన్నప్పటికీ బీజేపీ నేతగా వ్యవహరిస్తున్నారనే విమర్శలు ఇప్పటికే ఉన్నాయి. తన పీఆర్వోగా బీజేపీ కార్యకర్తను నియమించుకొన్నారంటూ ఇటీవల ఎన్డీటీవీ చెన్నై బ్యూరో ఇంచార్జి స్టాలిన్‌ వెల్లడించిన సమాచారం పెద్ద దుమారమే రేపింది. సోషల్‌ మీడియాలో సైతం గవర్నర్‌ బీజేపీ అనుకూల ప్రచారం చేస్తున్నారనే విమర్శలున్నాయి. ట్విట్టర్‌ ఖాతాలో చేస్తున్న లైక్‌లు సైతం వివాదస్పదమవుతున్నాయి.

• అంబేద్కర్‌ జయంతి రోజు బీజేపీ ఎమ్మెల్యే ఈటల రాజేందర్‌ తన ఫొటోతో సహా పోస్ట్‌ చేసిన ఒక ట్వీట్‌ను గవర్నర్‌ లైక్‌ చేశారు.
• తమిళనాడు బీజేపీ మహిళా మోర్చా ప్రధాన కార్యదర్శి నెల్లాయమ్మల్‌ నిర్వహించిన అంబేద్కర్‌ జయంతి కార్యక్రమం ఫొటోలను సైతం ఆమె లైక్‌ చేశారు. ఇందులో స్పష్టంగా బీజేపీ జెండాలు కనిపిస్తున్నాయి. ఇదే సమయంలో కేంద్ర, రాష్ట్ర ప్రభుత్వాలు పెట్టిన పోస్టులను ఆమె పట్టించుకోలేదు.
• బీజేపీ హెల్త్‌ వింగ్‌ ఎగ్జిక్యూటివ్‌ మెంబర్‌ డాక్టర్‌ ఏ శ్రీనివాసన్‌ ఆ పార్టీకి, ప్రధాని మోదీకి అనుకూలంగా చేసిన అనేక ట్వీట్లను గవర్నర్‌ లైక్‌ చేశారు. ముఖ్యంగా ‘నమో అగెయిన్‌’ (మరోసారి మోదీ) అంటూ క్యాప్షన్లు పెట్టిన పోస్టులను లైక్‌ కొట్టడం గమనార్హం.
• బీజేపీ జాతీయ సంయుక్త కార్యదర్శి వీ సతీశ్‌, తమిళనాడులోని బీజేపీ మెడికల్‌ వింగ్‌ వైస్‌ ప్రెసిడెంట్‌ డాక్టర్‌ ఇందుమతి, బీజేపీ రాజ్యసభ ఎంపీ సెల్వగణపతి వంటివారు చేసిన పోస్టులకు సైతం గవర్నర్‌ లైకులు కొట్టారు.
• ఇలాంటివన్నీ తమిళిసై గవర్నర్‌ పదవికి తగిన హుందాతనం ప్రదర్శించకుండా, బీజేపీ కార్యకర్త మాదిరిగా వ్యవహరిస్తున్నారనే విమర్శలకు ఆస్కారం ఇస్తున్నాయి.