బ్రెయిన్‌ డెడ్‌ నిర్ధారణపై దృష్టి పెట్టండి: మంత్రి హరీశ్‌రావు

టీచింగ్‌ హాస్పిటళ్లలో బ్రెయిన్‌ డెడ్‌ డిక్లరేషన్‌ జరిగే దిశగా ప్రయత్నాలు చేయాలని ఆర్థిక, వైద్యారోగ్య శాఖల మంత్రి తన్నీరు హరీశ్‌రావు ఆదేశించారు. అవయవ దానాన్ని ప్రోత్సహించి, ఇతరుల ప్రాణాలను కాపాడేందుకు కృషి చేయాలని అధికారులకు సూచించారు. రాష్ట్రవ్యాప్తంగా ఉన్న టీచింగ్‌ హాస్పిటళ్ల పనితీరుపై బుధవారం ఆయన సమీక్ష నిర్వహించారు.

• మెడికల్‌ కాలేజీల్లో ఎన్‌ఎంసీ నిబంధనలు పాటించాలి
• వీటిపై సూపరింటెండెంట్లదే పూర్తి బాధ్యత
• టీచింగ్‌ హాస్పిటళ్లపై సమీక్షలో మంత్రి హరీశ్‌రావు

హైదరాబాద్‌, జనవరి11 (నమస్తే తెలంగాణ): టీచింగ్‌ హాస్పిటళ్లలో బ్రెయిన్‌ డెడ్‌ డిక్లరేషన్‌ జరిగే దిశగా ప్రయత్నాలు చేయాలని ఆర్థిక, వైద్యారోగ్య శాఖల మంత్రి తన్నీరు హరీశ్‌రావు ఆదేశించారు. అవయవ దానాన్ని ప్రోత్సహించి, ఇతరుల ప్రాణాలను కాపాడేందుకు కృషి చేయాలని అధికారులకు సూచించారు. రాష్ట్రవ్యాప్తంగా ఉన్న టీచింగ్‌ హాస్పిటళ్ల పనితీరుపై బుధవారం ఆయన సమీక్ష నిర్వహించారు. ఈ సందర్భంగా మాట్లాడుతూ.. సీఎం కేసీఆర్‌ మార్గనిర్దేశనం, అధికారులు, సిబ్బంది సమష్టి కృషి వల్ల వైద్యారోగ్య రంగంలో తెలంగాణ దేశంలోనే మూడో స్థానానికి చేరుకున్నదని, మొదటి స్థానానికి చేరడమే లక్ష్యంగా పని చేయాలని పిలుపునిచ్చారు.

ప్రభుత్వం అన్నిరకకాల చర్యలు తీసుకుంటున్నదని, సిబ్బంది ఉత్సాహంగా పనిచేసి ప్రజలకు నాణ్యమైన వైద్య సేవలు అందించాలన్నారు. ఈ సందర్భంగా మంత్రి హరీశ్‌రావు పలు కీలక ఆదేశాలు ఇచ్చారు. ఈ సమీక్షలో హెల్త్‌ సెక్రటరీ రిజ్వీ, కుటుంబ సంక్షేమ కమిషనర్‌ శ్వేత మహంతి, డీఎంఈ రమేశ్‌ రెడ్డి, టీఎస్‌ఎంఎస్‌ఐడీసీ ఎండీ చంద్రశేఖర్‌ రెడ్డి, టీవీవీపీ కమిషనర్‌ అజయ్‌ కుమార్‌, డీపీహెచ్‌ శ్రీనివాసరావు తదితరులు పాల్గొన్నారు.

మంత్రి హరీశ్‌రావు ఆదేశాలు

• దవాఖానల్లో వైద్యులు 24 గంటలు అందుబాటులో ఉండాలి.
• అవసరమైతే తప్ప పైదవాఖానలకు రెఫర్‌ చేయరాదు.
• మెడికల్‌ కాలేజీలన్నీ ఎన్‌ఎంసీ నిబంధనల ప్రకారం నడుచుకోవాలి. దీనికి సూపరింటెండెంట్లదే బాధ్యత.
• స్కాలర్‌షిప్పులు, వేతనాలకు సంబంధించిన బిల్లులు ఎప్పటికప్పుడు క్లియర్‌ చేస్తున్నాం. జాప్యం జరగకుండా చూసుకోవాలి.
• డిశ్చార్జి అయిన పేషెంట్లకు ఉచితంగా మందులు ఇచ్చి పంపాలి. ఈ విషయం పేషెంట్లకు తెలిసేలా బోర్డు ఏర్పాటు చేయాలి.
• అవసరమైతే రాత్రి వేళ పోస్టుమార్టం జరిగేలా చూడాలి.
• అన్ని పరికరాలు, యంత్ర పరికరాలు కండిషన్‌లో ఉండాలి. టిఫా సానింగ్‌ సేవలు గర్భిణులకు నిరంతరం అందాలి.
• కొత్త మెనూ ప్రకారం డైట్‌ అందుతుం దా లేదా అని తరుచూ పరిశీలించాలి.
• పరిశుభ్రత విషయంలో రాజీ పడొద్దు. ఇన్ఫెక్షన్‌ కంట్రోల్‌పై ప్రతి సోమవారం కమిటీ సమావేశం కావాలి.