వివాహబంధం.. విషాదాంతం!.. హత్యలకు దారితీస్తున్న వివాహేతర బంధాలు

ఇటీవల మేడిపల్లిలో 5 నెలల గర్భిణి స్వాతిని ఆమె భర్త మహేందర్‌రెడ్డి ముక్కలుగా నరికి.. మూసీ నదిలో పడేశాడు. ప్రేమించి పెళ్లాడిన భాగస్వామిని కడతేర్చి.. జైలుపాలయ్యాడు.

• అనుమానాలతో మంటగలుస్తున్న మానవత్వం
• భార్యలను దారుణంగా హత్య చేస్తున్న భర్తలు
• భర్తలను కిరాతకంగా చంపుతున్న భార్యలు
• కన్నవారే చిన్నారుల ఉసురు తీస్తున్న వైనం
• నేరాల్లో తల్లిదండ్రులు.. అనాథలుగా పిల్లలు

ఇటీవల మేడిపల్లిలో 5 నెలల గర్భిణి స్వాతిని ఆమె భర్త మహేందర్‌రెడ్డి ముక్కలుగా నరికి.. మూసీ నదిలో పడేశాడు. ప్రేమించి పెళ్లాడిన భాగస్వామిని కడతేర్చి.. జైలుపాలయ్యాడు.

హైదరాబాద్‌కు చెందిన వ్యాపారి రమేశ్‌, నిహారిక భార్యాభర్తలు. నిహారిక భర్త పేరు మీదున్న రూ.8 కోట్ల ఆస్తిని కొట్టేయాలని ప్రియుడితో ప్లాన్‌ చేసింది. భర్తను కారు లో భువనగిరి శివారుకు తీసుకెళ్లి హత్యచేసింది. హర్యానాకు చెందిన రాణా సాయ ంతో ఊటీ కాఫీ ఎస్టేట్లో దహనం చేసింది.

సంగారెడ్డి జిల్లా అమీన్‌పూర్‌లో చెన్నయ్య, రజిత దంపతులకు ముగ్గురు పిల్లలు. పూర్వ విద్యార్థుల సమ్మేళనానికి వెళ్లిన రజిత.. తన పాత ఫ్రెండ్‌ శివకుమార్‌ను కలుసుకుంది. ప్రియుడితో జీవించాలని భర్త, పిల్లలకు పెరుగులో విషమిచ్చి చంపింది. చెన్నయ్య భోజనం చేయకపోవడంతో బతికిపోయాడు.

హైదరాబాద్‌, సెప్టెంబర్‌ 6 (నమస్తే తెలంగాణ): ‘ధర్మేచ, అర్థేచా, కామేచా.. నాతి చరామి’ అంటూ చేసిన ప్రమాణాలను మర్చిపోతున్న దంపతులు.. ఒకరినొకరు కడతేర్చుకుంటున్నారు. పవిత్రంగా, సురక్షితంగా భావించిన వివాహ బంధాలు బలహీనమై, విషాదాలు జరుగుతున్నాయి. వివాహేతర బంధాలు.. హత్యలు, ఆత్మహత్యలకు దారితీస్తున్నాయి. రెండేండ్లలో పలు కుటుంబాల్లో జరిగిన ఘర్షణలు విషాదాంతమయ్యాయి. ఈ పరిణామాలు తీవ్ర ఆందోళనకరంగా మారాయని మానసిక విశ్లేషకులు అభిప్రాయం వ్యక్తంచేస్తున్నారు.

వివాహేతర బంధాలతోనే విషాదం
కుటుంబ వ్యవస్థ చిన్నాభిన్నం కావడానికి ప్రధాన కారణాల్లో ఒకటి వివాహేతర బంధ ం. దంపతుల్లో ఒకరిపై ఒకరికి ప్రేమ తగ్గడం మరొకరితో బంధం కొనసాగిస్తున్న క్రమం లో హత్యలు జరుగుతున్నాయని సర్వేలు చె ప్తున్నాయి. ఇతరులతో బంధాలు ఏర్పర్చుకోవడంతో విడాకులు పెరుగుతున్నాయని, హత్యలకు దారితీస్తున్నాయని చెప్తున్నారు.

దాంపత్యంలో సమస్యలు-కారణాలు

• భార్యాభర్తల మధ్య అవగాహన లేకపోవడం, వరకట్నం వివాహేతర బంధాలు
• బాధ్యతలు పెరగడం, సమయం ఇచ్చుకోలేకపోవడం, ప్రేమకు దూరం కావడం
• లేట్‌ వివాహాల్లో సర్దుబాటు చేసుకోలేక గొడవలు, వాగ్వాదాలు పెరగడం
• ఆర్థిక అభద్రత, అప్పులు, నిరుద్యోగం
• భార్యాభర్తల మధ్య అనుమానం వల్ల బంధాలు బలహీనపడటం
• తల్లిదండ్రులకు దూరంగా దంపతులు నగరాల్లో జీవిస్తూ భయం, కట్టడి లేకుండా జీవించడం
• పురుషులు మద్యపానం, ధూమపానం, బెట్టింగ్‌ వంటి వ్యసనాలతో ఆరోగ్యం పాడు చేసుకోవడం, ఆర్థిక ఇబ్బందుల్లో చిక్కుకోవడం
• వ్యసనాల కారణంగా పురుషులు లైంగిక పటుత్వం కోల్పోయి, భాగస్వామితో సరిగా ఉండలేకపోవడం
  రెండేండ్లలో జరిగిన దారుణ హత్యలు
• జనగామ జిల్లాలోని పిట్టలోనిగూడెం గ్రామానికి చెందిన కాలియా కనకయ్యకు ఇద్దరు భార్యలు. ఒకరోజు రాత్రి మద్యం సేవించి గొడ్డలితో వారిని బెదిరించడంతో, ఇద్దరు భార్యలు కలిసి కనకయ్యను కొట్టి చంపారు.
• నిజామాబాద్‌ జిల్లా ధర్పల్లి మండలం హొన్నాజిపేట్‌లో మల్లయ్య అనే పశువుల కాపరిని అతని భార్య లక్ష్మి, కుమారుడు మధు హత్య చేశారు. ఆస్తి తగాదాలు హత్యకు కారణమని పోలీసుల విచారణలో తేలింది.
• వివాహేతర బంధం నేపథ్యంలో హైదరాబాద్‌లోభార్య ఐశ్వర్య, ఆమె ప్రియుడు తిరుమలరావు, ఐశ్వర్య తల్లి సుజాత కలిసి భర్త తేజేశ్వర్‌ను హత్య చేశారు. ఈ ఘటన దేశవ్యాప్తంగా సంచలనం సృష్టించింది.
• జగిత్యాలలో భర్త తిరుపతికి మరో మహిళతో వివాహేతర బంధం ఉండటంతో, కంబాల హారిక అనే మహిళ తీవ్ర మనస్తాపానికి గురైంది. ఆమె తన తొమ్మిదేండ్ల కుమారుడు, ఎనిమిదేండ్ల కుమార్తెకు విషమిచ్చి చంపి, తాను కూడా ఆత్మహత్య చేసుకుంది.
• వరంగల్‌కు చెందిన వైద్యుడు సుమంత్‌రెడ్డి భార్య.. జిమ్‌ ట్రైనర్‌తో వివాహేతర బంధం పెట్టుకొని, ప్రియుడికి సుపారీ ఇచ్చి మరీ భర్తపై దాడి చేయించింది. దవాఖానలో 8 రోజులు చికిత్స పొందిన సుమంత్‌రెడ్డి చనిపోయాడు.
• కామారెడ్డి జిల్లా మాచారెడ్డి మండలంలో సాడెం కుమార్‌ను తన భార్య రేణుక రూ.15 లక్షల సుఫారీ ఇచ్చిమరీ చంపించింది. వివాహేతర బంధానికి భర్త అడ్డొస్తున్నాడనే కారణంతోనే హత్య చేసినట్టు దర్యాప్తులో తేలింది.
• శామీర్‌పేట పోలీస్‌స్టేషన్‌ పరిధిలో మూడు చింతలపల్లి మండలం లక్ష్మీపూర్‌ తండాకు చెందిన దేవానాయక్‌ను భార్య మమత.. యాదగిరి అనే వ్యక్తితో కలిసి చంపింది. ఈ కేసులోనూ వివాహేతర బంధమే కారణమని పోలీసులు గుర్తించారు.
• హైదరాబాద్‌లోని అజీజ్‌నగర్‌లో ఓ మహిళ తన మొదటి భర్త సాయంతో ప్రస్తుత భర్తను బావిలో పడేసి హత్య చేసింది.
• కరీంనగర్‌ జిల్లాలో ఓ మహిళ, తన ప్రియుడు కలిసి హత్య చేశారు.
• జోగులాంబ గద్వాల జిల్లాలో ఉద్యోగం చేసే దగ్గర తన బాస్‌తో ఉన్న వివాహేతర బంధం కలిగిన మహిళ.. భర్తను హత్య చేయించింది.
• హైదరాబాద్‌లోని కూషాయిగూడలో గర్భిణి అయిన భార్య స్నేహను చంపిన భర్త.. అగ్నిప్రమాదంలా చిత్రీకరించే ప్రయత్నేం చేశాడు. చివరికి పోలీసులకు పట్టుబడ్డాడు.
• హైదరాబాద్‌లోని సరూర్‌నగర్‌లో తన భార్య మరొక వ్యక్తితో ఫోన్‌లో చాటింగ్‌ చేస్తున్నదని భార్యను గొంతు నులిమి చంపాడు.

బలైపోతున్న బాలల భవితవ్యం
ఆర్థిక సమస్యలు లేదా వివాహేతర బంధాలు దంపతుల మధ్య సమస్యలు తలెత్తి, ఘర్షణలకు దారితీస్తున్నాయి. ఈ పరిణామాలతో పిల్లల భవిష్యత్తు ప్రశ్నార్థకంగా మారుతున్నది. అభంశుభం తెలియని చిన్నారులు ప్రాణాలు కోల్పోయేలా చేస్తున్నది. కొన్ని ఘటనల్లో తల్లి, మరికొన్ని ఘటనల్లో తండ్రి.. తమ వివాహేతర బంధాలకు అడ్డొస్తున్నారని పిల్లలను చంపుతున్నారు. కొందరు హత్య, ఆత్మహత్యకు పాల్పడటం వల్ల పిల్లలు అనాథలుగా మారుతున్నారు. తల్లిదండ్రుల మధ్య సమస్యలు.. పిల్లల భద్రతకు ముప్పుగా మారుతున్నదని సైకాలజిస్టులు చెప్తున్నారు.

అర్థం చేసుకోవడమే అనర్థాలకు పరిష్కారం
భార్యాభర్తలు ఒకరినొకరు అర్థం చేసుకుంటూనే సగం సమస్యలకు చెక్‌ పెట్టొచ్చు. నమ్మకం లేనిచోట అనుమానం పెరుగుతుంది. మారిన జీవన విధానంలో ఒకరికొకరు కట్టుబడి ఉండి.. ఊసులు చెప్పుకునే పరిస్థితి లేదు. భర్తనో, భార్యనో, పిల్లలనో అడ్డు తొలగించుకునే ఆలోచన చేస్తున్నారు. ఫోన్లు పక్కన పెట్టి మాట్లాడుకోవాలి. పరస్పరం గౌరవించుకోవాలి. చిన్నచిన్న ఆనందాలను వెతుక్కోవాలి… భాగస్వామికి అందివ్వాలి. జీవిత లక్ష్యాలను ఏర్పుచుకోవాలి. విపరీతమైన కోరికలు, ఆలోచనలు ఉంటే.. సైకాలజిస్టులను సంప్రదించాలి.
– డాక్టర్‌ అనంత్‌కుమార్‌, సైకాలజిస్టు

మహిళలు, ఎస్సీ, ఎస్టీల పట్ల పెరిగిన నేరాలు
రాష్ట్రంలో మహిళలు, ఎస్సీ, ఎస్టీలపై నేరాలు పెరిగాయి. 2023తో పోల్చితే 2024 డిసెంబర్‌ వరకు మహిళల హత్యలు 13.15శాతం పెరిగాయి. ఆత్మహత్యకు ప్రేరేపించిన కేసులు 363 పెరిగాయి. మొత్తంగా మహిళలపై దాడులు, వేధింపులు 4.78 శాతం పెరిగాయని గణాంకాలు చెప్తున్నాయి. 2024 రాష్ట్ర క్రైమ్‌ నివేదిక ప్రకారం కుటుంబ వివాదాల్లో 229 హత్యలు జరిగాయి. నగదు వివాదాల్లో 53, లైంగిక కారణాలతో 102, భూ వివాదాల్లో 82, చిన్నపాటి గొడవల వల్ల 82, ఇతర కారణాల వల్ల 259 హత్యలు చోటు చేసుకున్నాయి.