GRIET | లేని ఫ్యాకల్టీని ఉన్నట్టుగా.. అఫిలియేషన్‌ కోసం అనైతిక పద్ధతి.. జీఆర్‌ఐఈటీ నిర్వాకం

‘క్వాలిఫైడ్‌ ఫ్యాకల్టీ లేరు.. డమ్మీలను పెట్టి నడిపిస్తున్నారు. అఫిలియేషన్‌ కోసం సమర్పించినవన్నీ తప్పుడు వివరాలే. కాలేజీకి మాక్‌ వర్చువల్‌ టూర్‌కు కావల్సిన ఇంటర్నెట్‌ సౌకర్యమే లేదు. కానీ డీమ్డ్‌ వర్సిటీ కోసం దరఖాస్తు చేశారు..’ అంటూ హైదరాబాద్‌లోని గోకరాజు రంగరాజు ఇన్‌స్టిట్యూట్‌ ఆఫ్‌ ఇంజినీరింగ్‌ టెక్నాలజీ (జీఆర్‌ఐఈటీ)పై అదే కాలేజీకి చెందిన ఉద్యోగులు ఉన్నత విద్యామండలి, జేఎన్టీయూకు ఫిర్యాదులు చేశారు.

• ‘గోకరాజు రంగరాజు’ నిర్వాకం
• జేఎన్టీయూ తనిఖీలు ఉత్తవే
• అనైతిక పద్ధతి అనుసరిస్తున్నరు
• ఫిర్యాదు చేసినా పట్టించుకోరా?
• ఉన్నత విద్యామండలి సహా జేఎన్టీయూకు గోకరాజు రంగరాజు కాలేజీ అధ్యాపకుల ఫిర్యాదు

GRIET | హైదరాబాద్‌, మే 24 (నమస్తే తెలంగాణ) : ‘క్వాలిఫైడ్‌ ఫ్యాకల్టీ లేరు.. డమ్మీలను పెట్టి నడిపిస్తున్నారు. అఫిలియేషన్‌ కోసం సమర్పించినవన్నీ తప్పుడు వివరాలే. కాలేజీకి మాక్‌ వర్చువల్‌ టూర్‌కు కావల్సిన ఇంటర్నెట్‌ సౌకర్యమే లేదు. కానీ డీమ్డ్‌ వర్సిటీ కోసం దరఖాస్తు చేశారు..’ అంటూ హైదరాబాద్‌లోని గోకరాజు రంగరాజు ఇన్‌స్టిట్యూట్‌ ఆఫ్‌ ఇంజినీరింగ్‌ టెక్నాలజీ (GRIET)పై అదే కాలేజీకి చెందిన ఉద్యోగులు ఉన్నత విద్యామండలి, జేఎన్టీయూకు ఫిర్యాదులు చేశారు.

ఈ-మెయిల్‌ ద్వారా ఉన్నత విద్యామండలి వైస్‌ చైర్మన్‌ ప్రొఫెసర్‌ ఇటికాల పురుషోత్తంకు జేఎన్టీయూ వీసీ, రిజిస్ట్రార్‌కు లిఖితపూర్వకంగా ఫిర్యాదులు చేశారు. ఈ ఫిర్యాదులో అనేక ఆరోపణలు చేశారు. జేఎన్టీయూ నియమించిన నిజనిర్ధారణ కమిటీని కాలేజీ యాజమాన్యం లోబర్చుకుని, అనుకూలంగా రిపోర్టులు ఇప్పించుకున్నట్టు ఉద్యోగులు ఆయా లేఖలో ఫిర్యాదుచేశారు. కాలేజీలో జరుగుతున్న విషయాలపై అనేకసార్లు లిఖితపూర్వకంగా ఫిర్యాదుచేశామని, అయినా స్పందనలేదని విస్మయం వ్యక్తంచేశారు.

అధ్యాపకులు లేవనెత్తిన అంశాలు..

• ఫ్యాకల్టీ అప్రైజల్‌ విషయంలో అనేక అవకతవకలున్నాయి. ఫ్యాకల్టీకి ఇంక్రిమెంట్లు ఇవ్వడంలేదు.రీసెర్చ్‌ పబ్లికేషన్లు అంతా మోసం.పరస్పర సహకారం (మ్యూచువల్‌ కొలాబరేషన్స్‌) ముసుగులో మోసపూరిత పద్ధతులు అవలంభిస్తున్నారు.
• రీసెర్చ్‌నిధులను వినియోగిస్తున్నారా..? అంటే ప్రశ్నార్థకమే.
• న్యాక్‌, ఎన్‌బీఏ, ఎన్‌ఐఆర్‌ఎఫ్‌ గుర్తింపు, జేఎన్టీయూ ఎఫ్‌ఎఫ్‌సీ తనిఖీల కోసం తప్పుడు వివరాలు(మ్యానిపులేటెడ్‌ డాటా) సమర్పిస్తున్నారు. తనిఖీ బృందాలకు అందించే ప్లేస్‌మెంట్స్‌, ఉన్నత చదువుల కోసం వెళ్లిన వారుసహా డిపార్ట్‌మెంట్లవారీగా సమర్పించేవన్నీ తప్పుడు సమాచారమే.
• తనిఖీలకు వచ్చే అధికారులు, బృందాలను కాలేజీ నిర్వాహకులు ప్రభావితం చేస్తున్నారు. లోబర్చుకుంటున్నారు. అనైతిక మార్గాల ద్వారా మెరుగైన సిఫార్సులు చేయించుకుంటున్నారు.
• డీమ్డ్‌ టు బీ యూనివర్సిటీ హోదా కోసం సమర్పించిన వివరాలన్నీ తప్పుడు, తారుమారు చేసినవే. డీమ్డ్‌ వర్సిటీ అక్రిడిటేషన్‌ కోసం మాక్‌ వర్చువల్‌ టూర్‌ చేయాలి. ఈ టూర్‌ నిర్వహించేందుకు సరైన ఇంటర్నెట్‌ సౌకర్యమేలేదు.

జేఎన్టీయూకు ప్రశ్నలు..

• నిజనిర్ధారణ కమిటీ (ఫ్యాక్ట్‌ ఫైండింగ్‌ కమిటీ) కాలేజీలో పనిచేస్తున్న ఫ్యాకల్టీ వివరాలను పరిశీలించిందా..? బయోమెట్రిక్‌ హాజరును పరిశీలించారా..? కొన్ని డిపార్ట్‌మెంట్లలో పేరుకే ఫ్యాకల్టీ ఉన్నారు. వాస్తవికంగా ఉండటంలేదు. అనుమానముంటే నెలవారీగా ఫ్యాకల్టీ బయోమెట్రిక్‌ హాజరు, నెలవారి శాలరీ స్టేట్‌మెంట్స్‌ను పరిశీలించండి.
• జేఎన్టీయూ తనిఖీ చేసిన సమయంలో కొంత మంది ఫ్యాకల్టీ గైర్హాజరయ్యారు. కొంత మంది డమ్మీలను కమిటీ ముందు ప్రదర్శించారు. ఒక్కరే పదే పదే కనిపిస్తారు. కావాలంటే వీడియో రికార్డు చూడండి. లేదంటే క్యాంపస్‌లో మరోసారి తనిఖీలు చేయండి.
• కాలేజీలో సరిపడా మౌలిక వసతుల్లేవు. చాలా పరికరాలు పనిచేయడంలేదు. ల్యాబ్‌ను సందర్శించకుండానే కమిటీ ఆమోదం తెలిపింది.
• ఫ్యాకల్టీ జీతం, ఇంక్రిమెంట్‌లను క్రాస్‌ వెరిఫై చేయండి. జూలై 2022, ఏప్రిల్‌ 2025 నెలల్లో జీతాలను సరిపోల్చండి. ఏప్రిల్‌ 2025తో పోల్చితే 2022 జూలై జీతాలు ఎక్కువగా ఉంటాయి. ఇదేలా సాధ్యం.. యాజమాన్యం కేవలం ఖాతాల్లో అదనపు మొత్తాన్ని జమచేసి, తిరిగి వసూలు చేసుకుంటున్నారు.
• ఇంక్రిమెంట్లను క్రాస్‌ వెరిఫై చేయలేదు. అసోసియేట్‌, అసిస్టెంట్‌ ప్రొఫెసర్లకు, సిబ్బందికి వార్షిక ఇంక్రిమెంట్‌ ఇవ్వలేదు. సరికదా ప్రశ్నిస్తే ఫ్యాకల్టీని బెదిరిస్తున్నారు.