ఇంగ్లిష్‌ శిక్షణ బాగుంది

ఇంగ్లిష్‌ మీడియంలో బోధించేందుకు అజీమ్‌ ప్రేమ్‌జీ యూనివర్సిటీ ఇచ్చిన శిక్షణ అద్భుతంగా ఉన్నదని ప్రభుత్వ ఉపాధ్యాయులు అంటున్నారు.

• ఆంగ్ల బోధనపై ఎన్నో నేర్చుకొన్నాం
• ఆన్‌లైన్‌ శిక్షణ బాగా ఉపయోగపడుతున్నది
• ప్రభుత్వ ఉపాధ్యాయుల మనోగతం
• త్వరలో రెండో విడత ఇంగ్లిష్‌ శిక్షణ

హైదరాబాద్‌, జూన్‌ 13 (నమస్తే తెలంగాణ): ఇంగ్లిష్‌ మీడియంలో బోధించేందుకు అజీమ్‌ ప్రేమ్‌జీ యూనివర్సిటీ ఇచ్చిన శిక్షణ అద్భుతంగా ఉన్నదని ప్రభుత్వ ఉపాధ్యాయులు అంటున్నారు. ప్రభుత్వ పాఠశాలల్లో ఈ విద్యా సంవత్సరం నుంచి 1 నుంచి 8వ తరగతి వరకు ఇంగ్లిష్‌ మీడియం ప్రవేశపెడుతున్న విషయం తెలిసిందే. ఈ తరగతులకు బోధించే టీచర్లకు ప్రభుత్వం అజీమ్‌ ప్రేమ్‌జీ వర్సిటీ ఆధ్వర్యంలో ఇంగ్లిష్‌ లాంగ్వేజ్‌ ఎన్‌రిచ్‌మెంట్‌ కోర్సులో (ఈఎల్‌ఈసీ) శిక్షణ ఇప్పించారు. ప్రాథమిక తరగతుల్లోని అందరు, ఉన్నత తరగతుల్లోని భాషేతర టీచర్లకు శిక్షణ పూర్తిచేశారు. ఆన్‌లైన్‌లో శిక్షణ పొందడంపైనా తర్ఫీదు ఇచ్చారు. ఈ నెల చివరివారం లేదా వచ్చే నెలలో టీచర్లకు రెండో విడత శిక్షణ ఇప్పించేందుకు అధికారులు ఏర్పాట్లు చేస్తున్నారు. శిక్షణ పొందిన టీచర్లపై అజీమ్‌ ప్రేమ్‌జీ వర్సిటీ ఇటీవలే సర్వే నిర్వహించింది. 70 వేలమంది టీచర్లు ఈ సర్వేలో పాల్గొన్నారు.

ఉపయుక్తంగా శిక్షణ

• 27,610 ప్రైమరీ టీచర్లు ఇంగ్లిష్‌ మీడియం శిక్షణ తరగతి గది నిర్వహణకు ఉపయుక్తంగా (రిలవెంట్‌) ఉన్నదని చెప్పగా, 12,156 టీచర్లు శిక్షణ పొడిగించాలని కోరారు. శిక్షణ ఉపయుక్తంగా ఉన్నదని 11,050 మంది సెకండరీ గ్రేడ్‌ టీచర్లు చెప్పారు. 6,668 మంది శిక్షణను పొడిగించాలని చెప్పారు.
• శిక్షణ సులభంగా ఉన్నదని 3,898 మంది ప్రాథమిక ఉపాధ్యాయులు చెప్పారు. అవసరానికి తగినట్టుగా ఉన్నదని 34,335 మంది చెప్పగా, కఠినంగా ఉన్నదని 1,866 మంది అభిప్రాయపడ్డారు. శిక్షణ సులభంగా ఉన్నదని 1,602 మంది ఎస్జీటీలు చెప్పారు. తమ స్థాయికి తగినట్టు ఉన్నదని 15,453 మంది, కఠినంగా ఉన్నదని 863 మంది పేర్కొన్నారు.
• ఆన్‌లైన్‌ శిక్షణ ఇంగ్లిష్‌ నేర్చుకొనేందుకు సహాయకారిగా ఉన్నదని 27, 698 ప్రాథమిక టీచర్లు చెప్పారు. మరికొంత శిక్షణ అవసరమని 11,584 మంది తెలిపారు.
• వీడియోలు, శిక్షణ సామగ్రి ఎంతగానో ఉపయోగపడ్డాయని 15,266 మంది ప్రైమరీ టీచర్లు చెప్పగా, అత్యంత అద్భుతంగా ఉపయోగపడ్డాయని 2,351 మంది టీచర్లు వెల్లడించారు.